ಧೋನಿ ಒಂದೇ ದಿನದಲ್ಲಿ ಯಶಸ್ಸು ಕಂಡಿಲ್ಲ.. ಪಂತ್​ ಬೆಂಬಲಕ್ಕೆ ನಿಂತ ಯುವಿ..

ಯುವ ಆಟಗಾರ ರಿಷಬ್​ ಪಂತ್​ರನ್ನು ಎಂ ಎಸ್​ ಧೋನಿಗೆ ಹೋಲಿಸಿ ಮಾತನಾಡಲು ಸಾಧ್ಯವಿಲ್ಲ. ಒಂದೇ ದಿನದಲ್ಲಿ ಯಾರಿಗೂ ಕೂಡ ಯಶಸ್ಸು ಸಿಗುವುದಿಲ್ಲ. ಧೋನಿ ಇಂದು ವಿಶ್ವಮಟ್ಟದಲ್ಲಿ ಬೆಳೆದಿದ್ದಾರೆಂದರೆ ಅದರ ಹಿಂದೆ ತುಂಬಾ ದಿನಗಳ ಶ್ರಮ ಅಡಗಿದೆ ಎಂದು ಯುವರಾಜ್​ ಸಿಂಗ್ ಹೇಳಿದ್ದಾರೆ.

ನವದೆಹಲಿ:ಟೀಂ ಇಂಡಿಯಾ ಮಾಜಿ ಆಟಗಾರ ಯುವರಾಜ್​ ಸಿಂಗ್​ ಯುವ ವಿಕೆಟ್​ ಕೀಪರ್ ಬ್ಯಾಟ್ಸ್​ಮನ್​​ ರಿಷಬ್​ ಪಂತ್​ ಬೆಂಬಲಕ್ಕೆ ನಿಂತಿದ್ದಾರೆ. ಪಂತ್​ ಮೇಲೆ ಒತ್ತಡ ಹೇರಬಾರದು. ಸಹಜ ಶೈಲಿಯಲ್ಲೇ ಬ್ಯಾಟಿಂಗ್​ ಮಾಡಲು ಅವಕಾಶ ನೀಡಿ ಎಂದು ಯುವಿ ಹೇಳಿದ್ದಾರೆ.

ಇತ್ತೀಚೆಗೆ ಬ್ಯಾಟಿಂಗ್​ ವೈಫಲ್ಯ ಅನುಭವಿಸುತ್ತಿರುವ ರಿಷಬ್​ ಪ್ರದರ್ಶನದ ಬಗ್ಗೆ ಎಲ್ಲೆಡೆಯಿಂದ ಟೀಕೆ ವ್ಯಕ್ತವಾಗುತ್ತಿದೆ. ಮುಂದಿನ ವರ್ಷ ಟಿ-20 ವಿಶ್ವಕಪ್​ ಟೂರ್ನಿ ಕೂಡ ಇರುವುದರಿಂದ, nಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಬದಲಿಗೆ ಪಂತ್​ಗೆ ಹೆಚ್ಚಿನ ಅವಕಾಶ ನೀಡಲಾಗುತ್ತಿದೆ. ಆದರೆ, ಸಿಕ್ಕ ಅವಕಾಶಗಳನ್ನು ಬಳಸಿಕೊಳ್ಳುವಲ್ಲಿ ಪಂತ್​ ವಿಫಲರಾಗುತ್ತಿದ್ದಾರೆ ಎಂಬ ಮಾತು ಕೇಳಿಬಂದಿದ್ದವು.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಯುವರಾಜ್​​, ಯುವ ಆಟಗಾರ ರಿಷಬ್​ ಪಂತ್​ರನ್ನು ಎಂ ಎಸ್​ ಧೋನಿಗೆ ಹೋಲಿಸಿ ಮಾತನಾಡಲು ಸಾಧ್ಯವಿಲ್ಲ. ಒಂದೇ ದಿನದಲ್ಲಿ ಯಾರಿಗೂ ಕೂಡ ಯಶಸ್ಸು ಸಿಗುವುದಿಲ್ಲ. ಧೋನಿ ಇಂದು ವಿಶ್ವಮಟ್ಟದಲ್ಲಿ ಬೆಳೆದಿದ್ದಾರೆಂದರೆ, ಅದರ ಹಿಂದೆ ತುಂಬಾ ದಿನಗಳ ಶ್ರಮ ಅಡಗಿದೆ. ಇನ್ನೂ ಕೂಡ ಟಿ-20 ವಿಶ್ವಕಪ್ ಟೂರ್ನಿಗೆ ಒಂದು ವರ್ಷಗಳ ಅವಕಾಶವಿದೆ ಎಂದು ಹೇಳಿದ್ದಾರೆ.

ಬಹಳ ಅವಕಾಶಗಳು ಲಭಿಸಿದರೂ ಪಂತ್​ ವಿಫಲರಾಗಿರಬಹುದು. ಆದರೆ, ತಪ್ಪುಗಳನ್ನು ತಿದ್ದಿಕೊಳ್ಳಲು ಇನ್ನೂ ಅವಕಾಶವಿದೆ. ತಂಡದಲ್ಲಿ ಅದಕ್ಕಾಗಿಯೇ ಸಲಹೆ ಸೂಚನೆ ನೀಡಲು ಕೋಚ್​​, ನಾಯಕರೆಲ್ಲ ಇದ್ದು, ಬದಲಾವಣೆ ಸಾಧ್ಯವಿದೆ ಎಂದು ಯುವಿ ಹೇಳಿದ್ದಾರೆ.