ತವರಿಗೆ ಮರಳಿದ ಆರ್​ಸಿಬಿ ತಂಡದ ನಿರ್ದೇಶಕ: ಪ್ರಧಾನಿ ಮೋದಿಗೆ ಧನ್ಯವಾದ

ಲಾಕ್​ಡೌನ್​ ಘೋಷಣೆ ನಂತರ ಭಾರತದಲ್ಲೇ ಸಿಲುಕಿದ್ದ ಆರ್​ಸಿಬಿ ತಂಡದ ನಿರ್ದೇಶಕ ಮೈಕ್ ಹೆಸ್ಸನ್ ನ್ಯೂಜಿಲ್ಯಾಂಡ್​ಗೆ ಮರಳಿದ್ದು, ಪ್ರಧಾನಿ ಮೋದಿಗೆ ಧನ್ಯವಾದ ತಿಳಿಸಿದ್ದಾರೆ.

ವೆಲ್ಲಿಂಗ್ಟನ್​: ಕೊರೊನಾ ಸೋಂಕಿನಿಂದ ಲಾಕ್​ಡೌನ್ ಘೋಷಣೆ ಮಾಡಿದಾಗಿನಿಂದ ಭಾರತದಲ್ಲೇ ಸಿಲುಕಿದ್ದ ಆರ್​ಸಿಬಿ ತಂಡದ ನಿರ್ದೇಶಕ ಮೈಕ್ ಹೆಸ್ಸನ್ ಇಂದು ನ್ಯೂಜಿಲ್ಯಾಂಡ್ ತಲುಪಿದ್ದು, ಪ್ರಧಾನಿ ಮೋದಿಗೆ ಧನ್ಯವಾದ ತಿಳಿಸಿದ್ದಾರೆ.

ತವರಿಗೆ ಮರಳುತ್ತಿದ್ದಂತೆ ಟ್ವೀಟ್ ಮಾಡಿರುವ ಹೆಸ್ಸನ್, ಬಸ್​ನಲ್ಲೇ ಒಂದು ದಿನ ಕಳೆದ ನಂತರ ಮುಂಬೈ ವಿಮಾನ ನಿಲ್ದಾಣ ತಲುಪಿದೆ. ಹಾಗಾಗಿ ತವರಿಗೆ ಮರಳಲು ನೆರವಾದ ಭಾರತ ಪ್ರಧಾನಿ ನರೇಂದ್ರ ಮೋದಿ, ನ್ಯೂಜಿಲ್ಯಾಂಡ್ ​ಪ್ರಧಾನಿ ಜಸಿಂದಾ ಅರ್ಡೆನ್‌, ವಿದೇಶಾಂಗ ಇಲಾಖೆ ಮತ್ತು ಏರ್​ಲೈನ್ಸ್​ಗೆ ಧನ್ಯವಾದ ಎಂದು ಟ್ವೀಟ್​ ಮಾಡಿದ್ದಾರೆ.

ಇಂಡಿಯನ್ ಪ್ರೀಮಿಯರ್ ಲೀಗ್​ನ 13ನೇ ಆವೃತ್ತಿಗಾಗಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಿರ್ದೇಶಕ ಮೈಕ್ ಹೆಸ್ಸನ್ ಬೆಂಗಳೂರಿನಲ್ಲೇ ಇದ್ದರು. ಕೊರೊನಾ ಸೋಂಕಿನ ಹಿನ್ನೆಲೆಯಲ್ಲಿ ಲಾಕ್​ಡೌನ್ ಘೋಷಣೆ ಮಾಡಿದ್ದರಿಂದ ಏಪ್ರಿಲ್ 15ಕ್ಕೆ ಟೂರ್ನಿಯನ್ನು ಮುಂದೂಡಲಾಗಿತ್ತು. ಆದರೆ ಮತ್ತೊಮ್ಮೆ ಲಾಕ್​ಡೌನ್ ವಿಸ್ತರಣೆ ಮಾಡಿದ್ದರಿಂದ ಅನಿರ್ದಿಷ್ಟಾವಧಿವರೆಗೆ ಟೂರ್ನಿಯನ್ನು ಮುಂದೂಡಲಾಗಿದೆ.