ಎಬಿಡಿ ಬೆನ್ನಲ್ಲೇ ಚೆನ್ನೈಗೆ ಆಗಮಿಸಿದ ಕೊಹ್ಲಿ: 7 ದಿನಗಳ ಕಾಲ ಕ್ವಾರಂಟೈನ್

ಏಪ್ರಿಲ್ 9ರಿಂದ ಆರಂಭವಾಗಲಿರುವ IPL ಉದ್ಘಾಟನಾ ಪಂದ್ಯದಲ್ಲಿ ಆರ್‌ಸಿಬಿ ತಂಡ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್​ ತಂಡವನ್ನು ಎದುರಿಸಲಿದೆ. ಬಹುಪಾಲು ತಂಡದ ಸದಸ್ಯರು ಈಗಾಗಲೇ ಚೆನ್ನೈಗೆ ಆಗಮಿಸಿ ಕ್ವಾರಂಟೈನ್ ಮುಗಿಸಿದ್ದು, ಮಂಗಳವಾರದಿಂದಲೇ ತರಬೇತಿ ಆರಂಭಿಸಿದ್ದಾರೆ.

ಚೆನ್ನೈ:ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ 14ನೇ ಆವೃತ್ತಿಯ ಐಪಿಎಲ್​ಗಾಗಿ ಗುರುವಾರ ಚೆನ್ನೈ ತಲುಪಿದ್ದು, 7 ದಿನಗಳ ಕಡ್ಡಾಯ ಕ್ವಾರಂಟೈನ್​ಗೆ ಒಳಗಾಗಿದ್ದಾರೆ.

ಸ್ಫೋಟಕ ಬ್ಯಾಟ್ಸ್​ಮನ್​ ಎಬಿಡಿ ಇಂದು ಬೆಳಿಗ್ಗೆ ಚೆನ್ನೈಗೆ ಬಂದಿಳಿದಿದ್ದರು. ಮಧ್ಯಾಹ್ನ ವಿರಾಟ್ ಕೊಹ್ಲಿ‌ ಕೂಡ ನಗರಕ್ಕೆ ಆಗಮಿಸಿದ್ದಾರೆ.

ಇಂಗ್ಲೆಂಡ್​ ವಿರುದ್ಧದ ಕೊನೆಯ ಏಕದಿನ ಪಂದ್ಯದ ನಂತರ ಬಯೋಬಬಲ್​ನಿಂದ ಹೊರ ಹೋಗಿದ್ದರಿಂದ ಬಿಸಿಸಿಐ ಪ್ರೋಟೋಕಾಲ್ ಪ್ರಕಾರ 7 ದಿನಗಳ ಕಾಲ ಹೋಟೆಲ್​ನಲ್ಲಿ ಕ್ವಾರಂಟೈನ್​ಗೆ ಒಳಗಾಗಬೇಕಿದೆ. ನಂತರ ತಂಡ ಸೇರಿಕೊಳ್ಳಬಹುದು. ಇಂದಿನಿಂದ ಕ್ವಾರಂಟೈನ್ ಆರಂಭಿಸುವ ಕೊಹ್ಲಿ, ಏಪ್ರಿಲ್ 7 ಅಥವಾ 8ರಂದು ತಂಡದ ಜೊತೆಗೆ ಅಭ್ಯಾಸ ಮಾಡಲಿದ್ದಾರೆ.

ಇದೇ ವರ್ಷ ಆರ್​ಸಿಬಿ ಸೇರಿರುವ ಗ್ಲೇನ್ ಮ್ಯಾಕ್ಸ್​ವೆಲ್, ಡೇನಿಯಲ್ ಕ್ರಿಸ್ಚಿಯನ್​​ ಈಗಾಗಲೇ ಆಸ್ಟ್ರೇಲಿಯಾದ ಫ್ಲೈಟ್ ಏರಿದ್ದಾರೆ. ಕಿವೀಸ್​ನ ಕೈಲ್ ಜೆಮೀಸನ್​ ಮತ್ತು ಫಿನ್ ಅಲೆನ್ ಕೂಡ ನಾಳೆ ಚೆನ್ನೈಗೆ ಬರಲಿದ್ದಾರೆ.

ಕೋಚ್​ ಸೈಮನ್ ಕ್ಯಾಟಿಚ್ ಮತ್ತು ನವದೀಪ್​ ಸೈನಿ ಕ್ವಾರಂಟೈನ್ ಮುಗಿಸಿ ಇಂದು ತರಬೇತಿ ಶಿಬಿರದಲ್ಲಿ ಕಾಣಿಸಿಕೊಂಡಿದ್ದರು.

ಇದನ್ನೂ ಓದಿ: ಚೆನ್ನೈನಲ್ಲಿ RCB ಕ್ಯಾಂಪ್​ ಸೇರಿಕೊಂಡ ಎಬಿಡಿ