ಟೀಂ ಇಂಡಿಯಾ ಕೋಚ್​ ಆಗಿ ರವಿ ಶಾಸ್ತ್ರಿ ಪುನರಾಯ್ಕೆ... ಕೊಹ್ಲಿ ಫೇವರಿಟ್​ ಗುರುವಿಗೆ ಮಣೆ

ಟೀಂ ಇಂಡಿಯಾ ಹಿರಿಯ ಪುರುಷರ ತಂಡದ ಕೋಚ್​ ಆಗಿ ಮತ್ತೊಂದು ಅವಧಿಗೆ ಹಾಲಿ ಕೋಚ್​ ರವಿಶಾಸ್ತ್ರಿ ಪುನರಾಯ್ಕೆಯಾಗಿದ್ದಾರೆ. ಇದಕ್ಕೆ ಸಂಬಂಧಿಸಿದಂತೆ ಕ್ರಿಕೆಟ್​ ಸಲಹಾ ಸಮಿತಿಯ ಕಪಿಲ್​ ದೇವ್​ ಮಾಹಿತಿ ನೀಡಿದರು.

ಮುಂಬೈ:ಟೀಂ ಇಂಡಿಯಾ ಕೋಚ್​ ಹುದ್ದೆಯ ಸಂದರ್ಶನ ಮುಕ್ತಾಯಗೊಂಡಿದ್ದು, ತಂಡದ ನೂತನ ಕೋಚ್​ ಆಗಿ ಮತ್ತೊಂದು ಅವಧಿಗೆ ಹಾಲಿ ಕೋಚ್​ ರವಿಶಾಸ್ತ್ರಿ ಆಯ್ಕೆಗೊಂಡಿದ್ದಾರೆ. ಮುಂಬೈನಲ್ಲಿ ಇಂದು ನಡೆಸಲಾದ ಸಂದರ್ಶನದ ಬಳಿಕ ಕಪಿಲ್ ದೇವ್ ನೇತೃತ್ವದ ಕ್ರಿಕೆಟ್ ಸಲಹಾ ಸಮಿತಿ (ಸಿಎಸಿ) ಹೊಸ ಕೋಚ್ ಹೆಸರನ್ನು ಅಧಿಕೃತವಾಗಿ ಘೋಷಿಸಿದೆ.

ತಂಡದ ಕೋಚ್​ ಹುದ್ದೆಗಾಗಿ ಇಂದು ಕಪಿಲ್​ ದೇವ್​​ ನೇತೃತ್ವದ ಕ್ರಿಕೆಟ್​ ಸಲಹಾ ಸಮಿತಿ ಸಂದರ್ಶನ ನಡೆಸಿತ್ತು. ಈ ವೇಳೆ ಆರು ಜನ ಅಭ್ಯರ್ಥಿಗಳು ಸಂದರ್ಶನದಲ್ಲಿ ಭಾಗಿಯಾಗಿದ್ದರು. ಆದರೆ ಅಫ್ಘಾನಿಸ್ತಾನದ ಮಾಜಿ ಕೋಚ್​​ ಸಿಮನ್ಸ್​ ರೇಸ್​​ನಿಂದ ಪ್ರಮುಖರಾಗಿ ಹೊರಬಿದ್ದಿದ್ದರು.

ಉಳಿದಂತೆ ಟೀಂ ಇಂಡಿಯಾ ಮಾಜಿ ಮ್ಯಾನೇಜರ್​​ ಲಾಲ್​ಚಂದ್​ ರಜಪೂತ್​, ಹಾಲಿ ಟೀಂ ಇಂಡಿಯಾ ಕೋಚ್​ ರವಿಶಾಸ್ತ್ರಿ ಹಾಗೂ ಆಸ್ಟ್ರೇಲಿಯಾದ ಮಾಜಿ ಆಲ್​ರೌಂಡರ್​ ಹಾಗೂ ಶ್ರೀಲಂಕಾ ಕೋಚ್​ ಟಾಮ್​ ಮೂಡಿ ನಡುವೆ ನೇರ ಸ್ಪರ್ಧೆ ಎದುರಾಗಿತ್ತು. ಆದರೆ ಫೈನಲ್​ ಆಗಿ ಶಾಸ್ತ್ರಿ ಮತ್ತೊಂದು ಅವಧಿಗೆ ಆಯ್ಕೆಗೊಂಡಿದ್ದಾರೆ.

ಟೀಂ ಇಂಡಿಯಾ ತಂಡಕ್ಕೆ ಆಯ್ಕೆಗೊಂಡಿರುವ ಕೋಚ್​​ ಮುಂದಿನ 2021ರ ಐಸಿಸಿ ಟಿ-20 ವಿಶ್ವಕಪ್​ವರೆಗೂ ಮಾತ್ರ ಟೀಂ ಇಂಡಿಯಾ ತಂಡದೊಂದಿಗೆ ಇರಲಿದ್ದು, ತದನಂತರ ಮತ್ತೊಂದು ಅವಧಿಗೆ ನೂತನ ಕೋಚ್​ ಆಯ್ಕೆ ಮಾಡಲು ಬಿಸಿಸಿಐ ತೀರ್ಮಾನ ಮಾಡಿದೆ.

ಸದ್ಯ ವೆಸ್ಟ್‌ ಇಂಡೀಸ್‌ನಲ್ಲಿ ಟಿ-20 ಹಾಗೂ ಏಕದಿನ ಸರಣಿಗಳಲ್ಲಿ ಟೀಂ ಇಂಡಿಯಾ ಗೆಲುವು ದಾಖಲು ಮಾಡಿದ್ದು, ಟೆಸ್ಟ್​ ಸರಣಿಗೆ ಅಣಿಯಾಗಿದೆ. ಇನ್ನು ರವಿಶಾಸ್ತ್ರಿ ಜತೆಗೆ ಮೈಕ್ ಹಸ್ಸನ್, ಫಿಲ್ ಸಿಮನ್ಸ್, ಟಾಮ್ ಮೂಡಿ, ರಾಬಿನ್ ಸಿಂಗ್, ಲಾಲ್‌ಚಂದ್ ರಜಪೂತ್ ನಡುವೆ ಸ್ಪರ್ಧೆ ಏರ್ಪಟ್ಟಿತ್ತು. ಆದರೆ ರವಿಶಾಸ್ತ್ರಿಗೆ ಹೋಲಿಸಿದಾಗ ಉಳಿದ ಅಭ್ಯರ್ಥಿಗಳು ಅಷ್ಟೊಂದು ಪ್ರಬಲ ಅಲ್ಲ ಎಂದು ಕಂಡು ಬರದ ಕಾರಣ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಮಾಜಿ ನಾಯಕ ಕಪಿಲ್ ದೇವ್ ನೇತೃತ್ವದ ಕ್ರಿಕೆಟ್ ಸಲಹಾ ಸಮಿತಿಯಲ್ಲಿ ಅಂಶುಮನ್ ಗಾಯಕ್‌ವಾಡ್ ಹಾಗೂ ಶಾಂತ ರಂಗಸ್ವಾಮಿ ಭಾಗಿಯಾಗಿ ಈ ನಿರ್ಧಾರ ಕೈಗೊಂಡಿದ್ದಾರೆ.