ಹೈದರಾಬಾದ್​​ ತಂಡವನ್ನು 158 ರನ್​ಗಳಿಗೆ ಕಟ್ಟಿಹಾಕಿದ ರಾಜಸ್ಥಾನ್​ ರಾಯಲ್ಸ್​

ಮನೀಶ್ ಪಾಂಡೆ 54 ಹಾಗೂ ನಾಯಕ ಡೇವಿಡ್​ ವಾರ್ನರ್ ಅವರ 48 ರನ್​ಗಳ ನೆರವಿನಿಂದ ಹೈದರಾಬಾದ್ ತಂಡ 20 ಓವರ್​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 158 ರನ್​ಗಳಿಸಿದೆ.​

ದುಬೈ:ಕನ್ನಡಿಗ ಮನೀಶ್ ಪಾಂಡೆ ಹಾಗೂ ನಾಯಕ ಡೇವಿಡ್​ ವಾರ್ನರ್​ ಅವರ ಉತ್ತಮ ಬ್ಯಾಟಿಂಗ್ ಪ್ರದರ್ಶನದ ಹೊರೆತಾಗಿಯೂ ಸನ್​ರೈಸರ್ಸ್​ ಹೈದರಾಬಾದ್ ತಂಡ 20 ಓವರ್​ಗಳಲ್ಲಿ 158 ರನ್​ಗಳಿಸಿದೆ.

ಟಾಸ್​ ಗೆದ್ದ ಹೈದರಾಬಾದ್ ತಂಡ ನಿಧಾನಗತಿ ಆಟಕ್ಕೆ ಮೊರೆ ಹೋಯಿತು. ಕಳೆದ ಪಂದ್ಯದಲ್ಲಿ 97 ರನ್​ಗಳಿಸಿದ್ದ ಬೈರ್ಸ್ಟೋವ್​ ಇಂದು 19 ಎಸೆತಗಳಲ್ಲಿ 16 ರನ್​ಗಳಿಸಿ ಔಟಾದರು.

ಆದರೆ 2ನೇ ವಿಕೆಟ್​ ಜೊತೆಯಾಟದಲ್ಲಿ ಒಂದಾದ ವಾರ್ನರ್​ ಹಾಗೂ ಪಾಂಡೆ 73 ರನ್ ಸೇರಿಸಿ ತಂಡದಕ್ಕೆ ಚೇತರಿಕೆ ನೀಡಿದರು. ಆದರೆ ಈ ಜೋಡಿ ವಿಕೆಟ್ ಉಳಿಸಿಕೊಳ್ಳಲು ಹೋಗಿ ನಿಧಾನಗತಿ ಆಟಕ್ಕೆ ಮೊರೆ ಹೋಗಿದ್ದರಿಂದ ರನ್​ರೇಟ್ ಪ್ರಮಾಣ ಕುಸಿಯಿತು.

ವಾರ್ನರ್​ 38 ಎಸೆತಗಳಲ್ಲಿ 2 ಸಿಕ್ಸರ್ಸ್​ ಹಾಗೂ 3 ಬೌಂಡರಿ ಸಹಿತ 48 ಹಾಗೂ ಮನೀಶ್ ಪಾಂಡೆ 44 ಎಸೆತಗಳಲ್ಲಿ 3 ಸಿಕ್ಸರ್ಸ್​ ಹಾಗೂ 2 ಬೌಡರಿ ಸಹಿತ 54 ರನ್​ಗಳಿಸಿ ಉನಾದ್ಕಟ್​ಗೆ ವಿಕೆಟ್​ ಒಪ್ಪಿಸಿದರು.

ಕೊನೆಯ ಎರಡು ಓವರ್​ಗಳಲ್ಲಿ ಅಬ್ಬರಿಸಿದ ವಿಲಿಯಮ್ಸನ್​ 12 ಎಸೆತಗಳಲ್ಲಿ 22, ಪ್ರಿಯಮ್ ಗರ್ಗ್​ 8 ಎಸೆತಗಳಲ್ಲಿ ತಲಾ ಒಂದು ಬೌಂಡರಿ ಹಾಗೂ ಸಿಕ್ಸರ್​ ಸಹಿತ 15 ರನ್​ಗಳಿಸಿ ತಂಡದ ಮೊತ್ತವನ್ನು 150ರ ಗಡಿದಾಟಿಸಿದರು.

ರಾಜಸ್ಥಾನ್ ಪರ ಆರ್ಚರ್​ 25ಕ್ಕೆ 1, ಕಾರ್ತಿಕ್ ತ್ಯಾಗಿ 29ಕ್ಕೆ 1, ಉನಾದ್ಕಟ್​ 31ಕ್ಕೆ 1 ವಿಕೆಟ್ ಪಡೆದರು.