ಶಾರ್ಜಾ:ಎಲ್ಲಾ ವಿಭಾಗದಲ್ಲೂ ಸಂಘಟಿತ ಪ್ರದರ್ಶನ ನೀಡಿದ ರಾಜಸ್ಥಾನ್ ರಾಯಲ್ಸ್ ತಂಡವು 3 ಬಾರಿಯ ಚಾಂಪಿಯನ್ಸ್ ಚೆನ್ನೈ ಸೂಪರ್ ಕಿಂಗ್ಸ್ಗೆ 16 ರನ್ಗಳ ಸೋಲುಣಿಸಿದೆ.
ರಾಜಸ್ಥಾನ್ ನೀಡಿದ 217 ರನ್ಗಳ ಬೃಹತ್ ಟಾರ್ಗೆಟ್ ಬೆನ್ನತ್ತಿದ ಎಂ.ಎಸ್.ಧೋನಿ ಪಡೆ ಉತ್ತಮ ಆರಂಭ ಪಡೆದರೂ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್ಮನ್ಗಳು ವಿಫಲರಾದರು. ಆರಂಭಿಕರಾದ ವಾಟ್ಸನ್ (33) ಹಾಗೂ ವಿಜಯ್ (21) 56 ರನ್ಗಳ ಜೊತೆಯಾಟ ನೀಡುವ ಮೂಲಕ ರಾಜಸ್ಥಾನ್ ತಂಡಕ್ಕೆ ತಿರುಗೇಟು ನೀಡುವ ಮುನ್ಸೂಚನೆ ಕಂಡುಬಂದಿತ್ತು. ಆದರೆ ಈ ವೇಳೆ ಬೌಲಿಂಗ್ ದಾಳಿಗಿಳಿದ ರಾಹುಲ್ ತೆವಾಟಿಯಾ 21 ಎಸೆತಗಳಲ್ಲಿ 4 ಸಿಕ್ಸರ್ ಹಾಗೂ 1 ಬೌಂಡರಿ ಸಿಡಿಸಿದ್ದ ವಾಟ್ಸನ್ ವಿಕೆಟ್ ಪಡೆದು ಜೊತೆಯಾಟ ಬ್ರೇಕ್ ಮಾಡಿದರು. ಇವರ ಬೆನ್ನಲ್ಲೇ ವಿಜಯ್ ಕೂಡ ಗೋಪಾಲ್ ಬೌಲಿಂಗ್ನಲ್ಲಿ ಟಾಮ್ ಕರನ್ಗೆ ಕ್ಯಾಚ್ ನೀಡಿ ಔಟಾದರು.
ನಂತರ 4ನೇ ಕ್ರಮಾಂಕಕ್ಕೆ ಬಡ್ತಿ ಪಡೆದು ಬಂದ ಸ್ಯಾಮ್ ಕರನ್ 6 ಎಸೆತಗಳಲ್ಲಿ 17 ರನ್ ಗಳಿಸಿ ತೆವಾಟಿಯಾ ಬೌಲಿಂಗ್ನಲ್ಲಿ ಸ್ಟಂಪ್ ಔಟ್‌ಆದರು. ಅದೇ ಓವರ್ನಲ್ಲಿ ಇಂದೇ ಮೊದಲ ಪಂದ್ಯವನ್ನಾಡಿದ ಋತುರಾಜ್ ಗಾಯಕ್ವಾಡ್ ಕೂಡ ಸ್ಟಂಪ್ ಔಟ್ ಆದರು.
ಹೀಗೆ 77 ರನ್ಗೆ 4 ವಿಕೆಟ್ ಕಳೆದುಕೊಂಡಿದ್ದಾಗ ಪ್ಲೆಸಿಸ್ ಜೊತೆಗೂಡಿದ ಕೇದಾರ್ ಜಾಧವ್ 5ನೇ ವಿಕೆಟ್ಗೆ 37 ರನ್ಗಳ ಸೇರಿಸಿದರು. ಈ ಸಂದರ್ಭದಲ್ಲಿ 22 ರನ್ ಗಳಿಸಿದ್ದ ಜಾಧವ್ ಟಾಮ್ ಕರನ್ ಬೌಲಿಂಗ್ನಲ್ಲಿ ಸಾಮ್ಸನ್ಗೆ ಕ್ಯಾಚ್ ನೀಡಿ ಔಟಾದರು.
ನಿಧಾನಗತಿ ಆಟಕ್ಕೆ ಮೊರೆ ಹೋಗಿದ್ದ ಪ್ಲೆಸಿಸ್ ನಂತರ ಗೇರ್ ಬದಲಿಸಿದರಾದರೂ ಅಷ್ಟರಲ್ಲಿ ಪಂದ್ಯ ಕೈ ಜಾರಿ ಹೋಗಿತ್ತು. ಅವರು 37 ಎಸೆತಗಳಲ್ಲಿ 7 ಸಿಕ್ಸರ್ ಹಾಗೂ ಒಂದು ಬೌಂಡರಿ ಸಹಿತ 72 ರನ್ ಗಳಿಸಿ ಔಟಾದರು. ಧೋನಿ ಸೆಟ್ಲ್ ಆಗಲು ಹೆಚ್ಚು ಎಸೆತಗಳನ್ನು ತೆಗೆದುಕೊಂಡಿದ್ದು ಸಹ ಚೆನ್ನೈ ಸೋಲಿಗೆ ಕಾರಣವಾಯಿತು. ಕೊನೆಯ ಓವರ್ನಲ್ಲಿ 3 ಸಿಕ್ಸರ್ ಸಿಡಿಸಿ, 17 ಎಸೆತಗಳಲ್ಲಿ 29 ರನ್ ಬಾರಿಸಿದ ಎಂಎಸ್ಡಿ ತಂಡವನ್ನು ಗೆಲುವಿನ ದಡ ಸೇರಿಸಲು ಸಾಧ್ಯವಾಗಲಿಲ್ಲ.
ಒಟ್ಟಾರೆ 20 ಓವರ್ಗಳಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ 6 ವಿಕೆಟ್ ಕಳೆದುಕೊಂಡು 200 ರನ್ ಗಳಿಸಷ್ಟೇ ಶಕ್ತವಾಗಿ 16 ರನ್ಗಳ ಸೋಲು ಕಂಡಿತು. ತೆವಾಟಿಯಾ 3, ಆರ್ಚರ್, ಟಾಮ್ ಕರ್ರನ್ ಹಾಗೂ ಶ್ರೇಯಸ್ ಗೋಪಾಲ್ ತಲಾ ಒಂದು ವಿಕೆಟ್ ಪಡೆದರು.
ಇದಕ್ಕೂ ಮೊದಲು ಬ್ಯಾಟಿಂಗ್ ನಡೆಸಿದ್ದ ರಾಜಸ್ಥಾನ್ ರಾಯಲ್ಸ್, ಸಂಜು ಸಾಮ್ಸನ್ 74 (32ಎಸೆತ), ಸ್ಟಿವ್ ಸ್ಮಿತ್ 69 (47) ಹಾಗೂ ಆರ್ಚರ್ 27 (8 ಎಸೆತ) ರನ್ ನೆರವಿನಿಂದ 216 ರನ್ ಪೇರಿಸಿತ್ತು.
