ಡೆಲ್ಲಿ ವಿರುದ್ಧ ಹೈದರಾಬಾದ್​ ತಂಡಕ್ಕೆ 88 ರನ್​ಗಳ ಭರ್ಜರಿ ಜಯ, ಪ್ಲೇ ಆಫ್ ಆಸೆ ಜೀವಂತ

ಸನ್​ರೈಸರ್ಸ್ ಹೈದರಾಬಾದ್​ ನೀಡಿದ್ದ 220 ರನ್​ಗಳ ಬೃಹತ್ ಗುರಿ ಬೆನ್ನತ್ತಿದ ಡೆಲ್ಲಿ ಕ್ಯಾಪಿಟಲ್ಸ್ 19 ಓವರ್​ಗಳಲ್ಲಿ 131 ರನ್​ಗಳಿಗೆ ಸರ್ವಪತನ ಕಾಣುವ ಮೂಲಕ 88 ರನ್​ಗಳ ಅಂತರದ ಸೋಲು ಕಂಡಿದ್ದಲ್ಲದೆ ಅಂಕಪಟ್ಟಿಯಲ್ಲೂ ಎರಡನೇ ಸ್ಥಾನದಿಂದ 3ನೇ ಸ್ಥಾನಕ್ಕೆ ಕುಸಿದಿದೆ. ಇತ್ತ ಸನ್​ರೈಸರ್ಸ್ ಹೈದರಾಬಾದ್​ ಉತ್ತಮ ರನ್​ರೇಟ್​ ಪಡೆದರೂ 6ನೇ ಸ್ಥಾನದಲ್ಲೇ ಮುಂದುವರಿದಿದೆ.

ದುಬೈ: ಅಸಾಧಾರಣ ಬೌಲಿಂಗ್ ಹಾಗೂ ಬ್ಯಾಟಿಂಗ್ ಪ್ರದರ್ಶನದ ಮೂಲಕ ಡೆಲ್ಲಿ ಕ್ಯಾಪಿಟಲ್ ವಿರುದ್ಧ 88 ರನ್​ಗಳ ಬೃಹತ್ ಜಯ ಸಾಧಿಸಿದ ಸನ್​ರೈಸರ್ಸ್​ ಹೈದರಾಬಾದ್ ತಂಡ ಪ್ಲೇ ಆಫ್​ ರೇಸ್​ಗೆ ಮರಳಿದೆ.

ಸನ್​ರೈಸರ್ಸ್ ಹೈದರಾಬಾದ್​ ನೀಡಿದ್ದ 220 ರನ್​ಗಳ ಬೃಹತ್ ಮೊತ್ತವನ್ನು ಬೆನ್ನತ್ತಿದ ಡೆಲ್ಲಿ ಕ್ಯಾಪಿಟಲ್ಸ್ 19 ಓವರ್​ಗಳಲ್ಲಿ 131 ರನ್​ಗಳಿಗೆ ಸರ್ವಪತನ ಕಾಣುವ ಮೂಲಕ 88 ರನ್​ಗಳ ಅಂತರದ ಸೋಲು ಕಂಡಿದ್ದಲ್ಲದೆ ಅಂಕಪಟ್ಟಿಯಲ್ಲೂ ಎರಡನೇ ಸ್ಥಾನದಿಂದ 3ನೇ ಸ್ಥಾನಕ್ಕೆ ಕುಸಿದಿದೆ. ಇತ್ತ ಸನ್​ರೈಸರ್ಸ್ ಹೈದರಾಬಾದ್​ ಉತ್ತಮ ರನ್​ರೇಟ್​ ಪಡೆದರೂ 6ನೇ ಸ್ಥಾನದಲ್ಲೇ ಮುಂದುವರಿದಿದೆ.

220 ರನ್​ಗಳ ಬೃಹತ್ ಮೊತ್ತ ಬೆನ್ನತ್ತಿದ ಡೆಲ್ಲಿ ತಂಡ ಮೊದಲ ಓವರ್​ನಲ್ಲೇ ಶಿಖರ್ ಧವನ್​(0) ವಿಕೆಟ್ ಕಳೆದುಕೊಂಡಿತು. ನಂತರ 3ನೇ ಕ್ರಮಾಂಕದಲ್ಲಿ ಬಡ್ತಿ ಪಡೆದು ಬಂದಿದ್ದ ಮಾರ್ಕಸ್ ಸ್ಟೊಯ್ನಿಸ್​, ನದೀಮ್ ಬೌಲಿಂಗ್​ನಲ್ಲಿ ಕ್ಯಾಚ್ ಔಟ್ ಆದರು. ನಂತರ ರಹಾನೆ(26) ಹಾಗೂ ಹೆಟ್ಮೈರ್​(16) ರನ್ನ ರಶೀದ್ ಖಾನ್​ ಪೆವಿಲಿಯನ್​ಗಟ್ಟಿದರು.

ಇವರಿಬ್ಬರ ನಂತರ ನಿರಂತರ ವಿಕೆಟ್ ಕಳೆದುಕೊಂಡ ಡೆಲ್ಲಿ, 131ಕ್ಕೆ ಆಲೌಟ್ ಆಯಿತು. ಪಂತ್ 36 ರನ್​ಗಳಿಸಿ ಗರಿಷ್ಠ ಸ್ಕೋರರ್​ ಆದರು. ಅಯ್ಯರ್​ 7, ಅಕ್ಷರ್ 1, ರಬಾಡ 3, ಅಶ್ವಿನ್ 7, ನೋಕಿಯಾ 1 ರನ್​ಗೆ ವಿಕೆಟ್​ ಒಪ್ಪಿಸಿದರು.

ಹೈದರಾಬಾದ್​ ತಂಡದ ಪರ ಅದ್ಭುತ ಬೌಲಿಂಗ್ ಪ್ರದರ್ಶನ ತೋರಿದ ರಶೀದ್ ಖಾನ್​ 4 ಓವರ್​ಗಳಲ್ಲಿ 7 ರನ್​ ನೀಡಿ 3 ವಿಕೆಟ್​, ನಟರಾಜನ್ 26ಕ್ಕೆ 2, ಸಂದೀಪ್ ಶರ್ಮಾ 27ಕ್ಕೆ 2, ನದೀಮ್,ಹೋಲ್ಡರ್, ವಿಜಯ್ ಶಂಕರ್ ತಲಾ ಒಂದು ವಿಕೆಟ್ ಪಡೆದು ಮಿಂಚಿದರು.

ಇದಕ್ಕೂ ಮೊದಲು ಬ್ಯಾಟಿಂಗ್ ನಡೆಸಿದ ಹೈದರಾಬಾದ್ ತಂಡ ವಾರ್ನರ್​(55) ಹಾಗೂ ವೃದ್ಧಿಮಾನ್ ಸಹಾ(87) ಸ್ಫೋಟಕ ಅರ್ಧಶತಕ ಹಾಗೂ ಮನೀಶ್ ಪಾಂಡೆ ಅವರ 44 ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 2 ವಿಕೆಟ್​ ಕಳೆದುಕೊಂಡು 219 ರನ್​ಗಳಿಸಿತ್ತು.