ನನಗೆ ಕೊರೊನಾ ಇದೆ ಎಂದು ಹಬ್ಬಿರುವ ಸುದ್ದಿ ಸುಳ್ಳು ಎಂದ ಗಂಗೂಲಿ ಸಹೋದರ!

ನನಗೆ ಕೊರೊನಾ ವೈರಸ್​ ಹರಡಿದೆ ಎಂದು ಹರಿದಾಡುತ್ತಿರುವ ಸುದ್ದಿ ಸತ್ಯಕ್ಕೆ ದೂರವಾದದ್ದು ಎಂದು ಗಂಗೂಲಿ ಸಹೋದರ ಸ್ನೇಹಶಿಶ್​ ಸ್ಪಷ್ಟನೆ ನೀಡಿದ್ದಾರೆ.

ಕೋಲ್ಕತ್ತಾ:ಬಂಗಾಳ ಕ್ರಿಕೆಟ್​ ಸಂಸ್ಥೆಯ(ಸಿಎಬಿ) ಕಾರ್ಯದರ್ಶಿಯಾಗಿರುವ ಸೌರವ್​ ಗಂಗೂಲಿ ಸಹೋದರ ಸ್ನೇಹಶಿಶ್​ ಗಂಗೂಲಿ ಅವರಿಗೆ ಕೊರೊನಾ ವೈರಸ್​​ ತಗುಲಿದೆ ಎಂಬ ಸುದ್ದಿ ಹರಡಿತ್ತು. ಅದಕ್ಕೆ ಖುದ್ದಾಗಿ ಅವರೇ ಸ್ಪಷ್ಟನೆ ನೀಡಿದ್ದಾರೆ.

ನನಗೆ ಕೊರೊನಾ ವೈರಸ್​ ಹಬ್ಬಿದೆ ಎಂದು ಮಾಧ್ಯಮಗಳಲ್ಲಿ ಸುಳ್ಳು ಸುದ್ದಿ ಬಿತ್ತರಗೊಳ್ಳುತ್ತಿದ್ದು, ಅದು ಸತ್ಯಕ್ಕೆ ದೂರವಾದ ಮಾತು. ನಾನು ಸಂಪೂರ್ಣವಾಗಿ ಫಿಟ್​ ಆಗಿರುವೆ ಎಂದಿದ್ದಾರೆ. ಸ್ನೇಹಶಿಶ್​ ಗಂಗೂಲಿ ಅವರ ಪತ್ನಿಗೆ ಕೋವಿಡ್​-19 ಇರುವುದು ಖಚಿತಗೊಂಡಿದೆ ಎಂದು ಪಶ್ಚಿಮ ಬಂಗಾಳದ ಆರೋಗ್ಯ ಇಲಾಖೆ ಹಿರಿಯ ಅಧಿಕಾರಿ ಈಗಾಗಲೇ ಮಾಹಿತಿ ನೀಡಿದ್ದಾರೆ.

ಈ ಹಿಂದೆ ಸ್ನೇಹಶಿಶ್​ ಅವರ ಅತ್ತೆ-ಮಾವ ಹಾಗೂ ಅವರ ಮನೆಯಲ್ಲಿದ್ದ ಕೆಲಸದವರಿಗೆ ಕೊರೊನಾ ಸೋಂಕು ತಗುಲಿರುವುದು ಖಚಿತಗೊಂಡಿದ್ದು, ಅವರಿಗೆ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ಇನ್ನು ಮಾಜಿ ರಣಜಿ ಕ್ರಿಕೆಟಿಗರಾಗಿರುವ ಸ್ನೇಹಶಿಶ್​ ಅವರಿಗೆ ಕೋವಿಡ್​ ಪರೀಕ್ಷೆಯಲ್ಲಿ ನೆಗೆಟಿವ್​ ವರದಿ ಬಂದಿರುವ ಕಾರಣ ಮನೆಯಲ್ಲೇ ಪ್ರತ್ಯೇಕವಾಗಿರಲು ಸೂಚಿಸಲಾಗಿದೆ ಎಂದು ಹಿರಿಯ ಅಧಿಕಾರಿ ತಿಳಿಸಿದ್ದಾರೆ.