ಐಪಿಎಲ್​ನಲ್ಲಿ ಚೀನಾ ಮೊಬೈಲ್​ ಕಂಪನಿಯ ಪ್ರಾಯೋಜಕತ್ವ ಮುಂದುವರಿಕೆ.. ಓಮರ್​ ಅಬ್ದುಲ್ಲಾ ಕಿಡಿ

ಮತ್ತೊಂದು ಟ್ವೀಟ್​ನಲ್ಲಿ ಬಿಸಿಸಿಐ ಆಡಳಿತ ಮಂಡಳಿ ಚೀನಾದ ಪ್ರಾಯೋಜಕತ್ವವನ್ನು ಮುಂದುವರಿಸಲು ಬಯಸಿದೆ. ಆದರೆ, ಚೀನಾ ವಸ್ತುಗಳನ್ನು ಬಹಿಷ್ಕರಿಸುವ ಅಭಿಯಾನದಲ್ಲಿ ಚೀನಾದ ಟಿವಿಗಳನ್ನು ತಮ್ಮ ಬಾಲ್ಕನಿಯಿಂದ ಎಸೆದ ಮೂರ್ಖರನ್ನು ನೆನೆದರೆ ನನಗೆ ದುಃಖವಾಗುತ್ತಿದೆ..

ಶ್ರೀನಗರ : ಲಡಾಖ್‌ ಘರ್ಷಣೆಯ ನಂತರ ದೇಶದಲ್ಲಿ ಚೈನಾ ವಸ್ತುಗಳನ್ನು ಬಹಿಷ್ಕರಿಸಬೇಕು ಎಂಬ ಅಭಿಯಾನ ನಡೆಯುತ್ತಿದ್ರೆ, ಇತ್ತ ಬಿಸಿಸಿಐ ಐಪಿಎಲ್​ನಲ್ಲಿ ಚೀನಾದ ಪ್ರಾಯೋಜಕತ್ವವನ್ನು ಮುಂದುವರಿಸಿರುವುದಕ್ಕೆ ಜಮ್ಮು-ಕಾಶ್ಮೀರ ಮಾಜಿ ಮುಖ್ಯಮಂತ್ರಿ ಓಮರ್​ ಅಬ್ದುಲ್ಲಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

"ಚೀನಾ ವಸ್ತುಗಳನ್ನು ಬಹಿಷ್ಕರಿಸೋಣ ಎಂದು ಜನರಿಗೆ ಹೇಳುತ್ತಿದ್ರೆ, ಮತ್ತೊಂದು ಕಡೆ ಐಪಿಎಲ್​ ಚೀನಾದ ಮೊಬೈಲ್‌ ಕಂಪನಿಯ ಪ್ರಾಯೋಜಕತ್ವವನ್ನು ಮುಂದುವರಿಸಲು ಬಯಸಿದೆ. ಚೀನಾವನ್ನು ನಿಯಂತ್ರಿಸುವುದು ಹೇಗೆ ಎಂಬ ಗೊಂದಲದ್ದಲ್ಲಿದ್ದೇವೆ. ಪರಿಸ್ಥಿರಿ ಹೀಗಿರುವಾಗ ಚೀನಾ ನಮ್ಮನ್ನು ಅಪಹಾಸ್ಯ ಮಾಡುವುದರಲ್ಲಿ ಆಶ್ಚರ್ಯವೇನಿಲ್ಲ" ಎಂದು ಓಮರ್​ ಕಿಡಿಕಾರಿದ್ದಾರೆ.

ಮತ್ತೊಂದು ಟ್ವೀಟ್​ನಲ್ಲಿ ಬಿಸಿಸಿಐ ಆಡಳಿತ ಮಂಡಳಿ ಚೀನಾದ ಪ್ರಾಯೋಜಕತ್ವವನ್ನು ಮುಂದುವರಿಸಲು ಬಯಸಿದೆ. ಆದರೆ, ಚೀನಾ ವಸ್ತುಗಳನ್ನು ಬಹಿಷ್ಕರಿಸುವ ಅಭಿಯಾನದಲ್ಲಿ ಚೀನಾದ ಟಿವಿಗಳನ್ನು ತಮ್ಮ ಬಾಲ್ಕನಿಯಿಂದ ಎಸೆದ ಮೂರ್ಖರನ್ನು ನೆನೆದರೆ ನನಗೆ ದುಃಖವಾಗುತ್ತಿದೆ ಎಂದು ಬರೆದುಕೊಂಡಿದ್ದಾರೆ.

ಚೀನಾದ ವಿವೋ ಕಂಪನಿ ಐಪಿಎಲ್​ ಶೀರ್ಷಿಕೆ ಪ್ರಾಯೋಜಕತ್ವದ ಹಕ್ಕನ್ನು ಪಡೆದುಕೊಂಡಿದೆ. ಬಿಸಿಸಿಐ ವಾರ್ಷಿಕವಾಗಿ ಈ ಒಪ್ಪಂದದಿಂದ 440 ಕೋಟಿ ರೂ. ಆದಾಯ ಗಳಿಸುತ್ತಿದೆ. ಇದೀಗ ಈ ತಕ್ಷಣ ಇರುವ ಕಡಿಮೆ ಸಮಯದಲ್ಲಿ ಹೊಸ ಪ್ರಾಯೋಜಕರು ಸಿಗುವುದು ಕಷ್ಟವಾದ್ದರಿಂದ ತಾವು ಚೀನಾ ಕಂಪನಿಯ ಪ್ರಾಯೋಜಕತ್ವವನ್ನು ಮುಂದುವರಿಸುವುದಾಗಿ ಹೇಳಿಕೊಂಡಿದೆ.