ಭಾರತಕ್ಕೆ ಪಂತ್​- ಅಯ್ಯರ್​ ಅರ್ಧಶತಕದಾಸರೆ... ವಿಂಡೀಸ್​ಗೆ 289 ರನ್​ಗಳ ಟಾರ್ಗೆಟ್​ ನೀಡಿದ ಕೊಹ್ಲಿ ಟೀಮ್​

ಭಾರತ ತಂಡ ವೆಸ್ಟ್​ ಇಂಡೀಸ್​ ವಿರುದ್ಧ ಶ್ರೇಯಸ್​ ಅಯ್ಯರ್​ ಹಾಗೂ ರಿಷಭ್​ ಪಂತ್ ಸಿಡಿಸಿದ ಅರ್ಧಶತಕದ ನೆರವಿನಿಂದ 288 ರನ್​ಗಳಿಸಿದೆ.

ಚೆನ್ನೈ: ಭಾರತ ತಂಡದ ಆದಾರ ಸ್ಥಂಭಗಳಾದ ರೋಹಿತ್​ ಶರ್ಮಾ ಹಾಗೂ ಕೊಹ್ಲಿ ವಿಕೆಟ್​ ಕಳೆದುಕೊಂಡರೂ ಯುವ ಆಟಗಾರರಾದ ಶ್ರೇಯಸ್​ ಅಯ್ಯರ್​ ಹಾಗೂ ರಿಷಭ್​ ಪಂತ್ ಸಿಡಿಸಿದ ಅರ್ಧಶತಕದ ನೆರವಿನಿಂದ ಭಾರತ ತಂಡ 288 ರನ್​ಗಳ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಿದೆ.

ಟಾಸ್​ ಸೋತು ಬ್ಯಾಟಿಂಗ್​ ಆರಂಭಿಸಿದ ಭಾರತ ತಂಡಕ್ಕೆ ಆರಂಭಿಕರಾಗಿ ಕಣಕ್ಕಿಳಿದಿದ್ದ ರಾಹುಲ್​ ಕೇವಲ 6 ರನ್​ಗಳಿಗೆ ವಿಕೆಟ್​ ಒಪ್ಪಿಸಿದರೆ, ಅದೇ​ ಓವರ್​ನಲ್ಲಿ ಕೊಹ್ಲಿಯೂ ಕೂಡ 4 ರನ್​ಗಳಿಸಿ ಕಾಟ್ರೆಲ್​ ಎಸೆದ ಅದ್ಭುತ ಎಸೆತವನ್ನು ಗುರುತಿಸುವಲ್ಲಿ ವಿಫಲವಾಗಿ ಕ್ಲೀನ್​ ಬೌಲ್ಡ್​ ಆದರು.

ಈ ಹಂತದಲ್ಲಿ ತಾಳ್ಮೆಗೆ ಒತ್ತು ನೀಡಿದ ಉಪನಾಯಕ ರೋಹಿತ್​ ಶರ್ಮಾ ಯುವ ಬ್ಯಾಟ್ಸ್​ಮನ್​ ಶ್ರೇಯಸ್​ ಅಯ್ಯರ್​ ಜೊತೆಗೂಡಿ 65 ರನ್​ಗಳ ಜೊತೆಯಾಟ ನಡೆಸಿದರು. 56 ಎಸೆತಗಳಲ್ಲಿ 6 ಬೌಂಡರಿ ಸಹಿತ 36 ರನ್​ಗಳಿಸಿದ್ದ ರೋಹಿತ್​ ಶರ್ಮಾ ಅಲ್ಜಾರಿ ಜೋಸೆಪ್​ ಬೌಲಿಂಗ್​ನಲ್ಲಿ ಪೊಲಾರ್ಡ್​ಗೆ ಕ್ಯಾಚ್​ ನೀಡಿ ಪೆವಿಲಿಯನ್​ ಸೇರಿಕೊಂಡರು.

ರೋಹಿತ್​ ವಿಕೆಟ್​ ಪತನದ ನಂತರ ಕ್ರೀಸ್ಗೆ ಬಂದ ಪಂತ್​ ಐಪಿಎಲ್​ ತಂಡದ ಸಹ ಆಟಗಾರ ಅಯ್ಯರ್​ ಜೊತೆಗೂಡಿ ಅದ್ಭುತ ಬ್ಯಾಟಿಂಗ್​ ನಡೆಸಿ 4ನೇ ವಿಕೆಟ್​ಗೆ 114 ರನ್​ ಸೇರಿಸಿದರು. ಅಯ್ಯರ್​ 88 ಎಸೆತಗಳಲ್ಲಿ ಒಂದು ಸಿಕ್ಸರ್​ ಹಾಗೂ 5 ಬೌಂಡರಿ ಸಹಿತ 70 ರನ್​ಗಳಿಸಿ ಜೋಸೆಫ್​ಗೆ ವಿಕೆಟ್​ ಒಪ್ಪಿಸಿದರು. ಪಂತ್​ 69 ಎಸೆತಗಳಲ್ಲಿ 1 ಸಿಕ್ಸರ್​ ,7 ಬೌಂಡರಿ ಸಹಾಯದಿಂದ 71 ರನ್​ಗಳಿಸಿ ಪೊಲಾರ್ಡ್​ಗೆ ವಿಕೆಟ್​ ಒಪ್ಪಿಸಿದರು.

ಗಾಯದಿಂದ ಚೇತರಿಸಿಕೊಂಡು ತಂಡ ಸೇರಿಕೊಂಡಿರುವ ಕೇದಾರ್​ ಜಾದವ್​ 35 ಎಸೆತಗಳಲ್ಲಿ 40, ಜಡೇಜಾ 21 ಎಸೆತಗಳಲ್ಲಿ 21 ರನ್​ಗಳಿಸಿ ತಂಡದ ಮೊತ್ತವನ್ನು 250ರ ಗಡಿ ದಾಟಿಸಿದರು. ದುಬೆ 9, ಚಹಾರ್ 4,ಶಮಿ 2 ರನ್​ಗಳಿಸಿದರು.

ವಿಂಡೀಸ್​ ಪರ ಶೆಲ್ಡಾನ್ ಕಾಟ್ರೆಲ್​ 2, ಕೀಮೊ ಪಾಲ್​ 2, ಅಲ್ಜಾರಿ ಜೋಸೆಪ್​ 2 ಹಾಗೂ ಪೊಲಾರ್ಡ್​ ಒಂದು ವಿಕೆಟ್​ ಪಡೆದರು.