ಐಪಿಎಲ್​ ಅಷ್ಟೇ ಅಲ್ಲ, ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲೂ ಸೈ ಎನಿಸಿಕೊಂಡ ಹಳ್ಳಿಹೈದ ನಟ್ಟು

ಮೂರು ತಿಂಗಳ ಹಿಂದೆ ನಟರಾಜನ್​ ಯಾರೆಂದು ತಮಿಳುನಾಡಿನ ಕೆಲವರಿಗೆ ಬಿಟ್ಟರೆ ಬೇರೆ ಯಾರಿಗೂ ತಿಳಿದಿರಲಿಲ್ಲ. ಆದರೆ ಐಪಿಎಲ್‌ನಲ್ಲಿ ಅವರು ನೀಡಿದ ಪ್ರದರ್ಶನ ಇಂದು ವಿಶ್ವಮಟ್ಟದಲ್ಲಿ ಯಾರ್ಕರ್​ ಕಿಂಗ್​ ಎಂಬ ಬಿರುದನ್ನು ತಂದುಕೊಟ್ಟಿದೆ. ಸ್ವತಃ ಆಸ್ಟ್ರೇಲಿಯಾ ಮಾಧ್ಯಮಗಳೇ ನಟರಾಜನ್​ ಅವರನ್ನು ಯಾರ್ಕರ್​ ಸ್ಪೆಷಲಿಸ್ಟ್​ ಎಂದು ಕರೆದಿವೆ.

ಸಿಡ್ನಿ: ಭಾರತದ ಬುಮ್ರಾ, ಮೊಹಮ್ಮದ್ ಶಮಿ ಹಾಗೂ ಆಸ್ಟ್ರೇಲಿಯಾದ ಮಿಚೆಲ್ ಸ್ಟಾರ್ಕ್​ ಅವರಂಥ ಅನುಭವಿ ಬೌಲರ್​ಗಳೇ ಬ್ಯಾಟ್ಸ್​ಮನ್​ಗಳೆದುರು ಸಾಕಷ್ಟು ರನ್​ ಬಿಟ್ಟುಕೊಟ್ಟು ಸಿಡ್ನಿ ಮೈದಾನದಲ್ಲಿ ವೈಫಲ್ಯ ಅನುಭವಿಸಿದ್ದಾರೆ. ಆದರೆ ಇದೇ ಕ್ರೀಡಾಂಗಣದಲ್ಲಿ ಕೇವಲ ಎರಡೇ ಎರಡು ಅಂತಾರಾಷ್ಟ್ರೀಯ ಪಂದ್ಯವನ್ನಾಡಿರುವ ನಟರಾಜನ್​ ಬ್ಯಾಟ್ಸ್​ಮನ್‌ಸ್ನೇಹಿ ಪಿಚ್​ನಲ್ಲಿ ಮಿಂಚು ಹರಿಸಿದ್ದಾರೆ. ಈ ಮೂಲಕ ವಿಶ್ವಕ್ರಿಕೆಟ್​ನಲ್ಲಿ ಕ್ರಿಕೆಟ್​ ಪಂಡಿತರಿಂದ ಮೆಚ್ಚುಗೆ ಗಳಿಸಿದ್ದಾರೆ.

ಭಾರತ ತಂಡದ ಯಾರ್ಕರ್​ ಕಿಂಗ್ ಎಂದೇ ಖ್ಯಾತರಾಗಿರುವ ಜಸ್ಪ್ರೀತ್ ಬುಮ್ರಾ ಸಿಡ್ನಿಯಲ್ಲಿ ನಡೆದಿದ್ದ ಏಕದಿನ ಪಂದ್ಯದಲ್ಲಿ 73 ಮತ್ತು 79, ಅನುಭವಿ ಮೊಹಮ್ಮದ್​ ಶಮಿ 59 ಮತ್ತು 73 ಹಾಗೂ ಆಸ್ಟ್ರೆಲಿಯಾದ ಸ್ಟಾರ್​ ಬೌಲರ್​ ಮಿಚೆಲ್ ಸ್ಟಾರ್ಕ್​ 65 ಮತ್ತು 82 ರನ್ ಬಿಟ್ಟುಕೊಟ್ಟು ದುಬಾರಿಯಾಗಿದ್ದರು.

ವಿಕೆಟ್ ಪಡೆದ ಸಂಭ್ರಮದಲ್ಲಿ ನಟರಾಜನ್​

ಅಷ್ಟೇ ಏಕೆ?, ಇಂದು ನಡೆಯುತ್ತಿರುವ 2ನೇ ಟಿ20 ಪಂದ್ಯದಲ್ಲಿ ಭಾರತದ ಎಲ್ಲಾ ಬೌಲರ್​ಗಳು 9ಕ್ಕಿಂತ ಹೆಚ್ಚಿನ ಎಕಾನಮಿಯಲ್ಲಿ ರನ್​ ಬಿಟ್ಟುಕೊಟ್ಟರೆ, ನಟರಾಜನ್​ ಮಾತ್ರ ಕೇವಲ 5ರ ಏಕಾನಮಿಯಲ್ಲಿ 20 ರನ್​ ಬಿಟ್ಟುಕೊಟ್ಟಿದ್ದಲ್ಲದೆ 2 ವಿಕೆಟ್ ಕೂಡ ಪಡೆದರು.

ಓದಿ: ಅಭ್ಯಾಸ ಪಂದ್ಯದಲ್ಲಿ ಸೊನ್ನೆ ಸುತ್ತಿದ ಪೃಥ್ವಿ ಶಾ- ಗಿಲ್​: ನಾಯಕ ರಹಾನೆ ಶತಕದಾಟ

ಮೂರು ತಿಂಗಳ ಹಿಂದೆ ನಟರಾಜನ್​ ಯಾರೆಂದು ತಮಿಳುನಾಡಿನ ಕೆಲವರಿಗೆ ಬಿಟ್ಟರೆ ಬೇರೆ ಯಾರಿಗೂ ತಿಳಿದಿರಲಿಲ್ಲ. ಆದರೆ ಐಪಿಎಲ್​ ಪಂದ್ಯಾವಳಿಗಳಲ್ಲಿ ಅವರು ನೀಡಿದ ಪ್ರದರ್ಶನ ಇಂದು ವಿಶ್ವಮಟ್ಟದಲ್ಲಿ ಯಾರ್ಕರ್​ ಕಿಂಗ್​ ಎಂಬ ಬಿರುದನ್ನು ಅವರಿಗೆ ತಂದು ಕೊಟ್ಟಿದೆ. ಸ್ವತಃ ಆಸ್ಟ್ರೇಲಿಯಾ ಮಾಧ್ಯಮಗಳೇ ನಟರಾಜನ್​ ಅವರನ್ನು ಯಾರ್ಕರ್​ ಸ್ಪೆಷಲಿಸ್ಟ್​ ಎಂದು ಕರೆದಿವೆ.

ನಟರಾಜನ್​ ಬೌಲಿಂಗ್​ ಬಗ್ಗೆ ಭಾರತದ ಮಾಜಿ ವೇಗಿ ಜಹೀರ್​ ಖಾನ್​ ಕೂಡ ಮೆಚ್ಚುಗೆ ವ್ಯಕ್ತಪಡಿಸಿದ್ದು," ತಂಡದಲ್ಲಿರುವ ಎಲ್ಲಾ ಬೌಲರ್​ಗಳು ರನ್​ ಬಿಟ್ಟುಕೊಡುವ ಸಂದರ್ಭದಲ್ಲಿ ಒಬ್ಬ ಬೌಲರ್​ ಬ್ಯಾಟ್ಸ್​ಮನ್​ಗಳ ವಿರುದ್ಧ ಹೋರಾಟ ನಡೆಸುವುದು ಸುಲಭ ಮಾತಲ್ಲ. ಆದರೆ ನಟರಾಜನ್​ ಸಂದಿಗ್ಧ ಸನ್ನಿವೇಶದಲ್ಲಿ ಬೌಲಿಂಗ್ ಮಾಡುವ ಕಲೆಯನ್ನು ಬಹುಬೇಗ ರೂಢಿಸಿಕೊಂಡಿದ್ದಾರೆ. ಇದು ಖಂಡಿತ ಭಾರತ ತಂಡಕ್ಕೆ ಹಾಗೂ ಅವರ ಭವಿಷ್ಯಕ್ಕೂ ಬಹುದೊಡ್ಡ ವಿಷಯ" ಎಂದು ಕ್ರಿಕ್​ಬಜ್​ ಜೊತೆಗಿನ ಸಂವಾದದಲ್ಲಿ ಅವರು ತಿಳಿಸಿದ್ದಾರೆ.

ಐಪಿಎಲ್‌ನಲ್ಲಿ ನಟರಾಜನ್ ಸಾಧನೆ:

ನಟರಾಜನ್​ ಐಪಿಎಲ್​ನಲ್ಲಿ 16 ಪಂದ್ಯಗಳಿಂದ 16 ವಿಕೆಟ್​ ಪಡೆದಿದ್ದರು. ಅವರು ಟೂರ್ನಿಯಲ್ಲಿ 166 ಯಾರ್ಕರ್​ ಬೌಲಿಂಗ್ ಮಾಡುವ ಮೂಲಕ ಗರಿಷ್ಠ ಯಾರ್ಕರ್​ ಎಸೆದ ಬೌಲರ್​ ಎಂಬ ಖ್ಯಾತಿಗೆ ಪಾತ್ರರಾಗಿದ್ದರು.

ಆಸ್ಟ್ರೇಲಿಯಾ ಪ್ರವಾಸಕ್ಕೆ ನೆಟ್​ ಬೌಲರ್​ ಆಗಿ ಪ್ರಯಾಣಿಸಿದ್ದ ನಟರಾಜನ್​ ನಂತರ ವರುಣ್​ ಚಕ್ರವರ್ತಿ ಗಾಯಗೊಂಡ ಕಾರಣ ಟಿ20 ತಂಡಕ್ಕೆ ಸೇರ್ಪಡೆಗೊಂಡಿದ್ದರು. ನಂತರ ಸೈನಿ ಗಾಯಗೊಂಡಿದ್ದರಿಂದ ಏಕದಿನ ಕ್ರಿಕೆಟ್​ಗೂ ಪದಾರ್ಪಣೆ ಮಾಡಿದ್ದರು.

ಏಕದಿನ ಪಂದ್ಯಗಳಲ್ಲಿ ಸಾಧನೆ:

ಏಕದಿನ ಪಂದ್ಯದಲ್ಲಿ ನಟರಾಜನ್‌ 70 ರನ್‌ಗಳಿಗೆ‌ 2 ವಿಕೆಟ್​ ಪಡೆದಿದ್ದರು. ಟಿ20 ಸರಣಿಯ ಮೊದಲ ಪಂದ್ಯದಲ್ಲಿ 30ಕ್ಕೆ 3 ವಿಕೆಟ್​ ಹಾಗೂ ಎರಡನೇ ಪಂದ್ಯದಲ್ಲಿ 20ಕ್ಕೆ 2 ವಿಕೆಟ್​ ಪಡೆದಿದ್ದಾರೆ.