ದುಬೈ:ಕ್ರಿಕೆಟ್ನಲ್ಲಿ ಅಂಬೆಗಾಲಿಡುತ್ತಿರುವ ನಮೀಬಿಯಾ ತನ್ನಂತೆಯೇ ಇರುವ ಓಮನ್ ತಂಡವನ್ನು 54 ರನ್ಗಳಿಂದ ಬಗ್ಗುಬಡಿದು 2020ರ ಟಿ20 ವಿಶ್ವಕಪ್ಗೆ ಅರ್ಹತೆಗಿಟ್ಟಿಸಿಕೊಂಡಿದೆ.
ಮಂಗಳವಾರ ನಡೆದ ಎರಡನೇ ಕ್ವಾಲಿಫೈಯರ್ ಪಂದ್ಯದಲ್ಲಿ ಓಮನ್ ವಿರುದ್ಧ ಮೊದಲು ಬ್ಯಾಟಿಂಗ್ ನಡೆಸಿ 161 ರನ್ಗಳಿಸಿತ್ತು. ನಮೀಬಿಯಾ ಪರ ಜೆಜೆ ಸ್ಮಿತ್ 25 ಎಸೆತಗಳಲ್ಲಿ 5 ಸಿಕ್ಸರ್ ಹಾಗೂ ಕ್ರೈಗ್ ವಿಲಿಯಮ್ಸ್ 41 ಎಸೆತಗಳಲ್ಲಿ 3 ಸಿಕ್ಸರ್ ಹಾಗೂ 2 ಬೌಂಡರಿ ನೆರವಿನಿಂದ 45 ರನ್ಗಳಿಸಿ ತಂಡವು ಸ್ಪರ್ಧಾತ್ಮಕ ಮೊತ್ತ ದಾಖಲಿಸಲು ನೆರವಾದರು.
162 ರನ್ಗಳ ಟಾರ್ಗೆಟ್ ಪಡೆದ ಓಮನ್ ತಂಡಕ್ಕೆ ಆರಂಭಿಕ ಕನ್ವರ್ ಅಲಿ 41 ರನ್ಗಳಿಸಿದ್ದು ಬಿಟ್ಟರೆ ಉಳಿದ ಯಾವೊಬ್ಬ ಬ್ಯಾಟ್ಸ್ಮನ್ 20ರ ಗಡಿದಾಟದೇ ಇರುವುದು ಸೋಲಿಗೆ ಕಾರಣವಾಯಿತು. ಒಟ್ಟಾರೆ 19.1 ಓವರ್ಗಳಲ್ಲಿ 107 ರನ್ಗಳಿಗೆ ಆಲೌಟ್ ಆಗುವ ಮೂಲಕ 54 ರನ್ಗಳ ಸೋಲನುಭವಿಸಿತು.
ನಮೀಬಿಯಾ ಪರ ನಾಯಕ ಗೆರ್ಹಾರ್ಡ್ ಎರಾಸ್ಮಸ್ 3, ಬೆರ್ನಾರ್ಡ್ ಸ್ಕಾಲ್ಟ್ಜ್ 3 ಜೆಜೆ ಸ್ಮಿತ್ 2 ಹಾಗೂ ಜಾನ್ ಫ್ರಿಲಿಂಕ್ ಹಾಗೂ ಕ್ರೈಗ್ ವಿಲಿಯಮ್ಸ್ ತಲಾ ಒಂದು ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.
ಈ ಗೆಲುವಿನ ಮೂಲಕ ವಿಶ್ವಕಪ್ ಕ್ವಾಲಿಫೈಯರ್ ಟೂರ್ನಿಯಲ್ಲಿ ಸೆಮಿಫೈನಲ್ ಪ್ರವೇಶಿಸಿದ ನಮೀಬಿಯಾ 2020ರ ವಿಶ್ವಕಪ್ ಅರ್ಹತೆ ಪಡೆದ 14 ನೇ ತಂಡ ಎನಿಸಿತು. ಈಗಾಲೆ ಐರ್ಲೆಂಡ್, ಪುಪುವಾ ನ್ಯೂಗೀನಿಯ, ನೆದರ್ಲೆಂಡ್ಸ್ ಅರ್ಹತೆ ಪಡೆದಿದ್ದವು.