'ಮುಂದೊಂದು ದಿನ ಲಾರಾ ದಾಖಲೆ ಬ್ರೇಕ್ ಮಾಡಲು ಮತ್ತೊಂದು ಅವಕಾಶ ಸಿಗಬಹುದು'

ಬಹುಶಃ ಮುಂದೊಂದು ದಿನ ಲಾರಾ ಅವರ 400 ರನ್​ಗಳ ದಾಖಲೆ ಪುಡಿಗಟ್ಟುವ ಅವಕಾಶ ದೊರಕಬಹುದು ಎಂದು ಆಸ್ಟ್ರೇಲಿಯಾ ಆಟಗಾರ ಡೇವಿಡ್ ವಾರ್ನರ್​ ಹೇಳಿದ್ದಾರೆ.

ಹೈದರಾಬಾದ್: ಅಂತಾರಾಷ್ಟ್ರೀಯ ಟೆಸ್ಟ್​ ಕ್ರಿಕೆಟ್​ನ ಇನ್ನಿಂಗ್ಸ್​​ವೊಂದರಲ್ಲಿ ಅತಿಹೆಚ್ಚು ರನ್​ ಸಿಡಿಸಿರುವ ವೆಸ್ಟ್​ ಇಂಡೀಸ್​ ಕ್ರಿಕೆಟ್ ದಿಗ್ಗಜ ಬ್ರಿಯಾನ್ ಲಾರಾ(400) ದಾಖಲೆ ಮುರಿಯುವ ಅವಕಾಶ ಸಿಗಬಹುದು ಎಂದು ಆಸೀಸ್ ತಂಡದ ಸ್ಫೋಟಕ ಬ್ಯಾಟ್ಸ್‌ಮನ್‌ ಡೇವಿಡ್ ವಾರ್ನರ್​ ಹೇಳಿದ್ರು.

ಪಾಕಿಸ್ತಾನದ ವಿರುದ್ಧ ನಡೆದ ದ್ವಿತೀಯ ಟೆಸ್ಟ್​ ಪಂದ್ಯದಲ್ಲಿ ಅಬ್ಬರಿಸಿದ್ದ ವಾರ್ನರ್​ 335 ರನ್​ ಗಳಿಸಿ ಔಟ್​ ಆಗದೆ ಕ್ರಿಸ್‌ನಲ್ಲಿ ಉಳಿದಿದ್ದರು. ತಂಡದ ನಾಯಕ ಟಿಮ್ ಪೇನ್ ಇನ್ನಿಂಗ್ಸ್​ ಡಿಕ್ಲೇರ್​ ಮಾಡಿಕೊಂಡಿದ್ದರಿಂದ ವಾರ್ನರ್​ಗೆ ಹೊಸ ಇತಿಹಾಸ ಸೃಷ್ಟಿಸಲು ಸಾಧ್ಯವಾಗಲಿಲ್ಲ.

ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಗಾಲ್ಫ್​ ಪಂದ್ಯದ ವೇಳೆ ಲಾರಾ ಮತ್ತು ವಾರ್ನರ್​ ಮುಖಾಮುಖಿಯಾಗಿದ್ದಾರೆ. ಈ ಬಗ್ಗೆ ಇನ್​ಸ್ಟಾಗ್ರಾಂನಲ್ಲಿ ಫೋಟೋ ಹಂಚಿಕೊಂಡಿರುವ ವಾರ್ನರ್​ 'ದಿಗ್ಗಜ ಲಾರಾ ಅವರನ್ನ ಭೇಟಿಯಾಗಿದ್ದು ಖುಷಿ ಕೊಟ್ಟಿದೆ. ಬಹುಶಃ ಮುಂದೊಂದು ದಿನ ಅವರ 400 ರನ್​ಗಳ ದಾಖಲೆ ಬ್ರೇಕ್ ಮಾಡುವ ಅವಕಾಶ ದೊರಕಬಹುದು' ಎಂದು ಬರೆದುಕೊಂಡಿದ್ದಾರೆ.

ಅದೇ ಫೋಟೋವನ್ನ ಹಂಚಿಕೊಂಡಿರುವ ಲಾರಾ '735 ನಾಟ್​ಔಟ್​' ಎಂದು ಬರೆದುಕೊಂಡಿದ್ದಾರೆ.