ನವದೆಹಲಿ:ವಿಶ್ವದ ಶ್ರೀಮಂತ ಟಿ20 ಲೀಗ್ ಆಗಿರುವ ಐಪಿಎಲ್ಗೆ ಇನ್ನು ಕೆಲವೇ ದಿನಗಳು ಬಾಕಿ ಉಳಿದಿವೆ. ಈಗಾಗಲೆ ಕೆಲವು ತಂಡಗಳು ಸಮರಭ್ಯಾಸ ಆರಂಭಿಸಿದ್ದು ಟ್ರೋಫಿ ಎತ್ತಿ ಹಿಡಿಯಲು ಹಾತೊರೆಯುತ್ತಿವೆ.
ಚೆನ್ನೈ ಸೂಪರ್ ಕಿಂಗ್ಸ್ ಪರ ಆಡಿರುವ ಆಸ್ಟ್ರೇಲಿಯಾದ ಮಾಜಿ ಬ್ಯಾಟ್ಸ್ಮನ್ ಮ್ಯಾಥ್ಯೂ ಹೇಡನ್ 2020ರ ಐಪಿಎಲ್ನಲ್ಲಿ ಬ್ಯಾಟ್ಸ್ಮನ್ಗಳಿಗೆ ತಲೆ ನೋವಾಗುವ ಮೂವರು ಬೌಲರ್ಗಳನ್ನು ಹೆಸರಿಸಿದ್ದಾರೆ. ಅದರಲ್ಲಿ ಇಬ್ಬರು ವೇಗದ ಬೌಲರ್ ಹಾಗೂ ಒಬ್ಬ ಸ್ಪಿನ್ನರ್ ಇದ್ದಾರೆ.
ಹೇಡನ್ ಪ್ರಕಾರ ಸನ್ರೈಸರ್ಸ್ ಹೈದರಾಬಾದ್ನ ಅನುಭವಿ ಬೌಲರ್ ಭುವನೇಶ್ವರ್ ಕುಮಾರ್, ಮುಂಬೈ ಇಂಡಿಯನ್ಸ್ನ ವೇಗಿ ಜಸ್ಪ್ರೀತ್ ಬುಮ್ರಾ ಹಾಗೂ ಚೆನ್ನೈ ಸೂಪರ್ ಕಿಂಗ್ಸ್ನ ಹರ್ಭಜನ್ ಸಿಂಗ್ 13ನೇ ಆವೃತ್ತಿಯ ಸ್ಟಾರ್ ಬೌಲರ್ಗಳಾಗಲಿದ್ದಾರೆ ಎಂದು ಆಸೀಸ್ ಸ್ಫೋಟಕ ಬ್ಯಾಟ್ಸ್ಮನ್ ಅಭಿಪ್ರಾಯ ಪಟ್ಟಿದ್ದಾರೆ.
ಸ್ವಿಂಗ್ ಸ್ಪೆಷಲಿಸ್ಟ್ ಆಗಿರುವ ಭುವನೇಶ್ವರ್ ಕುಮಾರ್ 2016 ಮತ್ತು 2017ರ ಐಪಿಎಲ್ನಲ್ಲಿ ಪರ್ಪಲ್ ಖ್ಯಾಪ್ ಪಡೆದಿದ್ದರು. ಅವರು ಕ್ರಮವಾಗಿ 23 ಮತ್ತು 26 ವಿಕೆಟ್ ಪಡೆದಿದ್ದರು.
ಇನ್ನು ಜಸ್ಪ್ರೀತ್ ಬುಮ್ರಾ ಭಾರತದ ಅಗ್ರಮಾನ್ಯ ಬೌಲರ್ ಆಗಿದ್ದು, ಅವರು ತಮ್ಮ ಯಾರ್ಕರ್ಗಳಿಂದ ಬ್ಯಾಟ್ಸ್ಮನ್ಸ್ಗಳನ್ನು ಕಾಡಲಿದ್ದಾರೆ. ಸ್ಪಿನ್ ವಿಭಾಗದಲ್ಲಿ ಹಳೆಯ ಆಟಗಾರರೇ ಮಿಂಚಲಿದ್ದಾರೆ. ಹರ್ಭಜನ್ ಸಿಂಗ್ ಸಾಕಷ್ಟು ಕ್ರಿಕೆಟ್ ಆಡದಿದ್ದರೂ ಅವರ ಅನುಭವ ಕೈ ಹಿಡಿಯಲಿದೆ. ಆಲ್ರೌಂಡರ್ ರವೀಂದ್ರ ಜಡೇಜಾ ಕೂಡ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾಗುತ್ತಾರೆ ಎಂದು ಹೇಡನ್ ಭವಿಷ್ಯ ನುಡಿದಿದ್ದಾರೆ.
