ಹೈದರಾಬಾದ್:ಆಸ್ಟ್ರೇಲಿಯಾ ವಿರುದ್ಧದ ಸರಣಿಯಲ್ಲಿ ಉತ್ತಮ ಪ್ರದರ್ಶನ ತೋರಲು ಈ ಹಿಂದೆ ಕೈಗೊಂಡಿದ್ದ ಇಂಡಿಯಾ ಎ ತಂಡದ ಪ್ರವಾಸಗಳು ತುಂಬಾ ನೆರವಾದವು ಎಂದು ಮೊಹಮ್ಮದ್ ಸಿರಾಜ್ ತಿಳಿಸದ್ದಾರೆ. ಜೊತೆಗೆ ಟೂರ್ನಿಯಲ್ಲಿ ಅತ್ಯಂತ ಯಶಸ್ವಿ ಬ್ಯಾಟ್ಸ್ಮನ್ ಆಗಿರುವ ಮಾರ್ನಸ್ ಲಾಬುಶೇನ್ ತಮ್ಮ ನೆಚ್ಚಿನ ವಿಕೆಟ್ ಎಂದು ತಿಳಿಸಿದ್ದಾರೆ.
ಟೂರ್ನಿಯಲ್ಲಿ ಅಷ್ಟೂ ವಿಕೆಟ್ಗಳಲ್ಲಿ ಮಾರ್ನಸ್ ಲಾಬುಶೇನ್ ನನ್ನ ನೆಚ್ಚಿನದ್ದಾಗಿದೆ. ಏಕೆಂದರೆ ಅದು ತಂಡಕ್ಕೆ ಅನಿವಾರ್ಯವಾಗಿದ್ದ ಸಂದರ್ಭದಲ್ಲಿ ಬಂದಿತ್ತು ಎಂದು ಮೊಹಮ್ಮದ್ ಸಮಿ ಬದಲು ತಂಡ ಸೇರಿಕೊಂಡಿದ್ದ ಸಿರಾಜ್ ಹೇಳಿದ್ದಾರೆ.
ಬ್ರಿಸ್ಬೇನ್ ಟೆಸ್ಟ್ನ 2ನೇ ಇನ್ನಿಂಗ್ಸ್ನಲ್ಲಿ ಸಿರಾಜ್, ಅದ್ಭುತ ಫಾರ್ಮ್ನಲ್ಲಿದ್ದ ಲಾಬುಶೇನ್ 25 ರನ್ಗಳಿಸಿದ್ದ ವೇಳೆ ಔಟ್ ಮಾಡಿದ್ದರು. ಮೊದಲ ಇನ್ನಿಂಗ್ಸ್ನಲ್ಲಿ ಶತಕ ಸಿಡಿಸಿ ಅಬ್ಬರಿಸಿದ್ದ ಅವರ ವಿಕೆಟ್ ತಂಡಕ್ಕೆ ಅಗತ್ಯವಿತ್ತು. ಸಿರಾಜ್ ಕೊನೆಗೂ ಲಾಬುಶೇನ್ ಜೊತೆಗೆ ಸ್ಟೀವ್ ಸ್ಮಿತ್ ವಿಕೆಟ್ ಪಡೆದು ಭಾರತದ ಗೆಲುವಿಗೆ ಪ್ರಮುಖ ಪಾತ್ರವಹಿಸಿದ್ದರು.
ಇನ್ನು ಗಾಯದಿಂದ ಮರಳಿದ್ದ ಡೇವಿಡ್ ವಾರ್ನರ್ರನ್ನು ಬ್ರಿಸ್ಬೇನ್ನಲ್ಲಿ ಮತ್ತು ಸಿಡ್ನಿಯಲ್ಲಿ ಸಿರಾಜ್ ಆರಂಭದ ಓವರ್ಗಳಲ್ಲೇ ಪೆವಿಲಿಯನ್ಗಟ್ಟಿದ್ದರು. ಆದರೆ ಇದರಲ್ಲಿ ವಿಶೇಷ ಯೋಜನೆ ಏನಿರಲಿಲ್ಲ ಎಂದು ತಿಳಿಸಿದ್ದಾರೆ.
"ಡೇವಿಡ್ ವಾರ್ನರ್ ವಿರುದ್ಧ ವಿಶೇಷವಾದ ಯೋಜನೆಯೇನು ಹೊಂದಿರಲಿಲ್ಲ. ಅವರಿಗೆ ಐಪಿಎಲ್ ವೇಳೆ ಪ್ರಯೋಗಿಸಿದ್ದ ಇನ್ಸ್ವಿಂಗ್ ಎಸೆತಗಳನ್ನು ಬಳಸಿದೆ. ಅಲ್ಲಿ ಚೆಂಡು ಸ್ವಿಂಗ್ ಆಗಿ ಹೊರ ಹೋಗುತ್ತಿರುವುದನ್ನು ಅವರು ಆಡುತ್ತಾರೆಂದು ತಿಳಿದಿದ್ದರಿಂದ, ಟೆಸ್ಟ್ ಪಂದ್ಯಗಳಲ್ಲೂ ಅದನ್ನೇ ಪುನರಾವರ್ತಿಸಿದೆ." ಎಂದು ಸಿರಾಜ್ ಹೇಳಿದ್ದಾರೆ.
ಆಸೀಸ್ ಪ್ರವಾಸದಲ್ಲಿ ಯಶಸ್ವಿಯಾಗಲು ಹೇಗೆ ಸಾಧ್ಯವಾಯಿತು ಎಂದು ಕೇಳಿದ್ದಕ್ಕೆ, ಇಡೀ ತಂಡ ನನ್ನ ಮೇಲೆ ಅಪಾರ ನಂಬಿಕೆ ತೋರಿಸಿತ್ತು. ಒತ್ತಡದಲ್ಲಿದ್ದಾಗ ನನ್ನ ಮೇಲೆ ನಾನು ನಂಬಿಕೆಯಿಟ್ಟಿದ್ದೆ. ತಂಡದಲ್ಲಿ ಹಲವಾರು ಗಾಯಗಳಾಗಿದ್ದರಿಂದ ನನ್ನನ್ನೇ ಬೌಲಿಂಗ್ ವಿಭಾಗದ ನಾಯಕ ಎಂದು ಎಲ್ಲರೂ ಹೇಳಿದ್ದರು. ಈ ಜವಾಬ್ದಾರಿ ನನ್ನನ್ನು ಉತ್ತಮ ಪ್ರದರ್ಶನ ತೋರುವಂತೆ ಮಾಡಿತು ಎಂದು ಅವರು ಮಾಧ್ಯಮ ಗೋಷ್ಠಿಯಲ್ಲಿ ತಿಳಿಸಿದ್ದಾರೆ.
ಬೌಲಿಂಗ್ ಯಶಸ್ವಿಯಾಗಲೂ ಈ ಹಿಂದೆ ಎ ತಂಡದಲ್ಲಿ ಆಡಿದ್ದು ಬಹಳ ನೆರವಾಯಿತು. ನಾನು ಈ ಪ್ರವಾಸದಲ್ಲಿ ಎ ತಂಡಕ್ಕಾಗಿ ಆಡುತ್ತಿದ್ದೇನೆ ಎಂದೇ ಭಾವಿಸಿದ್ದೆ. ಏಕೆಂದರೆ ಭಾರತ ಸೀನಿಯರ್ ತಂಡಕ್ಕೆ ಆಡುತ್ತಿದ್ದೇನೆ ಎಂದು ಆಲೋಚಿಸಿದರೆ ನಾನು ಖಂಡಿತ ಒತ್ತಡಕ್ಕೆ ಒಳಗಾಗುತ್ತಿದ್ದೆ ಎಂದು 26 ವರ್ಷದ ಬೌಲರ್ ಹೇಳಿದ್ದಾರೆ.
