ಮೆಲ್ಬೋರ್ನ್: ಆರ್ಥಿಕವಾಗಿ ತೀವ್ರ ಸಂಕಷ್ಟಕ್ಕೀಡಾಗಿರುವ ಕ್ರಿಕೆಟ್ ಆಸ್ಟ್ರೇಲಿಯಾ ಕೋವಿಡ್ 19 ಭೀತಿಯ ನಡುವೆಯೂ 10 ನೇ ಆವೃತ್ತಿಯ ಬಿಬಿಎಲ್ನ ವೇಳಾಪಟ್ಟಿ ಬಿಡುಗಡೆ ಮಾಡಿದೆ.
10 ತಂಡಗಳ ನಡುವೆ 2 ತಿಂಗಳ ಕಾಲ ನಡೆಯುವ ಟಿ-20 ಲೀಗ್ ಡಿಸೆಂಬರ್ 3 ರಂದು ಆರಂಭವಾಗಲಿದೆ. ಈ ವರ್ಷ ಕಳೆದ ಆವೃತ್ತಿಗಿಂತ ಎರಡು ವಾರ ಮುಂದಾಗಿ ಬಿಗ್ಬ್ಯಾಶ್ ಆರಂಭವಾಗುತ್ತಿದೆ. ಮೊದಲ ಪಂದ್ಯ ಅಡಿಲೇಡ್ ಸ್ಟ್ರೈಕರ್ಸ್ ಮತ್ತು ಮೆಲ್ಬೋರ್ನ್ ರೆನೆಗೇಡ್ಸ್ ನಡುವೆ ಆರಂಭವಾಗಲಿದೆ.
ಈಗಾಗಲೆ ನಿಗದಿಯಾಗಿರುವ ಪ್ರಕಾರ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಟೆಸ್ಟ್ ಸರಣಿ ಕೂಡ ಡಿಸೆಂಬರ್ 3ರಿಂದ ಬ್ರಿಸ್ಬೇನ್ನಲ್ಲಿ ಆರಂಭವಾಗಲಿದೆ. ಆದರೆ, ಬಿಸಿಸಿಐ ಈ ಸರಣಿಯನ್ನು ಒಂದು ವಾರಗಳ ಕಾಲ ಮುಂದೂಡಬೇಕೆಂದು ಕ್ರಿಕೆಟ್ ಆಸ್ಟ್ರೇಲಿಯಾ ಜೊತೆ ಮಾತನಾಡಲು ಬಯಸಿದೆ.
ಇನ್ನು ಕಳೆದ ವರ್ಷದಿಂದ ಪ್ರತ್ಯೇಕವಾಗಿ ನಡೆಯುತ್ತಿರುವ ಮಹಿಳಾ ಬಿಗ್ಬ್ಯಾಶ್ ಕೂಡ ಈ ವರ್ಷವೂ ಪುರುಷರ ಲೀಗ್ಗಿಂತಲೂ ಬೇಗ ಆರಂಭವಾಗಲಿದೆ. ಅಕ್ಟೋಬರ್ 17ರಿಂದ ಸಿಡ್ನಿ ಸಿಕ್ಸರ್ಸ್ ಮತ್ತು ಮೆಲ್ಬೋರ್ನ್ ರೆನೆಗೇಡ್ಸ್ ನಡುವೆ ಆರಂಭವಾಗಲಿದೆ. ಫೈನಲ್ ನವೆಂಬರ್ 29 ರಂದು ನಡೆಯಲಿದೆ ಎಂದು ಕ್ರಿಕೆಟ್ ಆಸ್ಟ್ರೇಲಿಯಾ ತಿಳಿಸಿದೆ.
