ಟಿ-20 ವಿಶ್ವಕಪ್​​​ ನಂತರವೂ 2-3 ವರ್ಷ ಕ್ರಿಕೆಟ್​​ ಆಡ್ತಾರಂತೆ ಮಲಿಂಗಾ!

ಶ್ರೀಲಂಕಾ ಟಿ-20 ತಂಡದ ನಾಯಕನಾಗಿರುವ ಅವರು ವಿಶ್ವಕಪ್​ ನಂತರವೂ ತಾವು ಟಿ-20 ಕ್ರಿಕೆಟ್​ನಲ್ಲಿ ಮುಂದುವರಿಯುವುದಾಗಿ ಹೇಳಿಕೆ ನೀಡುವ ಮೂಲಕ ತಮ್ಮ ನಿವೃತ್ತಿ ನಿರ್ಧಾರವನ್ನು ಕೈಬಿಟ್ಟಿದ್ದಾರೆ.

ಅಬುಧಾಬಿ: ಇಂಗ್ಲೆಂಡ್​ನಲ್ಲಿ ನಡೆದ ಏಕದಿನ ವಿಶ್ವಕಪ್​ ನಂತರ ಏಕದಿನ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ್ದ ಲಸಿತ್​ ಮಲಿಂಗಾ ಟಿ-20 ವಿಶ್ವಕಪ್​ ನಂತರ ಎಲ್ಲಾ ಮಾದರಿಯ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸುವುದಾಗಿ ಹೇಳಿದ್ದರು.

ಕಳೆದ ಮಾರ್ಚ್​ನಲ್ಲಿ ನಿವೃತ್ತಿ ಕುರಿತು ಮಾತನಾಡಿದ್ದ ಮಲಿಂಗಾ, ಆಸ್ಟ್ರೇಲಿಯಾದಲ್ಲಿ ನಡೆಯುವ ಟಿ-20 ವಿಶ್ವಕಪ್ ​ನಂತರ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸುವುದಾಗಿ ಹೇಳಿಕೆ ನೀಡಿದ್ದರು. ಆದರೆ ಶ್ರೀಲಂಕಾ ಟಿ-20 ತಂಡದ ನಾಯಕನಾಗಿರುವ ಅವರು, ವಿಶ್ವಕಪ್​ ನಂತರವೂ ತಾವು ಟಿ-20 ಕ್ರಿಕೆಟ್​ನಲ್ಲಿ ಮುಂದುವರಿಯುವುದಾಗಿ ಹೇಳಿಕೆ ನೀಡುವ ಮೂಲಕ ತಮ್ಮ ನಿವೃತ್ತಿ ನಿರ್ಧಾರವನ್ನು ಬದಲಾಯಿಸಿಕೊಂಡಿದ್ದಾರೆ.

"ಟಿ-20 ಕೇವಲ ನಾಲ್ಕು ಓವರ್​ ಮಾಡುವುದರಿಂದ ನಾನು ನನ್ನ ಕೌಶಲ್ಯಗಳನ್ನು ಉಪಯೋಗಿಸಿ ವಿಶ್ವಕಪ್​ ನಂತರವೂ 2 ವರ್ಷ ಟಿ-20 ಆಡಬಲ್ಲೆ. ಏಕೆದರೆ ಈಗಾಗಲೇ ವಿಶ್ವದ ಎಲ್ಲಾ ಟಿ-20 ಲೀಗ್​ಗಳಲ್ಲಿ ಆಡಿರುವುದರಿಂದ ನಾನು ನಿವೃತ್ತಿ ನಿರ್ಧಾರದ ಬಗ್ಗೆ ಈಗಲೇ ತಲೆ ಕೆಡಿಸಿಕೊಂಡಿಲ್ಲ" ಎಂದು ಹೇಳಿದ್ದಾರೆ.

ಲಸಿತ್​ ಮಲಿಂಗಾ ಸದ್ಯ ಅಬುಧಾಬಿ ಟಿ-10 ಲೀಗ್​ನಲ್ಲಿ ಆಡುತ್ತಿದ್ದಾರೆ. ಮುಂಬರುವ ವಿಶ್ವಕಪ್​ನಲ್ಲೂ ಶ್ರೀಲಂಕಾ ತಂಡವನ್ನು ತಾವೇ ಮುನ್ನಡೆಸುತ್ತೇವೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.