ಕೆಎಲ್​ ರಾಹುಲ್​ ಸ್ಫೋಟಕ ಶತಕ: ಆರ್​ಸಿಬಿ ವಿರುದ್ಧ 206 ರನ್​ಗಳ ಬೃಹತ್ ಮೊತ್ತ ದಾಖಲಿಸಿದ ಪಂಜಾಬ್

ಆರಂಭಿಕ ಬ್ಯಾಟ್ಸ್​ಮನ್ ಕೆಎಲ್​ ರಾಹುಲ್​ 132 ರನ್​ ಗಳಿಸಿದರೆ, ಮಯಾಂಕ್ ಅಗರ್​ವಾಲ್​ 26, ನಿಕೋಲಸ್ ಪೂರನ್​ 17, ಕರುಣ್ ನಾಯರ್​ 15 ರನ್​ಗಳಿಸಿದರು.

ದುಬೈ: ನಾಯಕ ಕೆಎಲ್ ರಾಹುಲ್​ ಅಬ್ಬರದ ಶತಕದ ನೆರವಿನಿಂದ ಕಿಂಗ್ಸ್​ ಇಲೆವೆನ್ ಪಂಜಾಬ್ ತಂಡ ಆರ್​ಸಿಬಿ ವಿರುದ್ಧ 206 ರನ್​ಗಳ ಬೃಹತ್ ಮೊತ್ತ ದಾಖಲಿಸಿದೆ.

ಟಾಸ್​ ಸೋತು ಬ್ಯಾಟಿಂಗ್ ಇಳಿದ ಪಂಜಾಬ್ ತಂಡ 20 ಓವರ್​ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 206ರನ್​ಗಳ ಮೊತ್ತ ದಾಖಲಿಸಿದೆ.

ಆರಂಭಿಕರಾಗಿ ಕಣಕ್ಕಿಳಿದಿದ್ದ ಕೆಎಲ್​ ರಾಹುಲ್ ಮತ್ತೊಬ್ಬ ಕನ್ನಡಿಗ ಮಯಾಂಕ್​ ಅಗರ್​ವಾಲ್​ ಜೊತೆ ಸೇರಿ ಮೊದಲ ವಿಕೆಟ್​ಗೆ 57 ರನ್​ಗಳ ಜೊತೆಯಾಟ ನೀಡಿದರು. 20 ಎಸೆತಗಳಲ್ಲಿ 4 ಬೌಂಡರಿ ಸಹಿತ 26 ರನ್​ಗಳಿಸಿದ್ದ ಮಯಾಂಕ್​ ಚಹಾಲ್​ ಬೌಲಿಂಗ್​ನಲ್ಲಿ ವಿಕೆಟ್​ ಬೌಲ್ಡ್​ ಆದರು.

ಮಯಾಂಕ್ ಔಟಾದ ನಂತರವೂ ತಮ್ಮ ಅಬ್ಬರದ ಬ್ಯಾಟಿಂಗ್ ಮುಂದುವರಿಸಿದ ರಾಹುಲ್ 2ನೇ ವಿಕೆಟ್​ ಜೊತೆಯಾಟದಲ್ಲಿ ಪೂರನ್ ಜೊತೆ ಸೇರಿ 57 ರನ್​ಗಳ ಸೇರಿಸಿದರು. ನಿಧಾನಗತಿ ಬ್ಯಾಟಿಂಗ್ ಪ್ರದರ್ಶನ ತೋರಿದ ಪೂರನ್ 18 ಎಸೆತಗಳಲ್ಲಿ 17 ರನ್​ಗಳಿಸಿ ಔಟಾದರು. ನಂತರ ಬಂದ ಮ್ಯಾಕ್ಸ್​ವೆಲ್​ 5 ರನ್​ಗಳಿಗೆ ಔಟಾಗುವ ಮೂಲಕ ಮತ್ತೊಮ್ಮೆ ವಿಫಲರಾದರು.

ಕೊನೆಯವರೆಗೂ ತನ್ನ ಸ್ಫೋಟಕ ಬ್ಯಾಟಿಂಗ್ ಮುಂದುರಿಸಿದ ರಾಹುಲ್​ 69 ಎಸೆತಗಳಲ್ಲಿ 7 ಸಿಕ್ಸರ್ ಹಾಗೂ 14 ಬೌಂಡರಿ ಸಹಿತ 132 ರನ್​ಗಳಿಸಿ ಔಟಾಗದೇ ಉಳಿದರು. ಈ ಮೂಲಕ ಐಪಿಎಲ್​ನಲ್ಲಿ ತಮ್ಮ 2ನೇ ಶತಕ ದಾಖಲಿಸಿದರು. ಇವರು ಕೊನೆಯ ವಿಕೆಟ್​ಗೆ ಕರುಣ್ ನಾಯರ್​ ಜೊತೆಗೂಡಿ ಕೇವಲಕೊನೆಯ 28 ಎಸೆತಗಳಲ್ಲಿ 84 ರನ್​ ಚಚ್ಚಿದರು, ಇದರಲ್ಲಿ ನಾಯರ್ ಪಾಲು ಕೇವಲ 8 ರನ್​.

ಕೊನೆಯ ಎರಡು ಓವರ್​ಗಳಲ್ಲಿ 49 ರನ್​

ವಿಶ್ವದ ಶ್ರೇಷ್ಠ ಬೌಲರ್​ಗಳಲ್ಲಿ ಒಬ್ಬರಾದ ಡೇಲ್​ ಸ್ಟೈನ್​ ಓವರ್​ನಲ್ಲಿ 3 ಸಿಕ್ಸ್​ ಹಾಗೂ 2 ಬೌಂಡರಿ ಸಹಿತ 26 ರನ್​ ಗಳಿಸಿದ ರಾಹುಲ್ ಕೊನೆಯ ಓವರ್​ನಲ್ಲಿ ಕರುಣ್ ಜೊತೆಗೂಡಿ 23 ರನ್​ ಸಿಡಿಸಿದರು.

ಆರ್​ಸಿಬಿ ಪರ ಚಹಾಲ್​ 25 ಕ್ಕೆ 1 ಹಾಗೂ ಶಿವಂ ದುಬೆ 33 ರನ್ ನೀಡಿ 2 ವಿಕೆಟ್​ ಪಡೆದರು. ಉಳಿದ ಬೌಲರ್​ಗಳು ರಾಹುಲ್ ಚಂಡಮಾರುತಕ್ಕೆ ಸಿಲುಕಿ ಹೈರಾಣಾದರು. ಡೇಲ್​ ಸ್ಟೈನ್​ 4 ಓವರ್​ಗಳಲ್ಲಿ 57 ರನ್​ ಬಿಟ್ಟಕೊಟ್ಟರೆ, ಸೈನಿ 37, ಉಮೇಶ್ ಯಾದವ್​ 3 ಓವರ್​ಗಳಲ್ಲಿ 35 ರನ್​ ಬಿಟ್ಟುಕೊಟ್ಟರು.

ಎರಡು ಕ್ಯಾಚ್​ ಕೈಚೆಲ್ಲಿದ ಕೊಹ್ಲಿ

ಕ್ಯಾಚ್​ ವಿನ್​ ಮ್ಯಾಚಸ್​ ಎಂದು ಹೇಳುತ್ತಾರೆ. ಆದರೆ ಆರ್​ಸಿಬಿ ಶ್ರೇಷ್ಠ ಫೀಲ್ಡರ್​ಗಳಲ್ಲಿ ಒಬ್ಬರಾದ ಕೊಹ್ಲಿ ರಾಹುಲ್​ 86 ರನ್​ಗಳಿಸಿದ್ದ ವೇಳೆ ಹಾಗೂ 90 ರನ್​ಗಳಿಸಿದ್ದ ವೇಳೆ 2 ಬಾರಿ ಕ್ಯಾಚ್​ ಕೈಚೆಲ್ಲಿದರು. ಇದನ್ನು ಸದುಪಯೋಗಪಡಿಸಿಕೊಂಡ ರಾಹುಲ್ ಶತಕ ಪೂರೈಸಿದರಲ್ಲದೆ ಕೊನೆಯ ಓವರ್​ಗಳಲ್ಲಿ 49 ರನ್​ ಸೇರಿಸಿದರು.