ಕ್ರಿಸ್​ಲಿನ್​ ಬಿಟ್ಟಿದ್ದು ಯುವರಾಜ್​ ಸಿಂಗ್​ಗೋಸ್ಕರ ಎಂದು ಟ್ವೀಟ್ ​ಮಾಡಿದ ಕೆಕೆಆರ್​ ಸಿಇಒ!

ಯುವರಾಜ್​ ಸಿಂಗ್​ ರನ್ನು ತಂಡಕ್ಕೆ ಸೇರಿಸಿಕೊಳ್ಳಲು ಕ್ರಿಸ್​ ಲಿನ್​ರನ್ನು ತಂಡದಿಂದ ಬಿಡಬೇಕಾಯಿತು ಎಂದು ಕೆಕೆಆರ್​ ಸಿಇಒ ವೆಂಕಿ ಮೈಸೂರು ಟ್ವೀಟ್​ ಮಾಡಿ ಯುವಿ ಕಾಲೆಳೆದಿದ್ದಾರೆ.

ಕೋಲ್ಕತ್ತಾ:ಐಪಿಎಲ್‌ನ 2020ರ ಆವೃತ್ತಿಯ ಹರಾಜಿಗೂ ಮುನ್ನ, ಕೆಕೆಆರ್ ತಂಡದ​ ಆಸ್ಟ್ರೇಲಿಯಾದ ಸ್ಟಾರ್​ ಬ್ಯಾಟ್ಸ್​ಮನ್​ ಕ್ರಿಸ್​ಲಿನ್​ರನ್ನು ತಂಡದಿಂದ ಕೈಬಿಟ್ಟಿರುವುದಕ್ಕೆ ತಂಡದ ಸಿಇಒ ಟ್ವೀಟ್ ಮಾಡಿ​ ಯುವರಾಜ್ ಸಿಂಗ್ ಕಾಲೆಳೆದಿದ್ದಾರೆ.

ಅಬುದಾಬಿ ಟಿ20 ಲೀಗ್​ನಲ್ಲಿ ಕ್ರಿಸ್​ಲಿನ್​ ಜೊತೆಯಾಗಿ ಆಡುತ್ತಿರುವ ಯುವರಾಜ್​ ಸಿಂಗ್ ​"ಕೆಕೆಆರ್​, ಲಿನ್​ರನ್ನು ತಂಡದಿಂದ ರಿಲೀಸ್ ​ಮಾಡಿದ್ದು ತಪ್ಪು ನಿರ್ಧಾರ" ಎಂದು ಟೀಕಿಸಿದ್ದರು. ಏಕೆಂದರೆ ಕ್ರಿಸ್​ಲಿನ್​ ಕೆಕೆಆರ್​ ತಂಡದಿಂದ ಹೊರಬಿದ್ದ ದಿನವೇ ಟಿ20 ಲೀಗ್​ನಲ್ಲಿ ಕೇವಲ 30 ಎಸೆತಗಳಲ್ಲಿ 91 ರನ್​ ಗಳಿಸಿದ್ದರು. ಈ ಮೂಲಕ ಟಿ20 ಇತಿಹಾಸದಲ್ಲಿ ವೈಯಕ್ತಿಕ ಗರಿಷ್ಠ ಮೊತ್ತ ದಾಖಲಿಸಿದ್ದರು.

ಯುವರಾಜ್​ ಟೀಕೆಗೆ ತಮಾಷೆಯಾಗಿ ಉತ್ತರಿಸಿರುವ ಕೆಕೆಆರ್​ ಸಿಇಒ ವೆಂಕಿ ಮೈಸೂರು" ಕ್ರಿಸ್​ಲಿನ್​ರನ್ನು ತಂಡದಿಂದ ರಿಲೀಸ್​ ಮಾಡಿದ್ದು ನಿಮ್ಮ ಮೇಲೆ ಬಿಡ್​ ಮಾಡುವ ಸಲುವಾಗಿ, ನಿಮ್ಮಿಬ್ಬರ ಮೇಲೆ ಅಪಾರ ಗೌರವ ಹಾಗೂ ಪ್ರೀತಿ ಇದೆ" ಎಂದು ಟ್ವೀಟ್​ ಮಾಡಿ ಯುವಿ ಕಾಲೆಳೆದಿದ್ದಾರೆ.

ಕ್ರಿಸ್​ಲಿನ್ 2014 ಹಾಗೂ 2017ರಿಂದ ಕೆಕೆಆರ್​ ತಂಡದಲ್ಲಿದ್ದರು. ಆದರೆ ಕಳೆದ ಆವೃತ್ತಿಯಲ್ಲಿ ಲಿನ್​ ಪ್ರದರ್ಶನ ತೃಪ್ತಿ ತರದ ಕಾರಣ ಅವರನ್ನು ಕೆಕೆಆರ್​ ತಂಡ ಕೈಬಿಟ್ಟಿದೆ. ಆದರೆ ಈ ಬಾರಿಯೂ ಲಿನ್ ಹರಾಜಿನಲ್ಲಿ ದುಬಾರಿ ಬೆಲೆಗೆ ಖರೀದಿಯಾಗುವ ಲಕ್ಷಣಗಳಿವೆ.