ಇಂಗ್ಲೆಂಡ್​ 'ಬಿ' ತಂಡ ಸೋಲಿಸಿದಕ್ಕಾಗಿ ಧನ್ಯವಾದ... ಟೀಂ ಇಂಡಿಯಾ ಕಾಲೆಳೆದ ಪಿಟರ್​ಸನ್​!

ಎರಡನೇ ಟೆಸ್ಟ್​ ಪಂದ್ಯದಲ್ಲಿ ಟೀಂ ಇಂಡಿಯಾ ಆಂಗ್ಲ ಪಡೆ ಮೇಲೆ ಸವಾರಿ ಮಾಡಿದ್ದು, ಬರೋಬ್ಬರಿ 317ರನ್​ಗಳ ಅಂತರದಲ್ಲಿ ಗೆಲುವು ಸಾಧಿಸಿದೆ.

ಚೆನ್ನೈ: ಪ್ರವಾಸಿ ಇಂಗ್ಲೆಂಡ್ ವಿರುದ್ಧ ನಡೆದ ಎರಡನೇ ಟೆಸ್ಟ್​ ಪಂದ್ಯದಲ್ಲಿ ಟೀಂ ಇಂಡಿಯಾ 317ರನ್​ಗಳ ಬೃಹತ್​ ಗೆಲುವು ದಾಖಲು ಮಾಡಿದ್ದು, ಕೊಹ್ಲಿ ಪಡೆಗೆ ಎಲ್ಲೆಡೆಯಿಂದ ಅಭಿನಂದನೆ ಜತೆಗೆ ಪ್ರಶಂಸೆಗಳ ಸುರಿಮಳೆ ಮಾಡಲಾಗುತ್ತಿದೆ. ಇದರ ಮಧ್ಯೆ ಇಂಗ್ಲೆಂಡ್ ತಂಡದ ಮಾಜಿ ಕ್ಯಾಪ್ಟನ್ ಪಿಟರ್​ಸನ್​ ಟೀಂ ಇಂಡಿಯಾ ಕಾಲೆಳೆದಿದ್ದಾರೆ.

ಇದೀಗ ಇಂಗ್ಲೆಂಡ್ ತಂಡದ ಮಾಜಿ ಕ್ಯಾಪ್ಟನ್​ ಕೆವಿನ್ ಪಿಟರ್ಸನ್​ ಹಿಂದಿಯಲ್ಲಿ ಟ್ವೀಟ್ ಮಾಡಿದ್ದು, ಇಂಗ್ಲೆಂಡ್​ ಬಿ ತಂಡ ಸೋಲಿಸಿದಕ್ಕಾಗಿ ಅಭಿನಂದನೆಗಳು ಎಂದು ಕೆವಿನ್ ಹಿಂದಿಯಲ್ಲಿ ಟ್ವೀಟ್ ಮಾಡಿದ್ದಾರೆ.

ಕೆವಿನ್ ಪಿಟರ್​​ಸನ್​ ಟ್ವೀಟ್​

ಟೀಂ ಇಂಡಿಯಾ ಗೆಲುವು ಸಾಧಿಸುತ್ತಿದ್ದಂತೆ ಬದಾಯಿ ಹೋ ಇಂಡಿಯಾ, ಬಿ ತಂಡ ಇಂಗ್ಲೆಂಡ್​ ಕೋ ಹರಾನೆ ಕೇ ಲಿಯೇ ಎಂದು ಬರೆದುಕೊಂಡಿದ್ದಾರೆ. ಈ ಮೂಲಕ ಟೀಂ ಇಂಡಿಯಾ ಕಾಲೆಳೆದಿದ್ದಾರೆ.

ಮೊದಲ ಟೆಸ್ಟ್​ ಪಂದ್ಯದಲ್ಲಿ ಇಂಗ್ಲೆಂಡ್​ ತಂಡ 227ರನ್​ಗಳ ಗೆಲುವು ದಾಖಲು ಮಾಡಿತ್ತು. ಇದಕ್ಕೆ ಪ್ರತಿಯಾಗಿ ಟೀಂ ಇಂಡಿಯಾ ಎರಡನೇ ಟೆಸ್ಟ್​ನಲ್ಲಿ 317ರನ್​ಗಳ ಜಯ ದಾಖಲು ಮಾಡಿ ತಿರುಗೇಟು ನೀಡಿದ್ದು, ಸರಣಿ 1-1 ಅಂತರದಲ್ಲಿ ಸಮಬಲ ಮಾಡಿಕೊಂಡಿದೆ. ಇನ್ನು ಇಂಗ್ಲೆಂಡ್​ ವಿರುದ್ಧ ಇಷ್ಟೊಂದು ರನ್​ಗಳ ಅಂತರದಿಂದ ಟೆಸ್ಟ್​ ಸರಣಿಯಲ್ಲಿ ಟೀಂ ಇಂಡಿಯಾ ಇದೇ ಮೊದಲ ಸಲ ಗೆಲುವು ದಾಖಲು ಮಾಡಿದೆ.