ಕರಾಚಿ (ಪಾಕಿಸ್ತಾನ): ಮಂಗಳವಾರ ರಾತ್ರಿ ನ್ಯಾಷನಲ್ ಸ್ಟೇಡಿಯಂನಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಸೋಹೈಲ್ ಅಖ್ತರ್ ನಾಯಕತ್ವದ ಲಾಹೋರ್ ಖಲಾಂಡರ್ಸ್ ತಂಡವನ್ನು ಮಣಿಸುವ ಮೂಲಕ ಇಮಾದ್ ವಾಸೀಂ ನಾಯಕತ್ವದ ಕರಾಚಿ ಕಿಂಗ್ಸ್ ತಂಡ ಪಾಕಿಸ್ತಾನ ಪ್ರೀಮಿಯರ್ ಲೀಗ್ನಲ್ಲಿ (ಪಿಎಸ್ಎಲ್-5ನೇ ಆವೃತ್ತಿ) ಮೊದಲ ಬಾರಿಗೆ ಪ್ರಶಸ್ತಿಗೆ ಮುತ್ತಿಕ್ಕಿತು.
ಪಿಎಸ್ಎಲ್ನ 5 ಆವೃತ್ತಿಗಳಲ್ಲಿ ಈ ಎರಡು ತಂಡಗಳು ಇದೇ ಮೊದಲ ಬಾರಿಗೆ ಫೈನಲ್ ತಲುಪಿದ್ದವು. ಕರಾಚಿ ಕಿಂಗ್ಸ್ ತಂಡ ಚಾಂಪಿಯನ್ ಆಗಿ ಹೊರ ಹೊಮ್ಮಿದರೆ, ಖಲಾಂಡರ್ಸ್ ತಂಡ ರನ್ನರ್ಅಪ್ಗೆ ತೃಪ್ತಿಗೊಂಡಿತು.
ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ ಖಲಾಂಡರ್ಸ್ 20 ಓವರ್ಗಳ ಮುಕ್ತಾಯಕ್ಕೆ 7 ವಿಕೆಟ್ ಕಳೆದುಕೊಂಡು ಎದುರಾಳಿ ಕರಾಚಿ ತಂಡಕ್ಕೆ 134 ರನ್ಗಳ ಸಾಧಾರಣ ಮೊತ್ತ ನೀಡಿತು. ಮಸ್ಕೂದ್, ಅರ್ಷಾದ್ ಇಕ್ಬಾಲ್ ಮತ್ತು ಯು.ಆಸೀಫ್ಗೆ ತಲಾ 2 ಮತ್ತು ನಾಯಕ ವಾಸೀಂ 1 ವಿಕೆಟ್ ಪಡೆದುಕೊಂಡಿದ್ದಾರೆ.
ಬೌಲರ್ಗಳ ಅಬ್ಬರದ ದಾಳಿಗೆ ಸೋಹೈಲ್ ಪಡೆ ಅಲ್ಪ ಮೊತ್ತಕ್ಕೆ ಕುಸಿಯಿತು. ತಮೀಮ್ (35), ಫಕಾರ್ ಜಮಾನ್ (27), ಹಫೀಜ್ ಸೇರಿದಂತೆ ಪ್ರಮುಖ ಆಟಗಾರರು ನೀರಸ ಪ್ರದರ್ಶನ ತೋರಿದರು.
ಕರಾಚಿ ತಂಡ 18.4 ಓವರ್ಗಳಲ್ಲಿ ಐದು ವಿಕೆಟ್ ಕಳೆದುಕೊಂಡು ಖಲಾಂಡರ್ಸ್ ನೀಡಿದ ಗುರಿಯನ್ನು ಬೆನ್ನಟ್ಟಿತು. ಬಾಬರ್ ಅಜಾಮ್ ಅಮೋಘ ಅರ್ಧಶತಕ (63) ಬಾರಿಸಿ ಔಟಾಗದೆ ತಂಡವನ್ನು ಗೆಲುವಿನ ದಡ ಸೇರಿಸಿದರು.
ಟೂರ್ನಿಯುದ್ದಕ್ಕೂ ಉತ್ತಮ ಪ್ರದರ್ಶನ ನೀಡಿದ ಬಾಬರ್ ಅಜಾಮ್ಗೆ ಸರಣಿ ಶ್ರೇಷ್ಠ, ಪಂದ್ಯಶ್ರೇಷ್ಠ ಮತ್ತು ಬೆಸ್ಟ್ ಬ್ಯಾಟ್ಸ್ಮೆನ್ ಪ್ರಶಸ್ತಿ, ಶಾಹೀನ್ ಶಾ ಆಫ್ರೀದಿಗೆ ಬೆಸ್ಟ್ ಬೌಲರ್ ಪ್ರಶಸ್ತಿ, ಬೆನ್ ಡಂಕ್ ಅವರು ಬೆಸ್ಟ್ ವಿಕೆಟ್ ಕೀಪರ್ ಪ್ರಶಸ್ತಿಗೆ ಪಾತ್ರರಾದರು. ಮುಲ್ತಾನ್ ಸುಲ್ತಾನ್ ತಂಡಕ್ಕೆ ಸ್ಪಿರಿಟ್ ಆಫ್ ಕ್ರಿಕೆಟ್ ಅವಾರ್ಡ್ಗೆ ಲಭಿಸಿತು.
ಫೆಬ್ರುವರಿಯಲ್ಲಿ ಟೂರ್ನಿ ಆರಂಭ: ನವೆಂಬರ್ನಲ್ಲಿ ಅಂತ್ಯ
ಪಿಎಸ್ಎಲ್-5 ಟೂರ್ನಿ ಆರಂಭವಾಗಿದ್ದು, ಫೆಬ್ರುವರಿ 20ರಂದು. ಕ್ವೆಟ್ಟಾ ಗ್ಲಾಡಿಯೇಟರ್ಸ್ ಮತ್ತು ಇಸ್ಲಾಮಾಬಾದ್ ಯುನೈಟೆಡ್ ತಂಡಗಳ ನಡುವೆ ಮೊದಲ ಪಂದ್ಯ ನಡೆದಿತ್ತು. ನಂತರ ಕೊರೊನಾ ಕಾರಣ ಮಾರ್ಚ್ 17ರಂದು ನಡೆಯಬೇಕಿದ್ದ ಸೆಮಿಫೈನಲ್ ಪಂದ್ಯಗಳನ್ನು ಮುಂದೂಡಲಾಯಿತು.
ನವೆಂಬರ್ 14ರಂದು ಪುನರ್ ಆರಂಭವಾದ ಟೂರ್ನಿಯ ಮೊದಲ ಪಂದ್ಯ ಕ್ವಾಲಿಫೈಯರ್ ಮತ್ತು ಎಲಿಮಿನೇಟರ್ ನಡೆಯಿತು. ಆಗ ಕರಾಚಿ ನೇರವಾಗಿ ಫೈನಲ್ ತಲುಪಿತು. ನಂತರ 2ನೇ ನ.15ರಂದು ನಡೆದ 2ನೇ ಎಲಿಮಿನೇಟರ್ ಪಂದ್ಯದಲ್ಲಿ ಲಾಹೋರ್ ಖಲಾಂಡರ್ಸ್ ಗೆದ್ದು ಫೈನಲ್ಗೇರಿತು. ಅಂತಿಮವಾಗಿ ಮಂಗಳವಾರ ಜರುಗಿದ ಫೈನಲ್ನಲ್ಲಿ ಕರಾಚಿ ಕಿಂಗ್ಸ್, ಲಾಹೋರ್ ವಿರುದ್ಧ ಜಯಿಸಿ ಕಪ್ ತಮ್ಮದಾಗಿಸಿಕೊಂಡಿತು.
