ಕೇಪ್ಟೌನ್: ಅಕ್ಟೋಬರ್ 18ರಿಂದ ಆರಂಭಗೊಳ್ಳಲಿರುವ ಐಸಿಸಿ ಟಿ-20 ವಿಶ್ವಕಪ್ ಟೂರ್ನಿ ಆರಂಭಗೊಳ್ಳುವುದು ಬಹುತೇಕ ಡೌಟ್ ಎಂದು ಹೇಳಲಾಗ್ತಿದ್ದು, ಕೊರೊನಾ ವೈರಸ್ ಕರಿನೆರಳು ಅದರ ಮೇಲೂ ಬೀಳಲಿದೆ ಎಂಬ ಮಾತುಗಳು ಜೋರಾಗಿ ಕೇಳಿ ಬರ್ತಿವೆ. ಇದರ ಮಧ್ಯೆ ದಕ್ಷಿಣ ಆಫ್ರಿಕಾದ ಕ್ರಿಕೆಟರ್ ಫಾಫು ಡು ಪ್ಲೆಸಿಸ್ ತಮ್ಮ ಅಭಿಪ್ರಾಯ ಹೊರಹಾಕಿದ್ದಾರೆ.
ಪ್ರಪಂಚದಾದ್ಯಂತ ಕೊರೊನಾ ವೈರಸ್ ಅಬ್ಬರ ಜೋರಾಗಿರುವ ಕಾರಣ ನಿಗದಿಗೊಂಡಿದ್ದ ಅನೇಕ ಕ್ರಿಕೆಟ್ ಟೂರ್ನಮೆಂಟ್ ಮುಂದೂಡಿಕೆಯಾಗಿದ್ದು, ಇಂಡಿಯನ್ ಪ್ರೀಮಿಯರ್ ಲೀಗ್ ಕೂಡ ಅನಿರ್ಧಿಷ್ಟಾವಧಿಗೆ ಮುಂದೂಡಿಕೆಯಾಗಿದೆ. ಇನ್ನು ಅಕ್ಟೋಬರ್ - ನವೆಂಬರ್ ತಿಂಗಳಲ್ಲಿ ಆಸ್ಟ್ರೇಲಿಯಾದಲ್ಲಿ ಆರಂಭಗೊಳ್ಳಲಿರುವ ವಿಶ್ವಕಪ್ ಟೂರ್ನಮೆಂಟ್ ನಡೆಯುವುದು ಬಹುತೇಕ ಡೌಟ್ ಎನ್ನಲಾಗ್ತಿದೆ.
ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಮಾತನಾಡಿರುವ ಡು ಪ್ಲೆಸಿಸ್, ಟೂರ್ನಿಯಲ್ಲಿ ಭಾಗಿಯಾಗಲು ಆಸ್ಟ್ರೇಲಿಯಾ ತೆರಳುವ ಪ್ಲೇಯರ್ಸ್ಗಳು ಎರಡು ವಾರಗಳ ಕಾಲ ಅಲ್ಲೇ ಐಸೋಲೇಷನ್ಗೆ ಒಳಗಾಗಿ ತದನಂತರ ಟೂರ್ನಿಯಲ್ಲಿ ಭಾಗಿಯಾಗಲಿ. ಟೂರ್ನಿ ಮುಗಿದ ಬಳಿಕ ಕೂಡ ಎರಡು ವಾರಗಳ ಕಾಲ ಅವರು ಐಸೋಲೇಷನ್ಗೆ ಒಳಪಡಲಿ ಎಂದು ಅಭಿಪ್ರಾಯ ತಿಳಿಸಿದ್ದಾರೆ.
ಎಲ್ಲ ದೇಶದ ಕ್ರಿಕೆಟರ್ಸ್ ಅಲ್ಲಿಗೆ ಬರುವುದರಿಂದ ತೊಂದರೆ ಜಾಸ್ತಿಯಾಗಿರುತ್ತದೆ. ಆಸ್ಟ್ರೇಲಿಯಾದಲ್ಲಿ ಕೊರೊನಾ ಹೆಚ್ಚು ಇಲ್ಲ. ಆದರೆ, ಭಾರತ, ಬಾಂಗ್ಲಾದೇಶ ಹಾಗೂ ದಕ್ಷಿಣ ಆಫ್ರಿಕಾದಂತಹ ದೇಶದ ಪ್ಲೇಯರ್ಸ್ಗಳಿಗೆ ಇದರಿಂದ ಹೆಚ್ಚು ತೊಂದರೆ ಆಗಲಿದೆ ಎಂದಿದ್ದಾರೆ. ಕಳೆದ ಫೆಬ್ರವರಿ ತಿಂಗಳಲ್ಲಿ ದಕ್ಷಿಣ ಆಫ್ರಿಕ ಕ್ರಿಕೆಟ್ ತಂಡದ ಟೆಸ್ಟ್, ಮತ್ತು ಟಿ-20 ನಾಯಕತ್ವ ಸ್ಥಾನದಿಂದ ಫಾಫ್ ಡು ಪ್ಲೆಸಿಸ್ ಕೆಳಗಿಳಿದಿದ್ದರು.
