13 ವರ್ಷಗಳ ಪರಿಶ್ರಮಕ್ಕೆ ಸಿಕ್ಕ ಫಲ; ನನಗಿಂತ ಹೆಚ್ಚಾಗಿ, ನಾನು ಈ ಪ್ರಶಸ್ತಿಗೆ ಅರ್ಹನೆಂದು ನನ್ನ ಪತ್ನಿ ನಂಬಿದ್ರು: ಇಶಾಂತ್​

ಟೀಂ ಇಂಡಿಯಾದ ವೇಗದ ಬೌಲರ್​ ಇಶಾಂತ್​ ಶರ್ಮಾ ಅರ್ಜುನ್​ ಅವಾರ್ಡ್​ ಗೌರವಕ್ಕೆ ಬಾಜನರಾಗಿದ್ದು, ಇದೇ ವಿಷಯವಾಗಿ ಅವರು ತಮ್ಮ ಸಂತಸ ಹೊರಹಾಕಿದ್ದಾರೆ.

ನವದೆಹಲಿ:ಪ್ರಸಕ್ತ ಸಾಲಿನ ಕ್ರೀಡಾ ಇಲಾಖೆ ನೀಡುವ ಅತ್ಯುನ್ನತ ಅರ್ಜುನ್​ ಅವಾರ್ಡ್​ ಇಶಾಂತ್​ ಶರ್ಮಾಗೂ ಸಿಕ್ಕಿದ್ದು, ಇದೇ ವಿಚಾರವಾಗಿ ಇದೀಗ ಅವರ ವಿಡಿಯೋ ಶೇರ್​ ಮಾಡಿ ಸಂತಸ ಹಂಚಿಕೊಂಡಿದ್ದಾರೆ.

ಅರ್ಜುನ್​​ ಅವಾರ್ಡ್​ ಸಿಕ್ಕಿರುವುದು ನನಗೆ ಮತ್ತು ನನ್ನ ಕುಟುಂಬಕ್ಕೆ ಸಂತೋಷ ನೀಡಿದೆ. ನನಗಿಂತ ಹೆಚ್ಚಾಗಿ, ನಾನು ಈ ಪ್ರಶಸ್ತಿಗೆ ಅರ್ಹನೆಂದು ನನ್ನ ಪತ್ನಿ ನಂಬಿದ್ದಳು ಎಂದಿರುವ ವೇಗದ ಬೌಲರ್​, ಕಳೆದ 13 ವರ್ಷಗಳ ಕಾಲ ನಾನು ಪಟ್ಟಿರುವ ಶ್ರಮಕ್ಕೆ ಸಿಕ್ಕಿರುವ ಪ್ರತಿಫಲ ಇದಾಗಿದೆ ಎಂದು ತಿಳಿಸಿದ್ದಾರೆ.

ಭಾರತೀಯ ಮಹಿಳಾ ತಂಡದ ಬಾಸ್ಕೇಟ್​ ಬಾಲ್​​ ಆಟಗಾರ್ತಿಯಾಗಿರುವ ಇಶಾಂತ್​ ಶರ್ಮಾ ಪತ್ನಿ ಪ್ರತೀಮಾ ಸಿಂಗ್​, ನೀವೂ ಈ ಪ್ರಶಸ್ತಿಗೆ ಅರ್ಹರಾಗಿದ್ದೀರಿ ಎಂದು ತಿಳಿಸಿದ್ದು, ನಿಮಗಿಂತಲೂ ನನಗೆ ಹೆಚ್ಚಿನ ಸಂತೋಷವಾಗಿದೆ ಎಂದು ತಿಳಿಸಿದ್ದಾಗಿ ಇಶಾಂತ್​ ಶರ್ಮಾ ಹೇಳಿದ್ದಾರೆ.

2020ನೇ ಸಾಲಿನ ಅರ್ಜುನ್​ ಅವಾರ್ಡ್​ 27 ಕ್ರೀಡಾಪಟುಗಳಿಗೆ ಘೋಷಣೆಯಾಗಿದ್ದು, ಅದರಲ್ಲಿ ಇಶಾಂತ್​ ಶರ್ಮಾ ಜತೆಗೆ ಮಹಿಳಾ ತಂಡದ ಕ್ರಿಕೆಟರ್​ ದಿಪ್ತಿ ಶರ್ಮಾ ಕೂಡ ಸೇರಿದ್ದಾರೆ.