ಡೆಲ್ಲಿ ತಂಡಕ್ಕೆ ಬಿಕರಿಯಾಗ್ತಿದ್ದಂತೆ ಕುಣಿದು ಕುಪ್ಪಳಿಸಿದ ಹೆಟ್ಮಾಯರ್​​... ವಿಡಿಯೋ ಶೇರ್​ ಮಾಡಿದ ಕ್ಯಾಪಿಟಲ್ಸ್​​!

ವೆಸ್ಟ್​​ ಇಂಡೀಸ್​ನ ಮಿನಿ ಕ್ರಿಸ್​ ಗೇಲ್​ ಎಂಬ ಖ್ಯಾತಿಯ ಶಿಮ್ರಾನ್​ ಹೆಟ್ಮಾಯರ್​​ ಪ್ರಸಕ್ತ ಸಾಲಿನ ಐಪಿಎಲ್​ ಹರಾಜು ಪ್ರಕ್ರಿಯೆಯಲ್ಲಿ ಬರೋಬ್ಬರಿ 7.75 ಕೋಟಿ ರೂಗೆ ಹರಾಜಾಗಿದ್ದಾರೆ.

ಕೋಲ್ಕತ್ತಾ:ಇಂಡಿಯನ್​​ ಪ್ರೀಮಿಯರ್​​ ಲೀಗ್​​ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​​ ಬಿಗ್​ ಹಿಟ್ಟರ್​ಗೆ ಮಣೆ ಹಾಕಿದ್ದು, ವೆಸ್ಟ್​​ ಇಂಡೀಸ್​​ನ ಸ್ಪೋಟಕ ಬ್ಯಾಟ್ಸ್​​ಮನ್​​ ಶಿಮ್ರಾನ್ ಹೆಟ್ಮಾಯರ್​ಗೆ ಬರೋಬ್ಬರಿ 7.75 ಕೋಟಿ ರೂ ನೀಡಿ ಖರೀದಿಸಿದೆ.

ವಿಂಡೀಸ್ ಎಡಗೈ ಬ್ಯಾಟ್ಸ್​​ಮನ್​ ಶಿಮ್ರಾನ್​ ಹೆಟ್ಮಾಯರ್​ಗೆ ಕಳೆದ ಆವೃತ್ತಿಯಲ್ಲಿ ರಾಯಲ್​​ ಚಾಲೆಂಜರ್ಸ್​ ಬೆಂಗಳೂರು 4 ಕೋಟಿ ರೂ ನೀಡಿ ಖರೀದಿ ಮಾಡಿತ್ತು. ಆದರೆ ಕಳೆದ ಟೂರ್ನಿಯಲ್ಲಿ ಮಿನಿ ಕ್ರಿಸ್​ ಗೇಲ್​​ ಸಂಪೂರ್ಣವಾಗಿ ವಿಫಲಗೊಂಡಿದ್ದರಿಂದ ತಂಡ ಅವರನ್ನ ಕೈಬಿಟ್ಟಿತ್ತು. ಇದೀಗ ಹರಾಜು ಪ್ರಕ್ರಿಯೆಯಲ್ಲಿ ಅವರನ್ನ ಡೆಲ್ಲಿ ಖರೀದಿ ಮಾಡಿದೆ. ತಾವು ಡೆಲ್ಲಿ ತಂಡಕ್ಕೆ ಹರಾಜುಗೊಳ್ಳುತ್ತಿದ್ದಂತೆ ಹೋಟೆಲ್​​ನಲ್ಲಿ ಹೆಟ್ಮಾಯರ್​​ ಕುಣಿದು ಕುಪ್ಪಳಿಸಿದ್ದು, ಡೆಲ್ಲಿ ಪ್ರಾಂಚೈಸಿ ಹಾಡು ಹಾಕಿ ಡ್ಯಾನ್ಸ್​ ಮಾಡಿದ್ದಾರೆ. ಇದೇ ವಿಡಿಯೋ ತುಣಕನ್ನ ಡೆಲ್ಲಿ ಪ್ರಾಂಚೈಸಿ ತನ್ನ ಟ್ವೀಟರ್​​ನಲ್ಲಿ ಶೇರ್​ ಮಾಡಿದ್ದಾರೆ.

ಮೂಲ ಬೆಲೆ ಕೇವಲ 50 ಲಕ್ಷ ರೂ ಹೊಂದಿದ್ದ ವೆಸ್ಟ್​ ಇಂಡೀಸ್​ ಪ್ಲೇಯರ್​ ಬರೋಬ್ಬರಿ ಇಷ್ಟೊಂದು ಹಣಕ್ಕೆ ಬಿಕರಿಯಾಗಿದ್ದು, ಈ ಸಲದ ಆವೃತ್ತಿಯಲ್ಲಿ ಅಬ್ಬರಿಸಲು ಸಜ್ಜುಗೊಳ್ಳಲಿದ್ದಾರೆ. ಇನ್ನು ಸದ್ಯ ಟೀಂ ಇಂಡಿಯಾ ವಿರುದ್ಧದ ಏಕದಿನ ಸರಣಿಯ ಮೊದಲ ಪಂದ್ಯದಲ್ಲಿ ಶಿಮ್ರಾನ್​​ ಸ್ಪೋಟಕ ಶತಕ ಸಿಡಿಸಿ ಮಿಂಚಿದ್ದರು.