ಕೊಹ್ಲಿ, ಪಡಿಕ್ಕಲ್​ ಆರ್ಭಟ: ರಾಜಸ್ಥಾನ್​ ವಿರುದ್ಧ ರಾಯಲ್ ಗೆಲುವು ಸಾಧಿಸಿ ಅಗ್ರಸ್ಥಾನಕ್ಕೇರಿದ ಆರ್​ಸಿಬಿ

ರಾಜಸ್ಥಾನ್​ ರಾಯಲ್ಸ್​ ನೀಡಿದ 155 ರನ್​ಗಳ ಗುರಿಯನ್ನು ಬೆನ್ನೆತ್ತಿದ ಬೆಂಗಳೂರು ತಂಡ 19.1 ಓವರ್​ಗಳಲ್ಲಿ ಕೇವಲ 2 ವಿಕೆಟ್​ ಕಳೆದುಕೊಂಡು ವಿಜಯ ಸಾಧಿಸಿದ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿತು.

ಅಬುಧಾಬಿ: ಯುವ ಬ್ಯಾಟ್ಸ್​ಮನ್​ ದೇವದತ್​ ಪಡಿಕ್ಕಲ್​ ಹಾಗೂ ನಾಯಕ ವಿರಾಟ್​ ಕೊಹ್ಲಿ​ ಸಿಡಿಸಿದ ಸಮಯೋಚಿತ ಅರ್ಧಶತಕದ ನೆರವಿನಿಂದ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡ 8 ವಿಕೆಟ್​ಗಳ ಅಂತರದಿಂದ ರಾಜಸ್ಥಾನ್​ ರಾಯಲ್ಸ್ ತಂಡವನ್ನು ಬಗ್ಗುಬಡಿದಿದೆ.

ರಾಜಸ್ಥಾನ್​ ರಾಯಲ್ಸ್​ ನೀಡಿದ 155 ರನ್​ಗಳ ಗುರಿಯನ್ನು ಬೆನ್ನೆಟ್ಟಿದ ಬೆಂಗಳೂರು ತಂಡ 19.1 ಓವರ್​ಗಳಲ್ಲಿ ಕೇವಲ 2 ವಿಕೆಟ್​ ಕಳೆದುಕೊಂಡು 158 ರನ್​ಗಳಿಸಿ ವಿಜಯ ಸಾಧಿಸಿತು. ಅಲ್ಲದೇ ಅಂಕಪಟ್ಟಿಯಲ್ಲೂ ಅಗ್ರಸ್ಥಾನಕ್ಕೇರಿತು.

ಟೂರ್ನಿಯಲ್ಲಿ ಅತ್ಯುತ್ತಮ ಬ್ಯಾಟಿಂಗ್ ಮುಂದುವರಿಸಿದ ಯುವ ಬ್ಯಾಟ್ಸ್​ಮನ್​ ಪಡಿಕ್ಕಲ್​ 45 ಎಸೆತಗಳಲ್ಲಿ 6 ಬೌಂಡರಿ ಹಾಗೂ ಒಂದು ಸಿಕ್ಸರ್​ ಸಹಿತ 63 ರನ್​ಗಳಿಸಿ ಔಟಾದರು. ಅವರು ಔಟಾಗುವ ಮುನ್ನ 2ನೇ ವಿಕೆಟ್​​​​​​​​​ಗೆ ಕೊಹ್ಲಿ ಜೊತೆ 99 ರನ್​ಗಳ ಮಹತ್ವದ ಜೊತೆಯಾಟದಲ್ಲಿ ಭಾಗಿಯಾಗಿದ್ದರು.

ಪಡಿಕ್ಕಲ್​ ಔಟಾದ ನಂತರ ಕೊಹ್ಲಿ, ಎಬಿಡಿ ಜೊತೆ ಸೇರಿ 3ನೇ ವಿಕೆಟ್​ಗೆ ಮುರಿಯದ 38 ರನ್​ಗಳ ಜೊತೆಯಾಡ ನಡೆಸಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ಟೂರ್ನಿಯಲ್ಲಿ ಇದೇ ಮೊದಲ ಬಾರಿಗೆ ಫಾರ್ಮ್​ ಕಂಡುಕೊಂಡ ಕೊಹ್ಲಿ 53 ಎಸೆತಗಳಲ್ಲಿ 2 ಸಿಕ್ಸರ್​ ಹಾಗೂ 7 ಬೌಂಡರಿ ಸಹಿತ 72 ರನ್​ಗಳಿಸಿ ಔಟಾಗದೇ ಉಳಿದರು.

ರಾಜಸ್ಥಾನ್​ ಪರ ಆರ್ಚರ್​ ಹಾಗೂ ಶ್ರೇಯಸ್ ಗೋಪಾಲ್​ ತಲಾ ಒಂದು ವಿಕೆಟ್​ ಪಡೆದಿದ್ದರು.

ಇದಕ್ಕೂ ಮೊದಲು ಬ್ಯಾಟಿಂಗ್ ನಡೆಸಿದ್ದ ರಾಜಸ್ಥಾನ್​ ಯುವ ಬ್ಯಾಟ್ಸ್​ಮನ್ ಲಾಮ್ರರ್​ ಅವರ 47, ತೆವಾಟಿಯಾ 24, ಬಟ್ಲರ್ 22 ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 6 ವಿಕೆಟ್​ ಕಳೆದುಕೊಂಡು 154 ರನ್​ ಗಳಿಸಿತ್ತು.

ಆರ್​ಸಿಬಿ ಪರ ಚಹಾಲ್​ 3 ವಿಕೆಟ್ ಪಡೆದರೆ, ಉದಾನ 2 ಹಾಗೂ ಸೈನಿ ಒಂದು ವಿಕೆಟ್ ಪಡೆದಿದ್ದರು.