ಮಿಂಚಿದ ಎಸ್​ಕೆ ಯಾದವ್, ಬುಮ್ರಾ: ರಾಜಸ್ಥಾನ್​ ವಿರುದ್ಧ 57 ರನ್​ಗಳ ಜಯ ಸಾಧಿಸಿದ ಮುಂಬೈ

ಅಬುಧಾಬಿಯ ಶೇಖ್ ಜಾಯೇದ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ್ದ ಮುಂಬೈ ಇಂಡಿಯನ್ಸ್​ ಸೂರ್ಯ ಕುಮಾರ್​ ಯಾದವ್​ 79(47 ಎಸೆತ), ಹಾರ್ದಿಕ್ ಪಾಂಡ್ಯ 30(19), ರೋಹಿತ್ 35(23) ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 193 ರನ್​ಗಳಿಸಿತ್ತು.

ಅಬುಧಾಬಿ: ಸೂರ್ಯಕುಮಾರ್​ ಯಾದವ್​(79) ಹಾಗೂ ಜಪ್ರೀತ್ ಬುಮ್ರಾ(4 ವಿಕೆಟ್) ಅವರ ಅದ್ಭುತ ಪ್ರದರ್ಶನದ ನೆರವಿನಿಂದ ಹಾಲಿ ಚಾಂಪಿಯನ್​ ಮುಂಬೈ ಇಂಡಿಯನ್ಸ್​ 57 ರನ್​ಗಳ ಅಂತರದಿಂದ ರಾಜಸ್ಥಾನ್​ ತಂಡವನ್ನು ಮಣಿಸಿ ಅಗ್ರಸ್ಥಾನಕ್ಕೇರಿದೆ.

ಅಬುಧಾಬಿಯ ಶೇಖ್ ಜಾಯೇದ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ್ದ ಮುಂಬೈ ಇಂಡಿಯನ್ಸ್​ ಸೂರ್ಯ ಕುಮಾರ್​ ಯಾದವ್​ 79(47 ಎಸೆತ), ಹಾರ್ದಿಕ್ ಪಾಂಡ್ಯ 30(19), ರೋಹಿತ್ 35(23) ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 193 ರನ್​ಗಳಿಸಿತ್ತು.

294 ರನ್​ಗಳ ಗುರಿ ಪಡೆದಿದ್ದ ರಾಜಸ್ಥಾನ್​ ರಾಯಲ್ಸ್​ ಜಸ್ಪ್ರೀತ್ ಬುಮ್ರಾ ಬೌಲಿಂಗ್ ದಾಳಿಗೆ ತತ್ತರಿಸಿ 18.1 ಓವರ್​ಗಳಲ್ಲಿ 136 ರನ್​ಗಳಿಗೆ ಆಲೌಟ್​ ಆಯಿತು.

ರಾಜಸ್ಥಾನ್​ ರಾಯಲ್ಸ್​ ಪರ ಜೋಸ್​ ಬಟ್ಲರ್​ 44 ಎಸೆತಗಳಲ್ಲಿ 5 ಸಿಕ್ಸರ್​ ಹಾಗೂ 4 ಬೌಂಡರಿ ಸಹಿತ 70 ರನ್​ಗಳಿಸಿ ಗೆಲುವಿಗಾಗಿ ಏಕಾಂಗಿ ಹೋರಾಟ ನಡೆಸಿ ವಿಫಲರಾದರು. ಇವರನ್ನು ಬಿಟ್ಟರೆ 11 ಎಸೆತಗಳಲ್ಲಿ 24 ರನ್​ಗಳಿಸಿದ ಆರ್ಚರ್​ ತಂಡದ ಗರಿಷ್ಠ ಸ್ಕೋರರ್​ ಆದರು.

ತಂಡದ ಉಳಿದ ಬ್ಯಾಟ್ಸ್​ಮನ್​ಗಳ ದಯನೀಯ ವೈಫಲ್ಯದಿಂದ ರಾಜಸ್ಥಾನ್ ರಾಯಲ್ಸ್​​ ತಂಡ ಹೀನಾಯ ಸೋಲು ಕಂಡಿತು.

ನಾಯಕ ಸ್ಟಿವ್ ಸ್ಮಿತ್​ 6, ಯಶಸ್ವಿ ಜೈಸ್ವಾಲ್​ 0 ​, ಸಂಜು ಸಾಮ್ಸನ್​ 0, ಲ್ಯಾಮ್ರೊರ್​ 11, ಟಾಮ್ ಕರ್ರನ್ 15, ರಾಹುಲ್ ತೆವಾಟಿಯಾ 5 ಶ್ರೇಯಸ್ ಗೋಪಾಲ್ 1, ಅಂಕಿತ್ ರಜಪೂತ್​ 2 ರನ್​ ಗಳಿಸಿ ವಿಕೆಟ್​ ಒಪ್ಪಿಸಿದರು.

ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಪರ ಜಸ್ಪ್ರೀತ್ ಬುಮ್ರಾ 20 ರನ್​ಗಳಿಗೆ 4 ವಿಕೆಟ್​, ಟ್ರೆಂಟ್ ಬೌಲ್ಟ್​ 26ಕ್ಕೆ 2 ವಿಕೆಟ್​, ಜೇಮ್ಸ್​ ಪ್ಯಾಟಿನ್​ಸನ್​ 18 ರನ್​ಗಳಿಗೆ 2 ವಿಕೆಟ್​, ಚಹಾರ್​ ಮತ್ತು ಪೊಲಾರ್ಡ್​ ತಲಾ ಒಂದು ವಿಕೆಟ್​ ಪಡೆದು ರಾಜಸ್ಥಾನ್​ ತಂಡವನ್ನು ಆಲೌಟ್​ ಮಾಡುವಲ್ಲಿ ಯಶಸ್ವಿಯಾದರು.

79 ರನ್​ಗಳಿಸಿದ ಸೂರ್ಯಕುಮಾರ್ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದರು.