ರೋಹಿತ್ ಪವರ್​​, ಬೌಲರ್​ಗಳ ಅದ್ಭುತ ಪ್ರದರ್ಶನ... ಕೆಕೆಆರ್​ ವಿರುದ್ಧ ಮುಂಬೈಗೆ 49 ರನ್​ಗಳ ಜಯ

ಮೊದಲು ಬ್ಯಾಟಿಂಗ್ ನಡೆಸಿದ್ದ ಮುಂಬೈ ಇಂಡಿಯನ್ಸ್​ ತಂಡ ನಾಯಕ ರೋಹಿತ್ ಶರ್ಮಾರ 80 ರನ್​ ಹಾಗೂ ಸೂರ್ಯಕುಮಾರ್​ರ 47 ರನ್​ಗಳ ನೆರವಿನಿಂದ 5 ವಿಕೆಟ್​ ಕಳೆದುಕೊಂಡು 195 ರನ್​ಗಳಿಸಿತ್ತು. ಈ ಮೊತ್ತವನ್ನು ಬೆನ್ನತ್ತಿದ ಕೆಕೆಆರ್​ 20 ಓವರ್​ಗಳಲ್ಲಿ 9 ವಿಕೆಟ್​ ಕಳೆದುಕೊಂಡು 146 ರನ್​ಗಳಿಸಿ 49 ರನ್​ಗಳ ಸೋಲು ಕಂಡಿತು.

ಅಬುಧಾಬಿ:ರೋಹಿತ್ ಶರ್ಮಾರ ಸ್ಫೋಟಕ ಅರ್ಧಶತಕ ಹಾಗೂ ಬೌಲರ್​ಗಳ ಸಂಘಟಿತ ಪ್ರದರ್ಶನದ ಬಲದಿಂದ ಮುಂಬೈ ಇಂಡಿಯನ್ಸ್​ 49 ರನ್​ಗಳಿಂದ ಕೋಲ್ಕತ್ತಾ ನೈಟ್​ರೈಡರ್ಸ್​ ವಿರುದ್ಧ ಜಯಗಳಿಸಿದೆ.

ಮೊದಲು ಬ್ಯಾಟಿಂಗ್ ನಡೆಸಿದ್ದ ಮುಂಬೈ ಇಂಡಿಯನ್ಸ್​ ತಂಡ ನಾಯಕ ರೋಹಿತ್ ಶರ್ಮಾರ 80 ರನ್​ ಹಾಗೂ ಸೂರ್ಯಕುಮಾರ್​ರ 47 ರನ್​ಗಳ ನೆರವಿನಿಂದ 5 ವಿಕೆಟ್​ ಕಳೆದುಕೊಂಡು 195 ರನ್​ಗಳಿಸಿತ್ತು. ಈ ಮೊತ್ತವನ್ನು ಬೆನ್ನತ್ತಿದ ಕೆಕೆಆರ್​ 20 ಓವರ್​ಗಳಲ್ಲಿ 9 ವಿಕೆಟ್​ ಕಳೆದುಕೊಂಡು 146 ರನ್​ಗಳಿಸಿ 49 ರನ್​ಗಳ ಸೋಲು ಕಂಡಿತು.

ಕೆಕೆಆರ್​ ವಿರುದ್ಧ ಮುಂಬೈಗೆ 49 ರನ್​ಗಳ ಜಯ

ಆರಂಭದಿಂದಲೇ ಮುಂಬೈ ಬೌಲರ್​ಗಳು ಕೋಲ್ಕತ್ತಾ ನೈಟ್​ ರೈಡರ್ಸ್​ ಬ್ಯಾಟ್ಸ್​ಮನ್​ಗಳ ಮೇಲುಗೈ ಸಾಧಿಸಿದರು. ಆರಂಭಿಕನಾಗಿ ಬಡ್ತಿ ಪಡೆದಿದ್ದ ಶುಬ್ಮನ್ ಗಿಲ್​ 11 ಎಸೆತಗಳಲ್ಲಿ ಕೇವಲ 7 ರನ್​ಗಳಿಸಿ ಬೌಲ್ಟ್​ ಓವರ್​ನಲ್ಲಿ ಪೊಲಾರ್ಡ್​ಗೆ ಕ್ಯಾಚ್ ​ನೀಡಿ ಔಟಾದರೆ, ನರೈನ್​ 10 ಎಸೆತಗಳಲ್ಲಿ 9 ರನ್​ಗಳಿಸಿ ಪ್ಯಾಟಿನ್ಸನ್​ಗೆ ವಿಕೆಟ್​ ಒಪ್ಪಿಸಿದರು.

ನಂತರ ಬಂದ ನಾಯಕ ದಿನೇಶ್ ಕಾರ್ತಿಕ್​(30) ಹಾಗೂ ನಿತೀಶ್​ ರಾಣಾ(24) 3ನೇ ವಿಕೆಟ್​ಗೆ 46 ರನ್​ಗಳ ಜೊತೆಯಾಟ ನಡೆಸಿ ಚೇತರಿಕೆ ನೀಡಲು ಪ್ರಯತ್ನಿಸಿದರು. ಆದರೆ ದಿನೇಶ್​ ಕಾರ್ತಿಕ್​ರನ್ನು ರಾಹುಲ್ ಚಹಾರ್​ ಎಲ್​ಬಿಡಬ್ಲಯೂ ಬಲೆಗೆ ಬೀಳಿಸಿದರು. ಮುಂದಿನ ಓವರ್​ನಲ್ಲೇ ಪೊಲಾರ್ಡ್​ ಓವರ್​ನಲ್ಲಿ ರಾಣಾ ಕೂಡ ಹಾರ್ದಿಕ್ ಪಾಂಡ್ಯಗೆ ಕ್ಯಾಚ್​ ನೀಡಿ ಔಟಾದರು.

ಕೆಕೆಆರ್​ನ ಬರವಸೆಯ ಬ್ಯಾಟ್ಸ್​ಮನ್​ಗಳಾ ಮಾರ್ಗನ್​ ಹಾಗೂ ಆ್ಯಂಡ್ರೆ ರಸೆಲ್​ ಕೂಡ ಮುಂಬೈ ಬೌಲರ್​ಗಳ ಮುಂದೆ ಮಂಕಾದರು. ಮಾರ್ಗನ್​ 20 ಎಸೆತಗಳಲ್ಲಿ 16 ಹಾಗೂ ರಸೆಲ್ 11 ಎಸೆತಗಳಲ್ಲಿ 11 ರನ್​ಗಳಿಸಿ ಬುಮ್ರಾರ ಒಂದೇ ಓವರ್​ನಲ್ಲಿ ಪೆವಿಲಿಯನ್ಸ್​ ಸೇರಿಕೊಂಡರು.

8 ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​ ಬಂದ ಪ್ಯಾಟ್​ ಕಮ್ಮಿನ್ಸ್​ ಸೋಲುವುದು ಖಚಿತವಾಗಿದ್ದರೂ, ಶ್ರೇಷ್ಠ ವೇಗಿ ಬುಮ್ರಾರ ಒಂದೇ ಓವರ್​ನಲ್ಲಿ 4 ಸಿಕ್ಸರ್​ ಸಿಡಿಸಿ ಮಂಕಾಗಿದ್ದ ಪಂದ್ಯಕ್ಕೆ ಚೈತ್ಯ ನೀಡಿದರು. ಅವರು 12 ಎಸೆತಗಳಲ್ಲಿ 4 ಸಿಕ್ಸರ್​ ಹಾಗೂ ಒಂದು ಬೌಂಡರಿ ಸಹಿತ 33 ರನ್​ಗಳಿಸಿ ಔಟಾದರು. ಒಟ್ಟಾರೆ 20 ಓವರ್​ಗಳಲ್ಲಿ ಕೋಲ್ಕತ್ತಾ ತಂಡ 146 ರನ್​ಗಳಿಸಲಷ್ಟೇ ಶಕ್ತವಾಗಿ ಸೋಲೊಪ್ಪಿಕೊಂಡಿತು.

ಮುಂಬೈ ಇಂಡಿಯನ್ಸ್​ ಪರ ಟ್ರೆಂಟ್ ಬೌಲ್ಟ್ 30/​ 2, ಜೇಮ್ಸ್​ ಪ್ಯಾಟಿನ್ಸನ್​ 25/2, ಬುಮ್ರಾ 32/2, ರಾಹುಲ್ ಚಹಾರ್​ 26ಕ್ಕೆ2. ಹಾಗೂ ಪೊಲಾರ್ಡ್​ 21 ರನ್​ ನೀಡಿ 1 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಇದಕ್ಕೂ ಮೊದಲು ಸ್ಫೋಟಕ ಬ್ಯಾಟಿಂಗ್​ ನಡೆಸಿದ್ದ ರೋಹಿತ್​ ಶರ್ಮಾ 54 ಎಸೆತಗಳಲ್ಲಿ 6 ಸಿಕ್ಸ್​ ಹಾಗೂ 3 ಬೌಂಡರಿ ಸಹಿತ 80 ರನ್​, ಹಾಗೂ ಸೂರ್ಯಕುಮಾರ್​ ಯಾದವ್​ 28 ಎಸೆತಗಳಿಂದ 47 ರನ್​ಗಳಿಸಿ 195 ರನ್​ಗಳಿಸಲು ನೆರವಾಗಿದ್ದರು.