ಗಯಾನ:ಭಾರತ ತಂಡದ ಸ್ಫೋಟಕ ದಾಂಡಿಗ ರೋಹಿತ್ ಶರ್ಮಾ ಇಂದು ತಮ್ಮ ಇನ್ಸ್ಸ್ಟಾಗ್ರಾಂನಲ್ಲಿ ಕ್ರಿಸ್ ಗೇಲ್ ಜೊತೆಗಿರುವ ಫೋಟೋ ಶೇರ್ ಮಾಡಿಕೊಂಡಿದ್ದು, ಸಾಮಾಜಿಕ ಜಾಲಾತಾಣದಲ್ಲಿ ವೈರಲ್ ಆಗುತ್ತಿದೆ.
ಹೌದು, ಹಿಟ್ಮ್ಯಾನ್ ಎರಡನೇ ಟಿ-20 ವೇಳೆ ಕ್ರಿಸ್ಗೇಲ್ ದಾಖಲೆ ಬ್ರೇಕ್ ಮಾಡಿ ಟಿ-20 ಕ್ರಿಕೆಟ್ನಲ್ಲಿ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದ ದಾಖಲೆಗೆ ಪಾತ್ರರಾಗಿದ್ದರು. ಇದೀಗ ವಿದಾಯದಂಚಿನಲ್ಲಿರುವ ಕ್ರಿಸ್ ಗೇಲ್ ಜೊತೆಯಿರುವ ಫೋಟೋ ಶೇರ್ ಮಾಡಿಕೊಂಡಿದ್ದು, ಅದರಲ್ಲಿ ಇಬ್ಬರು ಸ್ಫೋಟಕ ಬ್ಯಾಟ್ಸ್ಮನ್ಗಳು 45 ನಂಬರ್ ಇರುವ ಜರ್ಸಿ ತೊಟ್ಟಿರುವುದು ವಿಶೇಷ.
ಕ್ರಿಸ್ ಗೇಲ್ ಬಹುತೇಕ ಟಿ-20 ಲೀಗ್ಗಳಲ್ಲಿ 333 ನಂಬರ್ ಇರುವ ಜರ್ಸಿಯನ್ನು ತೊಡುತ್ತಾರೆ. ಆದರೆ, ತವರು ದೇಶವನ್ನು ಪ್ರತಿನಿಧಿಸುವ ವೇಳೆ ಮಾತ್ರ 45 ನಂಬರ್ ಇರುವ ಜರ್ಸಿ ತೊಡುತ್ತಾರೆ. ಆದ್ದರಿಂದ ಇಂದಿನ ಪಂದ್ಯದಲ್ಲಿ ಈ ಇಬ್ಬರು ಸ್ಪೋಟಕ ದಾಂಡಿಗರು ಒಂದೇ ನಂಬರ್ ಇರುವ ಜರ್ಸಿಯಲ್ಲಿ ಕಣಕ್ಕಿಳಿಯಲಿದ್ದಾರೆ. ಇದೇ ಫೋಟೋವನ್ನು ವೆಸ್ಟ್ ಇಂಡೀಸ್ ಕ್ರಿಕೆಟ್ ಮಂಡಳಿಯೂ ಶೇರ್ ಮಾಡಿಕೊಂಡಿದ್ದು, ಈ ಇಬ್ಬರಲ್ಲಿ ನಿಮ್ಮ ನೆಚ್ಚಿನ 45 ಯಾರು ಎಂದು ಟ್ಯಾಗ್ಲೈನ್ ಹಾಕಿ ಪೋಸ್ಟ್ ಮಾಡಿಕೊಂಡಿದೆ.
ರೋಹಿತ್ ಹಾಗೂ ಗೇಲ್ ಸ್ಫೋಟಕ ಆಟಕ್ಕೆ ಹೆಸರುವಾಸಿಯಾಗಿದ್ದು, ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್ನಲ್ಲಿ ಇಬ್ಬರು ಧ್ವಿಶತಕ ಸಾಧನೆ ಮಾಡಿದ್ದಾರೆ. ಇನ್ನು ಸಿಕ್ಸರ್ಗಳ ದಾಖಲೆಯಲ್ಲೂ ಇಬ್ಬರೂ ಟಾಪ್ 5ರಲ್ಲಿದ್ದಾರೆ. 529 ಸಿಕ್ಸರ್ ಸಿಡಿಸಿರುವ ಗೇಲ್ ಮೊದಲ ಸ್ಥಾನದಲ್ಲಿದ್ದರೆ, ರೋಹಿತ್ ಶರ್ಮಾ 378 ಸಿಕ್ಸರ್ ಸಿಡಿಸಿ 4 ನೇ ಸ್ಥಾನದಲ್ಲಿದ್ದಾರೆ.
