ಇಂಡಿಯಾ ವರ್ಸಸ್​​ ದಕ್ಷಿಣ ಆಫ್ರಿಕಾ: ಹ್ಯಾಂಡ್​ಶೇಕ್​ ಮಾಡಲ್ವಂತೆ ಆಫ್ರಿಕಾದ ಪ್ಲೇಯರ್ಸ್​!

ಭಾರತ-ದಕ್ಷಿಣ ಆಫ್ರಿಕಾ ತಂಡಗಳ ನಡುವಿನ ಕ್ರಿಕೆಟ್​ ಸರಣಿಗೂ ಕೊರೊನಾ ವೈರಸ್​ ಭೀತಿ ತಗುಲಿದ್ದು, ಆಫ್ರಿಕಾ ತಂಡದ ಪ್ಲೇಯರ್ಸ್​ ಯಾವುದೇ ಕಾರಣಕ್ಕೂ ಟೀಂ ಇಂಡಿಯಾ ಆಟಗಾರರೊಂದಿಗೆ ಹ್ಯಾಂಡ್​ಶೇಕ್​ ಮಾಡಲ್ಲ ಎಂದಿದ್ದಾರೆ.

ಮುಂಬೈ:ಮಾರ್ಚ್​ 12ರಿಂದ ಭಾರತ-ದಕ್ಷಿಣ ಆಫ್ರಿಕಾ ತಂಡಗಳ ನಡುವೆ ಮೂರು ಏಕದಿನ ಪಂದ್ಯಗಳ ಕ್ರಿಕೆಟ್​ ಸರಣಿ ಆರಂಭಗೊಳ್ಳಲಿದ್ದು, ಅದಕ್ಕಾಗಿ ಉಭಯ ತಂಡಗಳು ಸಜ್ಜುಗೊಂಡಿವೆ.

ಇದರ ಮಧ್ಯೆ ಕೊರೊನಾ ವೈರಸ್​ ಭೀತಿ ಹೆಚ್ಚಾಗಿದ್ದು, ಮಹಾಮಾರಿಯಿಂದ ದೂರು ಉಳಿಯುವ ಉದ್ದೇಶದಿಂದ ಪ್ಲೇಯರ್ಸ್​ ಜತೆ ಹ್ಯಾಂಡ್​ಶೇಕ್​ ಮಾಡಲು ಆಫ್ರಿಕಾ ಪ್ಲೇಯರ್ಸ್​ ಹಿಂದೇಟು ಹಾಕುತ್ತಿದ್ದಾರೆ. ಇದಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿರುವ ದಕ್ಷಿಣ ಆಫ್ರಿಕಾ ತಂಡದ ಕೋಚ್​​ ಮಾರ್ಕ್​ ಬೌಚರ್​, ಭಾರತದಲ್ಲೂ ಕೆಲವೊಂದು ಕೊರೊನಾ ಪ್ರಕರಣಗಳು ಪತ್ತೆಯಾಗಿರುವ ಕಾರಣ ತಾವು ಈ ನಿರ್ಧಾರ ಕೈಗೊಂಡಿರುವುದಾಗಿ ತಿಳಿಸಿದ್ದಾರೆ.

ಭಾರತದಲ್ಲಿ ಇಲ್ಲಿಯವರೆಗೆ 43 ಶಂಕಿತ ಪ್ರಕರಣ ಕಂಡು ಬಂದಿದ್ದು, ದಿನದಿಂದ ದಿನಕ್ಕೆ ಇದರಲ್ಲಿ ಏರಿಕೆಯಾಗುತ್ತಿದೆ. ಏಕದಿನ ಸರಣಿಯಲ್ಲಿ ಭಾಗಿಯಾಗಲು ಈಗಾಗಲೇ ಭಾರತಕ್ಕೆ ಆಗಮಿಸಿರುವ ದಕ್ಷಿಣ ಆಫ್ರಿಕಾ ತಂಡ ನಾಳೆಯಿಂದ ಅಭ್ಯಾಸ ನಡೆಸಲಿದೆ.

ಆಸ್ಟ್ರೇಲಿಯಾ ವಿರುದ್ಧ ಮುಕ್ತಾಯಗೊಂಡಿರುವ ಏಕದಿನ ಸರಣಿಯಲ್ಲಿ ದಕ್ಷಿಣ ಆಫ್ರಿಕಾ ತಂಡ ಪಾರಮ್ಯ ಮೆರೆದಿದ್ದು, ಮೂರು ಪಂದ್ಯಗಳಲ್ಲಿ ಗೆಲುವು ದಾಖಲು ಮಾಡುವ ಮೂಲಕ ಸರಣಿ ವೈಟ್​ವಾಶ್​ ಮಾಡಿದೆ. ಇದೇ ಆತ್ಮವಿಶ್ವಾಸದಲ್ಲಿ ಹರಿಣಗಳ ತಂಡ ಭಾರತದ ವಿರುದ್ಧ ಕಣಕ್ಕಿಳಿಯಲಿದ್ದು, ಭಾರತದ ಮೇಲೆ ಸವಾರಿ ನಡೆಸುವ ಸಾಧ್ಯತೆ ಇದೆ.