ಮಳೆಗಾಹುತಿಯಾದ ಇಂಡಿಯಾ - ಇಂಗ್ಲೆಂಡ್​ ಸೆಮಿಫೈನಲ್​... ಫೈನಲ್​ಗೆ ಲಗ್ಗೆ ಹಾಕಿದ ಟೀಂ ಇಂಡಿಯಾ!

ಐಸಿಸಿ ಟಿ-20 ಮಹಿಳಾ ವಿಶ್ವಕಪ್​​ನಲ್ಲಿ ಇದೇ ಮೊದಲ ಬಾರಿಗೆ ಟೀಂ ಇಂಡಿಯಾ ಮಹಿಳಾ ಪಡೆ ಫೈನಲ್​ಗೆ ಪ್ರವೇಶ ಪಡೆದುಕೊಂಡಿದೆ.

ಸಿಡ್ನಿ:ಐಸಿಸಿ ಮಹಿಳಾ ಟಿ-20ಯ ಇಂಗ್ಲೆಂಡ್​-ಇಂಡಿಯಾ ನಡುವಿನ ಪಂದ್ಯ ಮಳೆಯಿಂದ ರದ್ದುಗೊಂಡಿರುವ ಕಾರಣ, ನಂಬರ್​ 1 ಸ್ಥಾನದಲ್ಲಿದ್ದ ಹರ್ಮನ್​​ ಪ್ರೀತ್​ ಕೌರ್​ ನೇತೃತ್ವದ ಮಹಿಳಾ ತಂಡ ಫೈನಲ್​ಗೆ ಲಗ್ಗೆ ಹಾಕಿದೆ.

ಇಂದು ಭಾರತ-ಇಂಗ್ಲೆಂಡ್​ ನಡುವೆ ಸೆಮಿಫೈನಲ್​ ಪಂದ್ಯ ನಡೆಬೇಕಾಗಿತ್ತು. ಆದರೆ, ಬೆಳಗ್ಗೆಯಿಂದ ನಿರಂತರವಾಗಿ ಮಳೆ ಸುರಿದ ಕಾರಣ ಪಂದ್ಯ ರದ್ದುಗೊಳಿಸಲಾಯಿತು. ಲೀಗ್​ ಪಂದ್ಯದಲ್ಲಿ ತಾನಾಡಿರುವ ಎಲ್ಲ ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದ ಮಹಿಳಾ ಪಡೆ ಅಂಕಪಟ್ಟಿಯಲ್ಲಿ ನಂಬರ್​ 1ಸ್ಥಾನದಲ್ಲಿದ್ದ ಕಾರಣ ಫೈನಲ್​ಗೆ ಪ್ರವೇಶ ಪಡೆದುಕೊಂಡಿದೆ.

ಐಸಿಸಿ ಟಿ-20 ಕ್ರಿಕೆಟ್​ನ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಟೀಂ ಇಂಡಿಯಾ ಫೈನಲ್​ ಪ್ರವೇಶ ಪಡೆದುಕೊಂಡು ದಾಖಲೆ ನಿರ್ಮಾಣ ಮಾಡಿದೆ. ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿರುವ ಕ್ಯಾಪ್ಟನ್​ ಹರ್ಮನ್​ ಪ್ರೀತ್​ ಕೌರ್​, ಲೀಗ್​ನಲ್ಲಿ ನಾವು ಎಲ್ಲ ಪಂದ್ಯಗಳಲ್ಲಿ ಗೆಲುವು ಸಾಧಿಸಿದ್ದರಿಂದ ಇವತ್ತು ಫೈನಲ್​ಗೆ ಪ್ರವೇಶ ಪಡೆದುಕೊಂಡಿದ್ದೇವೆ ಎಂದಿದ್ದಾರೆ.

ಮತ್ತೊಂದು ಸೆಮಿಫೈನಲ್​ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ- ಆಸ್ಟ್ರೇಲಿಯಾ ಮುಖಾಮುಖಿಯಾಗಲಿದ್ದು, ಗೆಲುವ ತಂಡ ಭಾರತದೊಂದಿಗೆ ಸೆಣಸಾಟ ನಡೆಸಲಿದೆ.