ಭಾರತ ಮಹಿಳಾ ಎಮರ್ಜಿಂಗ್​​​ ತಂಡಕ್ಕೆ ಚೊಚ್ಚಲ ಏಷ್ಯಾ ಕಪ್​​​​ ಮುಕುಟ

ಭಾರತ, ಶ್ರೀಲಂಕಾ, ಪಾಕಿಸ್ತಾನ ಹಾಗೂ ಬಾಂಗ್ಲಾದೇಶ ಮಹಿಳಾ ಎಮರ್ಜಿಂಗ್ ಕ್ರಿಕೆಟ್​​ ತಂಡಗಳ ನಡುವೆ ಶ್ರೀಲಂಕಾದಲ್ಲಿ ನಡೆದ ಚೊಚ್ಚಲ ಮಹಿಳಾ ಎಮರ್ಜಿಂಗ್​(ಅಂಡರ್​ 23) ಏಷ್ಯಾ ಕಪ್ ಟ್ರೋಫಿಯನ್ನು ದೇವಿಕಾ ವೈವಿದ್ಯ ನೇತೃತ್ವದಲ್ಲಿ ಭಾರತ ತಂಡ ಮುಡಿಗೇರಿಸಿಕೊಂಡಿದೆ.

ಕೊಲೊಂಬೊ: ಭಾರತ ಎಮರ್ಜಿಂಗ್(U23)​ ಮಹಿಳಾ ಕ್ರಿಕೆಟ್​ ತಂಡ ಶ್ರೀಲಂಕಾದಲ್ಲಿ ನಡೆದ ಚೊಚ್ಚಲ ಮಹಿಳಾ ಎಮರ್ಜಿಂಗ್​ ​ಏಷ್ಯಾ ಕಪ್ ಟ್ರೋಫಿಯನ್ನು​ ಜಯಿಸುವಲ್ಲಿ ಯಶಸ್ವಿಯಾಗಿದೆ.

ನಾಲ್ಕು ತಂಡಗಳು ಭಾಗವಹಿಸಿದ್ದ ಈ ಏಷ್ಯಾ ಕಪ್​ನಲ್ಲಿ ಭಾರತ ತಂಡ ಫೈನಲ್​ನಲ್ಲಿ ಶ್ರೀಲಂಕಾ ತಂಡವನ್ನು ಡಿಎಲ್​ ನಿಯಮದನ್ವಯ 14 ರನ್​ಗಳಿಂದ ಮಣಿಸಿ ಚಾಂಪಿಯನ್​ ಆಗಿ ಹೊರಹೊಮ್ಮಿದೆ.

ಟಾಸ್ ಗೆದ್ದ ಭಾರತ ಎಮರ್ಜಿಂಗ್​ ಮಹಿಳಾ ತಂಡ ಮೊದಲು ಬ್ಯಾಟಿಂಗ್ ಮಾಡಿದ 50 ಓವರ್​ಗಳಲ್ಲಿ 9 ವಿಕೆಟ್​ಗೆ 175 ರನ್ ಕಲೆಹಾಕಿತು. ತನುಶ್ರೀ ಸರ್ಕಾರ್​ 47 ರನ್, ಸಿಮ್ರಾನ್​ ಬಹದ್ದೂರ್​ 34 ಹಾಗೂ ಮನಾಲಿ ದಕ್ಷಿಣಿ 18 ರನ್ ​ಗಳಿಸಿ 175 ರನ್​ಗಳ ಸ್ಪರ್ಧಾತ್ಮಕ ಮೊತ್ತ ದಾಖಲಿಸಲು ನೆರವಾದರು.

ಶ್ರೀಲಂಕಾ ಪರ ಕವಿತಾ ದಿಲ್ಹರಿ 3 ವಿಕೆಟ್​, ಸಚಿನಿ ನಿಸನ್ಸಾಲ 2, ಸತ್ಯ ಸಂದೀಪನಿ, ಉಮೇಶ ತಿಮಶಿನಿ, ಮದುಶಿಕ ಮೆತಟಾನಂದ ತಲಾ ಒಂದು ವಿಕೆಟ್​ ಪಡೆದು ಭಾರತವನ್ನು ಅಲ್ಪ ಮೊತ್ತಕ್ಕೆ ಕಟ್ಟಿಹಾಕಿದರು.

176 ರನ್​ಗಳ ಟಾರ್ಗೆಟ್​ ಬೆನ್ನತ್ತಿದ ಶ್ರೀಲಂಕಾ ಎಮಿರ್ಜಿಂಗ್​ ಮಹಿಳಾ ತಂಡ 43 ರನ್​ಗಳಿಗೆ 5 ವಿಕೆಟ್​​ ಕಳೆದುಕೊಂಡಿದ್ದ ವೇಳೆ ಮಳೆ ಬಂದಿತ್ತು. ನಂತರ ಡಿಎಲ್​ ನಿಯಮದನ್ವಯ 149 ರನ್​ಗಳ ಟಾರ್ಗೆಟ್​ ನೀಡಲಾಗಿತ್ತು.

ಆದರೆ ಶ್ರೀಲಂಕಾ ತಂಡ 34.3 ಓವರ್​ಗಳಲ್ಲಿ 135 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ 14 ರನ್​ಗಳ ಸೋಲನುಭವಿಸಿತು. ಶ್ರೀಲಂಕಾ ಪರ ನಾಯಕಿ ಹರ್ಷಿತಾ ಮಾದವಿ 39, ಲಿಹಿನಿ ಅಪ್ಸರಾ 22, ಮದುಶಿಕ ಮೆತಟಾನಂದ 25 ರನ್​ ಗಳಿಸಿ ಹೋರಾಟ ನಡೆಸಿದರೂ ಸೋಲಿನಿಂದ ತಪ್ಪಿಸಿಕೊಳ್ಳಲಾಗಲಿಲ್ಲ.