ಮಿಂಚಿದ ಶಿವಂ ದುಭೆ,ನದೀಮ್​; ವಿಂಡೀಸ್​ ಎ ವಿರುದ್ಧ ಭಾರತ ಎ ತಂಡಕ್ಕೆ 6 ವಿಕೆಟ್​ಗಳ ಜಯ

ವೆಸ್ಟ್​ ಇಂಡೀಸ್​ ವಿರುದ್ಧ ನಡೆದ ಮೊದಲ ಅನಧಿಕೃತ ಟೆಸ್ಟ್​ನಲ್ಲಿ ಭಾರತ ಎ ತಂಡ 6 ವಿಕೆಟ್​ಗಳ ಜಯ ಸಾಧಿಸಿ ಸರಣಿಯಲ್ಲಿ 1-0 ಯಲ್ಲಿ ಮುನ್ನಡೆ ಸಾಧಿಸಿದೆ.

ಆಂಟಿಗುವಾ: ಏಕದಿನ ಸರಣಿಯನ್ನು 4-1ರ ಅಂತರದಲ್ಲಿ ಗೆದ್ದಿದ್ದ ಭಾರತ ಎ ತಂಡ 3 ಪಂದ್ಯಗಳ ಟೆಸ್ಟ್​ ಸರಣಿಯಲ್ಲಿ ಮೊದಲ ಪಂದ್ಯವನ್ನು 6 ವಿಕೆಟ್​ಗಳಿಂದ ಗೆದ್ದು ಬೀಗಿದೆ.

ಜುಲೈ 24 ರಿಂದ ಆರಂಭವಾಗಿದ್ದ ಮೊದಲನೇ ಅನಧಿಕೃತ ಟೆಸ್ಟ್​ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್​ ನಡೆಸಿದ್ದ ವಿಂಡೀಸ್​ ಮೊದಲ ಇನ್ನಿಂಗ್ಸ್​ನಲ್ಲಿ 228 ರನ್​ ಗಳಿಸಿತ್ತು. ಜರ್ಮೈನ್​ ಬ್ಲಾಕ್​ವುಡ್​ 53, ಕಾರ್ನ್​ವಲ್​ 59 ರನ್ ​ಗಳಿಸಿದ್ದರು. ಭಾರತದ ಪರ ಶಹಬಾಜ್​​ ನದೀಮ್​ 5 ವಿಕೆಟ್ ಹಾಗೂ ಸಿರಾಜ್​ 2,ಮಾರ್ಕಂಡೆ 2 ವಿಕೆಟ್ ಪಡೆದು ಮಿಂಚಿದ್ದರು.

ಈ ಮೊತ್ತವನ್ನು ಹಿಂಬಾಲಿಸಿದ್ದ ಭಾರತ ತಂಡ ಶಿವಂ ದುಭೆ(71), ಸಹಾ(66) ಅರ್ಧಶತಕಗಳ ಬೆಂಬಲದಿಂದ 312 ರನ್​ಗಳಿಸಿತ್ತು. ವಿಂಡೀಸ್​ ಮಿಗುಯಲ್​ ಕಮ್ಮಿನ್ಸ್​ 4 ವಿಕೆಟ್​ ಪಡೆದರೆ ಚೆಮರ್​ ಹೋಲ್ಡರ್​, ಜೊಮೆಲ್​ ವಾರಿಕ್ಯಾನ್​, ಕಾರ್ನವಲ್​ ತಲಾ 2 ವಿಕೆಟ್​ ಪಡೆದಿದ್ದರು.

ಎರಡೂ ಇನ್ನಿಂಗ್ಸ್​ನಲ್ಲೂ 5 ವಿಕೆಟ್​ ಪಡೆದು ಮಿಂಚಿದ ಭಾರತ ಎ ತಂಡದ ಶಹಬಾಜ್​ ನದೀಮ್​

84 ರನ್​ಗಳ ಹಿನ್ನಡೆಯೊಂದಿಗೆ ತನ್ನ ಎರಡನೇ ಇನ್ನಿಂಗ್ಸ್​ ಆರಂಭಿಸಿದ ವಿಂಡೀಸ್​ ತನ್ನ ನದೀಮ್​ ದಾಳಿಗೆ ತತ್ತರಿಸಿ 180 ರನ್​ಗಳಿಗೆ ಸರ್ವಪತನ ಕಂಡಿತು. 53 ರನ್​ಗಳಿಸಿದ ಶಮಾರ್​ ಬ್ರೋಕ್ಸ್​ ಗರಿಷ್ಠ ಸ್ಕೋರರ್ ಎನಿಸಿದರು. ನದೀಮ್​ 5 ವಿಕೆಟ್​, ಸಿರಾಜ್​ 3 ಹಾಗೂ ದುಬೆ 1 ವಿಕೆಟ್​ ಪಡೆದು ಮಿಂಚಿದರು.

97 ರನ್​ಗಳ ಗುರಿ ಪಡೆದ ಭಾರತ ಎ ತಂಡ 4 ವಿಕೆಟ್​ ಕಳೆದುಕೊಂಡು ಗುರಿ ಮುಟ್ಟಿತು. ಈ ವಿಜಯದೊಂದಿಗೆ 3 ಪಂದ್ಯಗಳ ಅನಧಿಕೃತ ಟೆಸ್ಟ್​ ಸರಣಿಯಲ್ಲಿ 1-0 ಯಲ್ಲಿ ಮುನ್ನಡೆ ಸಾಧಿಸಿತು.