ಸಿಡ್ನಿ:ಐಸಿಸಿ ಟಿ-20 ವಿಶ್ವಕಪ್ನ ಮೊದಲ ಪಂದ್ಯದಲ್ಲಿ ಭಾರತದ ಮಹಿಳಾ ತಂಡ ಹಾಲಿ ವಿಶ್ವ ಚಾಂಪಿಯನ್ ಕಾಂಗರೂ ಪಡೆ ಮೇಲೆ ಸವಾರಿ ನಡೆಸಿದ್ದು, 17ರನ್ಗಳ ಗೆಲುವು ದಾಖಲು ಮಾಡುವ ಮೂಲಕ ಟೂರ್ನಿಯಲ್ಲಿ ಗೆಲುವಿನೊಂದಿಗೆ ಶುಭಾರಂಭ ಮಾಡಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ 20 ಓವರ್ಗಳಲ್ಲಿ 4 ವಿಕೆಟ್ನಷ್ಟಕ್ಕೆ 132ರನ್ ಗಳಿಕೆ ಮಾಡಿತು. ಬ್ಯಾಟಿಂಗ್ ವೈಫಲ್ಯದ ನಡುವೆಯೂ ದೀಪ್ತಿ ಶರ್ಮಾ (49*) ಹಾಗೂ ಶಫಾಲಿ ವರ್ಮಾ (29) ಉಪಯುಕ್ತ ಕೊಡುಗೆ ನೀಡಿದರು.
133 ರನ್ಗಳ ಗುರಿ ಬೆನ್ನಟ್ಟಿದ್ದ ಆಸ್ಟ್ರೇಲಿಯಾ ತಂಡ ಆರಂಭದಲ್ಲೇ ವಿಕೆಟ್ ಕಳೆದುಕೊಂಡರೂ ಸುಲಭ ಗೆಲುವು ದಾಖಲು ಮಾಡುವ ಕನಸು ಕಾಣುತ್ತಿತ್ತು. ಆದರೆ, ಇದಕ್ಕೆ ಬ್ರೇಕ್ ಹಾಕಿದ ಪೂನಂ ಯಾದವ್ 19ರನ್ ನೀಡಿ 4ವಿಕೆಟ್ ಪಡೆದುಕೊಂಡು ಎದುರಾಳಿ ತಂಡಕ್ಕೆ ಬ್ರೇಕ್ ಹಾಕಿದರು.
ಆರಂಭಿಕ ಆಟಗಾರ್ತಿ ಹೆಲ್ಸ್ 51ರನ್, ಗ್ರೆಂಡ್ನರ್ 34ರನ್ಗಳಿಕೆ ಮಾಡಿದ್ರೆ, ಉಳಿದ ಯಾವುದೇ ಪ್ಲೇಯರ್ ಎರಡಂಕ್ಕಿ ರನ್ಗಳಿಕೆ ಮಾಡಲಿಲ್ಲ. ಹೀಗಾಗಿ ತಂಡ ಕೊನೆಯದಾಗಿ 19.5 ಓವರ್ಗಳಲ್ಲಿ ತನ್ನೆಲ್ಲ ವಿಕೆಟ್ ಕಳೆದುಕೊಂಡು 115ರನ್ಗಳಿಕೆ ಮಾಡಿದ್ದರಿಂದ 17ರನ್ಗಳ ಸೋಲು ಕಾಣುವಂತಾಯಿತು. ಭಾರತದ ಪರ ಮಾರಕ ಬೌಲಿಂಗ್ ಪ್ರದರ್ಶನ ನೀಡಿದ ಪೂನಂ ಯಾದವ್ 4ವಿಕೆಟ್ ಪಡೆದುಕೊಂಡರೆ, ಶಿಖಾ ಪಾಂಡೆ 3, ರಾಜೇಶ್ವರಿ ಗಾಯ್ಕವಾಡ್ 1ವಿಕೆಟ್ ಪಡೆದುಕೊಂಡರು.
ಚೊಚ್ಚಲ ಪ್ರಶಸ್ತಿಗೆ ಮುತ್ತಿಕ್ಕುವ ವಿಶ್ವಾಸದೊಂದಿಗೆ ಕಣಕ್ಕಿಳಿದಿರುವ ಹರ್ಮನ್ ಪ್ರೀತ್ ಕೌರ್ ತಂಡ ಮೊದಲ ಪಂದ್ಯದಲ್ಲೇ ಗೆಲುವು ದಾಖಲು ಮಾಡುವ ಮೂಲಕ ಪ್ರಶಸ್ತಿ ಗೆಲುವಿನ ಕನಸು ಮತ್ತಷ್ಟು ಇಮ್ಮಡಿಗೊಳಿಸಿಕೊಂಡಿದೆ.
