ಸಿಡ್ನಿ: ಆಸ್ಟ್ರೇಲಿಯಾದ ಸ್ಪಿನ್ನರ್ ನಥನ್ ಲಿಯಾನ್ ಐಸಿಸಿಯ ನಾಲ್ಕು ದಿನಗಳ ಟೆಸ್ಟ್ ಯೋಜನೆಯನ್ನು ಧಿಕ್ಕರಿಸಿದ ಬೆನ್ನಲ್ಲೇ ಆಸೀಸ್ ಮಾಜಿ ವೇಗಿ ಗ್ಲೆನ್ ಮೆಕ್ಗ್ರಾಕ್ ಕೂಡ ವಿರೋಧ ವ್ಯಕ್ತಪಡಿಸಿದ್ದಾರೆ.
2023ರಿಂದ ಟೆಸ್ಟ್ ಚಾಂಪಿಯನ್‌ಷಿಪ್‌ನಲ್ಲಿ 5 ದಿನಗಳ ಬದಲಾಗಿ ನಾಲ್ಕು ದಿನಗಳ ಟೆಸ್ಟ್ ಪಂದ್ಯಗಳನ್ನು ಆಯೋಜಿಸಲು ಐಸಿಸಿ ಇತ್ತೀಚೆಗೆ ತಿಳಿಸಿತ್ತು. ಇದಕ್ಕೆ ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಯಾವುದೇ ಪ್ರತಿಕ್ರಿಯೆ ನೀಡಿರಲಿಲ್ಲ. ಆದರೆ ಇಂಗ್ಲೆಂಡ್ ಕ್ರಿಕೆಟ್ ಬೋರ್ಡ್ ಐಸಿಸಿಗೆ ಬೆಂಬಲ ನೀಡಿತ್ತು. ಆದರೆ ಮೆಕ್ಗ್ರಾತ್ ಐಸಿಸಿಯ ನಿರ್ಧಾರವನ್ನು ಸ್ಪಷ್ಟವಾಗಿ ವಿರೋಧಿಸಿದ್ದಾರೆ.
ನ್ಯೂಜಿಲ್ಯಾಂಡ್ ಹಾಗೂ ಆಸ್ಟ್ರೇಲಿಯಾ ನಡುವಿನ 3ನೇ ಟೆಸ್ಟ್ ಪಂದ್ಯಕ್ಕೂ ಮುನ್ನ ಸಿಡ್ನಿಯಲ್ಲಿ ಮಾತನಾಡಿದ ಆಸ್ಟ್ರೇಲಿಯ ಪರ 124 ಟೆಸ್ಟ್ ಪಂದ್ಯಗಳನ್ನಾಡಿರುವ ಮೆಕ್ಗ್ರಾತ್, 'ನಾನು ತುಂಬಾ ಸಂಪ್ರದಾಯವಾದಿ. ಆ ಆಟ ಈಗ ಹೇಗಿದೆಯೋ ಆಗೆಯೇ ಇರಬೇಕೆಂದು ಬಯಸುತ್ತೇನೆ' ಎಂದು ಟೆಸ್ಟ್ ಕ್ರಿಕೆಟ್ನ ಬದಲಾವಣೆಯನ್ನು ವಿರೋಧಿಸಿದ್ದಾರೆ.
'ನನ್ನ ಪ್ರಕಾರ ಐದು ದಿನಗಳ ಆಟ ವಿಶೇಷವಾದುದು. ಅದನ್ನು ಕಡಿತಗೊಳಿಸುವುದನ್ನು ನಾನು ವಿರೋಧಿಸುತ್ತೇನೆ. ಅದೇ ರೀತಿ ಪಿಂಕ್‌ ಟೆಸ್ಟ್, ಹಗಲು-ರಾತ್ರಿ ಪಂದ್ಯಗಳನ್ನು ಪರಿಚಯಿಸಿರುವುದು ಟೆಸ್ಟ್ ಕ್ರಿಕೆಟ್ನ ತಾಜಾತನವನ್ನು ಕಾಪಾಡಿಕೊಳ್ಳವುದಕ್ಕೆ ಉತ್ತಮ ಮಾರ್ಗ. ಆದರೆ, ಟೆಸ್ಟ್ನಲ್ಲಿ ದಿನಗಳನ್ನು ಕಡಿತ ಮಾಡುವುದನ್ನು ನಾನು ಖಂಡಿತಾ ವಿರೋಧಿಸುತ್ತೇನೆ ಎಂದಿದ್ದಾರೆ.
