ನಾನು ಗಂಗೂಲಿ ಫ್ಯಾನ್​: ಆದ್ರೆ ಆ ಒಂದು ವಿಷಯಕ್ಕೆ ಅವರನ್ನ ದ್ವೇಷಿಸುತ್ತೇನೆ: ನಾಸಿರ್​ ಹುಸೇನ್​

ಗಂಗೂಲಿ ನಾಯಕನಾಗಿ ಆಡುತ್ತಿರುವಾಗ ಮಾತ್ರವಲ್ಲ, ಕಳೆದ ಒಂದು ದಶಕದಿಂದ ಇಬ್ಬರು ಒಟ್ಟಿಗೆ ಕಾಮೆಂಟೇಟರ್​ ಆಗಿ ಕೆಲಸ ಮಾಡುತ್ತಿದ್ದೆವು. ಆ ಸಮಯದಲ್ಲೂ ಅವರು ತಡವಾಗಿಯೇ ಬರುತ್ತಿದ್ದರು ಎಂದು ಹೇಳಿಕೊಂಡಿದ್ದಾರೆ.

ನವದೆಹಲಿ:ಭಾರತ ತಂಡದ ಮಾಜಿ ನಾಯಕ ಸೌರವ್​ ಗಂಗೂಲಿ ಭಾರತ ಕ್ರಿಕೆಟ್​ನ ದಿಕ್ಕನ್ನೇ ಬದಲಿಸಿದವರು. ಯುವ ಕ್ರಿಕೆಟಿಗರನ್ನು ತಂಡಕ್ಕೆ ಸೇರಿಸಿ ಬಲಿಷ್ಠ ತಂಡವನ್ನು ಕಟ್ಟಿ ದೇಶದಲ್ಲೆಷ್ಟೇ ಅಲ್ಲ, ವಿದೇಶಗಳಲ್ಲೂ ಗೆಲ್ಲುವುದನ್ನು ತೋರಿಸಿಕೊಟ್ಟಿದ್ದರು.

ನಾಯಕತ್ವ ವಹಿಸಿಕೊಂಡ ಬೆನ್ನಲ್ಲೇ 2002ರಲ್ಲಿ ನಾಟ್​ವೆಸ್ಟ್​ ಸರಣಿ ಹಾಗೂ 2003ರ ವಿಶ್ವಕಪ್​ನಲ್ಲಿ ಭಾರತ ತಂಡವನ್ನು ಫೈನಲ್​ಗೆ ಕೊಂಡೊಯ್ದ ಕೀರ್ತಿ ದಾದಾ ಖ್ಯಾತಿಯ ಗಂಗೂಲಿಗೆ ಸಲ್ಲುತ್ತದೆ. ಗಂಗೂಲಿ ವರ್ಚಸ್ಸು ಹೇಗಿತ್ತೆಂದರೆ ಎದುರಾಳಿ ತಂಡದ ಆಟಗಾರರು ಕೂಡ ಪ್ರೀತಿಸುತ್ತಿದ್ದರು. ನಾಟ್​ವೆಸ್ಟ್​ ಸರಣಿಯಲ್ಲಿ ಇಂಗ್ಲೆಂಡ್​ ನಾಯಕರಾಗಿದ್ದ ನಾಸಿರ್​ ಹುಸೇನ್​ ನಾನು ದಾದಾ ಅವರ ಬಹುದೊಡ್ಡ ಅಭಿಮಾನಿ, ಅವರು ಶರ್ಟ್​ ಬಿಚ್ಚಿ ಸಂಭ್ರಮಿಸಿದ್ದ ಕ್ಷಣ ಟ್ರೆಡ್​ ಮಾರ್ಕ್​ ಎಂದು ಹೊಗಳಿದ್ದರು.

ಆದರೆ, ಅದೇ ನಾಸಿರ್​ ಹುಸೇನ್​ ಒಂದು ಕಾರಣಕ್ಕೆ ಗಂಗೂಲಿಯನ್ನು ದ್ವೇಷಿಸುತ್ತಿದ್ದೆ ಎಂದು ಹೇಳಿಕೆ ನೀಡಿದ್ದಾರೆ. ಹೌದು, ಎದುರಾಳಿ ನಾಯಕರು ಗಂಗೂಲಿಯನ್ನು ಕಂಡರೆ ದ್ವೇಷಿಸುತ್ತಿದ್ದರು. ಏಕೆಂದರೆ ಪ್ರತಿ ಪಂದ್ಯದಲ್ಲೂ ದಾದಾ ಟಾಸ್​​ಗೆ ತಡವಾಗಿ ಬಂದು, ಎದುರಾಳಿ ನಾಯಕರನ್ನು ಕಾಯಿಸುತ್ತಿದ್ದರಂತೆ. ಈ ವಿಚಾರಕ್ಕೆ ನಾನು ಅವರನ್ನು ದ್ವೇಷಿಸುತ್ತೇನೆ ಎಂದು ನಾಸಿರ್ ಹುಸೇನ್ ಐಸಿಸಿ ಲೈವ್​ ಸಂವಾದದಲ್ಲಿ ಹೇಳಿಕೊಂಡಿದ್ದಾರೆ. ಕೆಲವು ದಿನಗಳ ಹಿಂದೆ ಆಸ್ಟ್ರೇಲಿಯಾದ ಮಾಜಿ ನಾಯಕ ಸ್ಟಿವ್​ ವಾ ಕೂಡ ಇದನ್ನೇ ಹೇಳಿದ್ದರು.

ಗಂಗೂಲಿ ನಾಯಕನಾಗಿ ಆಡುತ್ತಿರುವಾಗ ಮಾತ್ರವಲ್ಲ, ಕಳೆದ ಒಂದು ದಶಕದಿಂದ ಇಬ್ಬರು ಒಟ್ಟಿಗೆ ಕಾಮೆಂಟೇಟರ್​ ಆಗಿ ಕೆಲಸ ಮಾಡುತ್ತಿದ್ದೇವೆ. ಆ ಸಮಯದಲ್ಲೂ ಅವರು ತಡವಾಗಿಯೇ ಬರುತ್ತಿದ್ದರು ಎಂದು ಹೇಳಿಕೊಂಡಿದ್ದಾರೆ.