ಹೈದರಾಬಾದ್: ಟೀಂ ಇಂಡಿಯಾ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಇಂದು 38ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. ಟೀಂ ಇಂಡಿಯಾಕ್ಕೆ 2 ವಿಶ್ವಕಪ್ ಗೆಲ್ಲಿಸಿಕೊಟ್ಟ ನಾಯಕನಿಗೆ ಭಾರತ ತಂಡದ ಸಹ ಆಟಗಾರರು ವಿಶ್ ಮಾಡಿದ್ದಾರೆ.
ಮಾಜಿ ಕ್ರಿಕೆಟ್ ಆಟಗಾರ ವಿರೇಂದ್ರ ಸೆಹ್ವಾಗ್ ಅವರು ಧೋನಿ ಜನುಮದಿನಕ್ಕೆ ಸ್ಪೆಷಲ್ ವಿಶ್ ಮಾಡಿದ್ದಾರೆ. ಪ್ರಂಚದಲ್ಲಿ ಇರುವ ಖಂಡಗಳು 7, ಕಾಮನಬಿಲ್ಲಿನಲ್ಲಿ ಇರುವ ಬಣ್ಣಗಳು 7, ಒಂದು ವಾರಕ್ಕೆ 7 ದಿನಗಳು, ಸಂಗೀತದ ಸ್ವರಗಳು 7, ಪ್ರಪಂಚದ ಅದ್ಭುತಗಳೂ 7. 7ನೇ ತಿಂಗಳ 7ನೇ ತಾರೀಖಿನಂದು ಜನಿಸಿರುವ ಕ್ರಿಕೆಟ್ ಪ್ರಪಂಚದ ಅದ್ಭುತ ಮಹೇಂದ್ರ ಸಿಂಗ್ ಧೋನಿಗೆ ಹುಟ್ಟು ಹಬ್ಬದ ಶುಭಾಶಯಗಳು ಎಂದಿದ್ದಾರೆ.
ಮಾಜಿ ಆಟಗಾರ ಮೊಹಮ್ಮದ್ ಕೈಫ್ ಕೂಡ ಟ್ವೀಟ್ ಮಾಡಿದ್ದು, 2004ರಲ್ಲಿ ಇಬ್ಬರೂ ಒಟ್ಟಿಗೆ ಬಂಗ್ಲಾದೇಶದ ವಿರುದ್ಧದ ಟೂರ್ನಿಯಲ್ಲಿ ಪಾಲ್ಗೊಂಡಿದ್ದೆವು. ನಂತರ ಪಾಕ್ ವಿರುದ್ಧದ ಟೂರ್ನಿಗೆ ಆಯ್ಕೆಯಾದೆವು. ವಿಶಾಖಪಟ್ಟಣಂನಲ್ಲಿ ನಡೆದ ಪಂದ್ಯದಲ್ಲಿ 148 ರನ್ ಸಿಡಿಸಿದ್ದ ಧೋನಿ ಮತ್ತೆ ಹಿಂದಿರುಗಿ ನೋಡಲಿಲ್ಲ. ಅವರು ವರ್ಷದಿಂದ ವರ್ಷಕ್ಕೆ ಬೆಳೆಯುತ್ತಿದ್ದಾರೆ. ಲೈಫ್ ಟೈಮ್ ಪ್ಲೇಯರ್ ಮತ್ತು ನಾಯಕನಿಗೆ ಹುಟ್ಟು ಹಬ್ಬದ ಶುಭಾಶಯಗಳು ಎಂದು ವಿಶ್ ಮಾಡಿದ್ದಾರೆ.
ಧೋನಿ ಹುಟ್ಟುಹಬ್ಬಕ್ಕೆ ಒಂದು ದಿನ ಮೊದ್ಲೇ ವಿಶ್ ಮಾಡಿದ್ದ ಐಸಿಸಿ, 3 ನಿಮಿಷಗಳ ವಿಡಿಯೋ ಮಾಡಿ ತನ್ನ ಅಧಿಕೃತ ಟ್ವಿಟ್ಟರ್ ಖಾತೆಯಲ್ಲಿ ಪೋಸ್ಟ್ ಮಾಡಿದೆ. ಧೋನಿ ಎಂಬ ಹೆಸರು ಭಾರತ ಕ್ರಿಕೆಟ್ ದಿಕ್ಕನ್ನ ಬದಲಿಸಿತು. ಆ ಹೆಸರು ಪ್ರಪಂಚದ ಲಕ್ಷಾಂತರ ಯುವ ಕ್ರಿಕೆಟಿಗರಿಗೆ ಸ್ಪೂರ್ತಿ, ಆ ಹೆಸರಿನ ಜೊತೆ ನಿರಾಕರಿಸಲಾಗದ ಪರಂಪರೆ ಇದೆ. ಎಂ.ಎಸ್. ಧೋನಿ ಅಂದ್ರೆ ಕೇವಲ ಅದೊಂದು ಹೆಸರಲ್ಲ ಎಂದು ಟ್ವಿಟ್ಟರ್ನಲ್ಲಿ ಬರೆದುಕೊಂಡಿದೆ.
ಭಾರತ ಕ್ರಿಕೆಟ್ ತಂಡಕ್ಕೆ 15 ವರ್ಷಗಳ ಕಾಲ ಸೇವೆ ಸಲ್ಲಿಸಿರುವ ಮಹೇಂದ್ರ ಸಿಂಗ್ ಧೋನಿ ವಿಶ್ವ ಕ್ರಿಕೆಟ್ನಲ್ಲಿ ಯಶಸ್ವಿ ನಾಯಕ, ಚಾಣಾಕ್ಷ ವಿಕೆಟ್ ಕೀಪರ್ ಹಾಗೂ ಬೆಸ್ಟ್ ಫಿನಿಷರ್ ಎಂದು ಖ್ಯಾತಿ ಗಳಿಸಿದ್ದಾರೆ.
