ಮೇಲುಗೈ ಸಾಧಿಸುವ ಅವಕಾಶ ಸಿಕ್ಕಿತ್ತು, ಉಳಿಸಿಕೊಳ್ಳಲಾಗಲಿಲ್ಲ: ಜೋ ರೂಟ್ ಬೇಸರ

ಪಂದ್ಯವನ್ನು ನಮ್ಮ ಪರವಾಗಿ ತಿರುಗಿಸಿಕೊಳ್ಳಲು ಮತ್ತು ಮೇಲುಗೈ ಸಾಧಿಸಲು ಒಂದು ಹಂತದಲ್ಲಿ ಅವಕಾಶವಿತ್ತು. ಆದರೆ ಅದನ್ನು ಮಾಡಲು ಸಾಧ್ಯವಾಗಲಿಲ್ಲ ಎಂದು ರೂಟ್ ಪಂದ್ಯದ ನಂತರದ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ.

ಅಹ್ಮದಾಬಾದ್​: ಭಾರತ ವಿರುದ್ಧದ 4ನೇ ಟೆಸ್ಟ್​ ಪಂದ್ಯದಲ್ಲಿ ಭಾರತ ತಂಡ ಇನ್ನಿಂಗ್ಸ್​ ಮತ್ತು 25 ರನ್​ಗಳಿಂದ ಗೆದ್ದು ಬೀಗಿದೆ. ಆದರೆ ಈ ಪಂದ್ಯದಲ್ಲಿ ಮುನ್ನಡೆ ಪಡೆದುಕೊಳ್ಳುವ ಅವಕಾಶ ನಮಗೆ ಸಿಕ್ಕಿತ್ತು, ಅದನ್ನು ಉಪಯೋಗಿಸಿಕೊಳ್ಳಲು ವಿಫಲರಾದೆವು ಎಂದು ಇಂಗ್ಲೆಂಡ್ ನಾಯಕ ಜೋ ರೂಟ್​ ಹೇಳಿದ್ದಾರೆ.

ಮೊದಲ ಇನ್ನಿಂಗ್ಸ್​ನಲ್ಲಿ 205 ರನ್​ಗಳಿಗೆ ಆಲೌಟ್​ ಆಗಿದ್ದ ಇಂಗ್ಲೆಂಡ್​, ಭಾರತ ತಂಡವನ್ನು 121 ರನ್​ಗಳಾಗುವಷ್ಟರಲ್ಲಿ ಪ್ರಮುಖ ಬ್ಯಾಟ್ಸ್​ಮನ್​ಗಳ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾಗಿತ್ತು. ಆದರೆ ಈ ಅವಕಾಶವನ್ನು ರಿಷಭ್​ ಪಂತ್​ (101), ವಾಷಿಂಗ್ಟನ್ ಸುಂದರ್ ​(96) ಮತ್ತು ಅಕ್ಷರ್ ಪಟೇಲ್ (43) ಇಂಗ್ಲೆಂಡ್​ ಕೈಯಿಂದ ಕಸಿದುಕೊಂಡರು. ಪರಿಣಾಮ ಭಾರತ 365 ರನ್​ ಗಳಿಸಿತು.

ಪಂದ್ಯವನ್ನು ನಮ್ಮ ಪರವಾಗಿ ತಿರುಗಿಸಿಕೊಳ್ಳಲು ಮತ್ತು ಮೇಲುಗೈ ಸಾಧಿಸಲು ಒಂದು ಹಂತದಲ್ಲಿ ಅವಕಾಶವಿತ್ತು. ಆದರೆ ಅದನ್ನು ಮಾಡಲು ಸಾಧ್ಯವಾಗಲಿಲ್ಲ ಎಂದು ರೂಟ್ ಪಂದ್ಯದ ನಂತರದ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ.

"ಪ್ರಮುಖವಾಗಿ, ಭಾರತ ತಂಡ ಸರಣಿಯ ಕೊನೆಯ ಮೂರು ಪಂದ್ಯಗಳಲ್ಲಿ ನಮಗಿಂತ ಉತ್ತಮವಾಗಿ ಆಡಿದೆ. ನಮಗೆ ಈ ಸೋಲು ಬೇಸರ ತಂದಿದೆ. ನಾವು ಸರಣಿಯನ್ನು ಸೋಲಿನ ಮೂಲಕ ಮುಗಿಸುತ್ತಿರುವುದು ನಿರಾಶಾದಾಯಕವಾಗಿದೆ. ಆದರೆ ನಾವು ತಂಡವಾಗಿ ಮತ್ತೆ ಮುಂದೆ ಹೋಗಲು ಎದುರು ನೋಡುತ್ತಿದ್ದೇವೆ" ಎಂದು ರೂಟ್ ಹೇಳಿದ್ದಾರೆ.

ಇದನ್ನು ಓದಿ:4 ಪಂದ್ಯಗಳ ಟೆಸ್ಟ್​ ಸರಣಿಯಲ್ಲಿ ಹೆಚ್ಚು ಬಾರಿ 30 ವಿಕೆಟ್​: ವಿಶ್ವದಾಖಲೆ ನಿರ್ಮಿಸಿದ ಆರ್​. ಅಶ್ವಿನ್