ಕೆಕೆಆರ್​ ಪ್ಲೇ-ಆಫ್​​ ಆಸೆಗೆ ತಣ್ಣೀರೆರಚಿದ ಸಿಎಸ್​ಕೆ... ಧೋನಿ ಪಡೆಗೆ ಜಯ ತಂದ ಜಡೇಜಾ 'ಸಿಕ್ಸರ್​​'

ಕೆಕೆಆರ್​ ನೀಡಿದ 173 ರನ್​ಗಳ ಗುರಿ ಬೆನ್ನತ್ತಿದ ಸಿಎಸ್​ಕೆ ಕೊನೆಯ ಎಸೆತದಲ್ಲಿ ಜಡೇಜಾ ಸಿಡಿಸಿದ ಸಿಕ್ಸರ್​​ನಿಂದ ಗೆಲುವು ಸಾಧಿಸಿದ್ದು, ಕೆಕೆಆರ್​ ಪ್ಲೇ ಆಫ್ ಕನಸಿಗೆ ತಣ್ಣೀರೆರಚಿದೆ.

ದುಬೈ: ಗಾಯಕ್ವಾಡ್​ ಅವರ ಜವಾಬ್ದಾರಿಯುತ ಅರ್ಧಶತಕ ಹಾಗೂ ಜಡೇಜಾ ಅವರ ಸ್ಪೋಟಕ ಬ್ಯಾಟಿಂಗ್ ನೆರವಿನಿಂದ ಸಿಎಸ್​ಕೆ ಕೋಲ್ಕತ್ತಾ ನೈಟ್​ ರೈಡರ್ಸ್ ವಿರುದ್ಧ 6 ವಿಕೆಟ್​ಗಳ ರೋಚಕ ಜಯ ಸಾಧಿಸಿದೆ.

ಕೆಕೆಆರ್​ ನೀಡಿದ 173 ರನ್​ಗಳ ಗುರಿ ಬೆನ್ನತ್ತಿದ ಸಿಎಸ್​ಕೆ ಕೊನೆಯ ಎಸೆತದಲ್ಲಿ ಜಡೇಜಾ ಸಿಡಿಸಿದ ಸಿಕ್ಸರ್​ ಹಾಗೂ ಗಾಯಕ್ವಾಡ್​ ಅವರ ಅರ್ಧಶತಕದ ನೆರವಿನಿಂದ 6 ವಿಕೆಟ್​ಗಳ ಜಯ ಸಾಧಿಸುವ ಜೊತೆಗೆ ಕೆಕೆಆರ್​ ಪ್ಲೇ ಆಫ್ ಕನಸಿಗೆ ತಣ್ಣೀರು ಎರಚಿದೆ.

ಆರಂಭಿಕರಾಗಿ ಕಣಕ್ಕಿಳಿದಿದ್ದ ರುತುರಾಜ್ ಗಾಯಕ್ವಾಡ್​ ಅನುಭವಿ ವಾಟ್ಸನ್​ ಜೊತೆಗೂಡಿ 50 ರನ್​ಗಳ ಜೊತೆಯಾಟ ನಡೆಸಿದರು. ಇಂದು ಕೂಡ ಬ್ಯಾಟಿಂಗ್​ನಲ್ಲಿ ವೈಫಲ್ಯ ಅನುಭವಿಸಿದ ವಾಟ್ಸನ್​ 19 ಎಸೆತಗಳಲ್ಲಿ 14 ರನ್​ಗಳಿಸಿ ಔಟಾದರು. ಆದರೆ ರುತುರಾಜ್​ ಗಾಯಕ್ವಾಡ್​ ಮಧ್ಯಮ ಕ್ರಮಾಂಕದಲ್ಲಿ ರಾಯುಡು ಜೊತೆಗೂಡಿ 68 ರನ್​ಗಳ ಜೊತೆಯಾಟ ನೀಡಿ ಪಂದ್ಯವನ್ನು ಸಿಎಸ್​ಕೆ ಕಡೆ ತಿರುಗಿಸಿದರು.

ರಾಯಡು 20 ಎಸೆತಗಳಲ್ಲಿ 5 ಬೌಂಡರಿ ಹಾಗೂ 1 ಸಿಕ್ಸರ್​ ಸಹಿತ 38 ರನ್​ಗಳಿಸಿ ಕಮ್ಮಿನ್ಸ್​ಗೆ ವಿಕೆಟ್​ ಒಪ್ಪಿಸಿದರು. ಇವರ ಬೆನ್ನಲ್ಲೇ ಧೋನಿ ಕೂಡ ಕೇವಲ 1 ರನ್​ಗಳಿಸಿ ವರುಣ್​ ಚಕ್ರವರ್ತಿಗೆ 2ನೇ ಬಲಿಯಾದರು. ಗಾಯಕ್ವಾಡ್​ 53 ಎಸೆತಗಳಲ್ಲಿ 6 ಬೌಂಡರಿ ಹಾಗೂ 2 ಸಿಕ್ಸರ್​ ಸಹಿತ 72 ರನ್​ಗಳಿಸಿ ತಂಡದ ಗೆಲುವಿಗೆ 33 ರನ್​ಗಳ ಅಗತ್ಯವಿದ್ದಾಗ ಔಟ್​ ಆದರು.

​ಆದರೆ ಕೇವಲ11 ಎಸೆತಗಳಲ್ಲಿ ಅಜೇಯ 31 ರನ್​ಗಳಿಸಿದ ಜಡೇಜಾ ಸಿಎಸ್​ಕೆ ತಂಡಕ್ಕೆ ಗೆಲುವು ತಂದುಕೊಂಡರು. ಜಡೇಜಾ 3 ಸಿಕ್ಸರ್​ ಹಾಗೂ 2 ಬೌಂಡರಿ ಸಿಡಿಸಿದರು. ಇವರಿಗೆ ಬೆಂಬಲ ನೀಡಿದ ಸ್ಯಾಮ್​ ಕರ್ರನ್ 13 ರನ್​ಗಳಿಸಿ ಔಟಾಗದೆ ಉಳಿದರು.

ಕೆಕೆಆರ್ ಪರ ಪ್ಯಾಟ್ ಕಮ್ಮಿನ್ಸ್​ 31ಕ್ಕೆ 2 ಹಾಗೂ ವರುಣ್ ಚಕ್ರವರ್ತಿ 20ಕ್ಕೆ 2 ವಿಕೆಟ್ ಪಡೆದರು. 19 ನೇ ಓವರ್​ನಲ್ಲಿ 20 ರನ್​ ಬಿಟ್ಟುಕೊಟ್ಟ ಫರ್ಗ್ಯುಸನ್​ ಕೆಕೆಆರ್ ಸೋಲಿಗೆ ಕಾರಣರಾದರು.

ಇದಕ್ಕು ಮೊದಲು ಬ್ಯಾಟಿಂಗ್ ನಡೆಸಿದ ಕೆಕೆಆರ್​ ನಿತೀಶ್ ರಾಣಾ ಅವರ 87 ರನ್​ಗಳ ನೆರವಿನಿಂದ 20 ಓವರ್​ಗಳಲ್ಲಿ 172 ರನ್​ಗಳಿಸಿತ್ತು. ಆಕರ್ಷಕ 72 ರನ್​ಗಳಿಸಿದ ರುತುರಾಜ್ ಗಾಯಕ್ವಾಡ್​ ಪಂದ್ಯ ಶ್ರೇಷ್ಠ ಪ್ರಶಸ್ತಿ ಪಡೆದುಕೊಂಡರು.

ಈ ಸೋಲಿನೊಂದಿಗೆ ಕೆಕೆಆರ್​ ಪ್ಲೇ ಆಫ್​ ಕನಸು ಬಹುತೇಕ ಭಗ್ನವಾಗಿದೆ. ಕೆಕೆಆರ್​ ಸೋಲು ಪಂಜಾಬ್​ಗೆ 4ನೇ ತಂಡವಾಗಿ ಪ್ಲೇ ಆಫ್​ ತಲುಪಲು ಹಾದಿ ಮಾಡಿಕೊಟ್ಟಿದೆ.