ಟೆಸ್ಟ್‌ನಲ್ಲಿ ಸತತ 21 ಓವರ್​ ಮೆಡನ್​ ಎಸೆದು ದಾಖಲೆ ನಿರ್ಮಿಸಿದ್ದ ಬಾಪು ನಾಡಕರ್ಣಿ ಇನ್ನಿಲ್ಲ!

ಭಾರತೀಯ ಕ್ರಿಕೆಟ್​ಗೆ ತಮ್ಮದೇ ರೀತಿಯ ವಿಶಿಷ್ಟ ಕೂಡುಗೆ ನೀಡಿದ್ದ ಬಾಪು ನಾಡಕರ್ಣಿ ತಮ್ಮ 86ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ.

ಮುಂಬೈ: ಭಾರತದ ಕ್ರಿಕೆಟ್​ಗೆ ಮಹತ್ವದ ಕೊಡುಗೆ ನೀಡಿದ್ದ ಮಾಜಿ ಆಲ್​ರೌಂಡರ್​ ಕ್ರಿಕೆಟರ್​ ಬಾಪು ನಾಡಕರ್ಣಿ ತಮ್ಮ 86ನೇ ವಯಸ್ಸಿನಲ್ಲಿ ವಯೋಸಹಜ ಕಾಯಿಲೆಯಿಂದ ನಿಧನರಾಗಿದ್ದಾರೆ. ಅವರ ಸಾವಿಗೆ ಕ್ರಿಕೆಟ್ ಲೋಕ ಕಂಬನಿ ಮಿಡಿದಿದೆ.

ಲೆಫ್ಟ್​ ಆರ್ಮ್ ಸ್ಪಿನ್ನರ್​ ಹಾಗೂ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​ಮನ್​ ಆಗಿದ್ದ ಆಟಗಾರ​ ಟೀಂ ಇಂಡಿಯಾದಲ್ಲಿ 1955-68ರ ನಡುವೆ 41 ಟೆಸ್ಟ್​​ ಪಂದ್ಯಗಳನ್ನಾಡಿದ್ದರು. ಈ ಪಂದ್ಯಗಳಲ್ಲಿ ಅವರು 1,414 ರನ್​ ಹಾಗೂ 88 ವಿಕೆಟ್​ ಗಳಿಕೆ ಸಾಧನೆ ಮಾಡಿದ್ದಾರೆ. 1964ರಲ್ಲಿ ಚೆನ್ನೈನಲ್ಲಿ ಇಂಗ್ಲೆಂಡ್​ ವಿರುದ್ಧ ನಡೆದ 4ನೇ ಟೆಸ್ಟ್​​ ಪಂದ್ಯದಲ್ಲಿ 1.67ರ ಸರಾಸರಿಯಲ್ಲಿ ರನ್​ ಮಾಡಿದ್ದ ನಾಡಕರ್ಣಿ ಬರೋಬ್ಬರಿ 21 ಮೆಡನ್​ ಓವರ್​ ಎಸೆದಿದ್ದರು.

ಪ್ರಥಮ ದರ್ಜೆ ಕ್ರಿಕೆಟ್​​ನಲ್ಲೂ ತಮ್ಮದೇ ರೀತಿಯ ಛಾಪು ಮೂಡಿಸಿದ್ದ ಇವರು​ 191 ಪಂದ್ಯಗಳಿಂದ 500 ವಿಕೆಟ್​ ಪಡೆದು ಮಿಂಚಿದ್ದರು. ಇದರ ಜತೆಗೆ ಮಹಾರಾಷ್ಟ್ರ ಕ್ರಿಕೆಟ್​ ತಂಡದ ಕ್ಯಾಪ್ಟನ್​ ಆಗಿಯೂ ಗುರುತಿಸಿಕೊಂಡಿದ್ದರು.

ಸಚಿನ್​ ಸಂತಾಪ:
ಬಾಪು ನಾಡಕರ್ಣಿ ನಿಧನಕ್ಕೆ ಲಿಟಲ್​​ ಮಾಸ್ಟರ್​ ಸಚಿನ್​ ತೆಂಡೂಲ್ಕರ್​ ಸಂತಾಪ ಸೂಚಿಸಿ ಟ್ವೀಟ್​ ಮಾಡಿದ್ದಾರೆ. ಅವರ ಸಾವಿನ ಸುದ್ದಿ ಕೇಳಿ ತುಂಬಾ ದುಃಖವಾಗಿದ್ದು, ಟೆಸ್ಟ್​​ ಪಂದ್ಯವೊಂದರಲ್ಲಿ ಸತತ 21 ಮೆಡನ್​ ಓವರ್​ ಮಾಡಿದ ದಾಖಲೆ ಅವರದ್ದಾಗಿದ್ದು, ಸಾವಿನ ನೋವು ಭರಿಸುವ ಶಕ್ತಿಯನ್ನು ಅವರ ಕುಟುಂಬಕ್ಕೆ ದೇವರು ನೀಡಲಿ, ರೆಸ್ಟ್​​ ಇನ್​ ಪೀಸ್​ ಸರ್​ ಎಂದು ಸಂತಾಪ ಸೂಚಿಸಿದ್ದಾರೆ.