ಐವರು ಸೆಲೆಕ್ಟರ್​ ಸೇರಿ ರಾಯುಡು ಅವರಷ್ಟೂ ರನ್​ ಹೊಡೆದಿಲ್ಲ... ಅಂಬಾಟಿ ಬೆಂಬಲಕ್ಕೆ ನಿಂತ ಗಂಭೀರ್​!

ಅಂಬಾಟಿ ರಾಯುಡು ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ನಿವೃತ್ತಿ ಘೋಷಣೆ ಮಾಡಿರುವ ವಿಚಾರಕ್ಕೆ ಸಂಬಂಧಿಸಿದಂತೆ ಟೀಂ ಇಂಡಿಯಾ ಮಾಜಿ ಪ್ಲೇಯರ್​ ಗಂಭೀರ್​ ಮಾತನಾಡಿ, ಬೇಸರ ಹೊರಹಾಕಿದ್ದಾರೆ

ನವದೆಹಲಿ:ಈ ಹಿಂದೆ ವಿಶ್ವಕಪ್​ಗಾಗಿ ಟೀಂ ಇಂಡಿಯಾ ಆಯ್ಕೆ ಸಮಿತಿ 15 ಸದಸ್ಯರನ್ನೊಳಗೊಂಡ ತಂಡ ಆಯ್ಕೆ ಮಾಡಿದ್ದಾಗಲೂ ಅಂಬಾಟಿ ರಾಯುಡುಗೆ ಅವಕಾಶ ನೀಡದಿದ್ದಕ್ಕಾಗಿ ಮಾಜಿ ಕ್ರಿಕೆಟಿಗ ಗೌತಮ್​ ಗಂಭೀರ್​ ಬಿಸಿಸಿಐ ನಡೆ ವಿರುದ್ಧ ಹರಿಹಾಯ್ದಿದ್ದರು. ಇದೀಗ ಅವರು ನಿವೃತ್ತಿ ಘೋಷಣೆ ಮಾಡುತ್ತಿದ್ದಂತೆ ಮತ್ತೆ ಗೌತಮ್​ ಗಂಭೀರ್​ ಆಕ್ರೋಶ ಹೊರಹಾಕಿದ್ದಾರೆ.

ವಿಶ್ವಕಪ್​​ನಲ್ಲಿ ರಿಷಭ್​ ಪಂತ್ ಹಾಗೂ ರಾಯುಡುಗೆ ಅವಕಾಶ ನೀಡದೇ ಇರುವುದಕ್ಕೆ ಕ್ರೀಡಾಭಿಮಾನಿಗಳು ಆಯ್ಕೆ ಸಮಿತಿ ನಿರ್ಧಾರದ ವಿರುದ್ಧ ಆಕ್ರೋಶ ಹೊರಹಾಕಿದ್ದರು. ಈ ವೇಳೆ, ಇಬ್ಬರು ಆಟಗಾರರನ್ನ ವರ್ಲ್ಡ್​​ಕಪ್​ನ ಮೀಸಲು ಆಟಗಾರರು ಎಂದು ಘೋಷಣೆ ಮಾಡಿತ್ತು. ಇದೇ ವೇಳೆ, ಆರಂಭಿಕ ಆಟಗಾರ ಶಿಖರ್​ ಧವನ್​ ತಂಡದಿಂದ ಹೊರ ಬೀಳುತ್ತಿದ್ದಂತೆ ರಿಷಭ್​ ಪಂತ್​ಗೆ ಬುಲಾವ್​ ನೀಡಿದ್ದರು. ಇದರ ಮಧ್ಯೆ ವಿಶ್ವಕಪ್​ಗೆ ಆಯ್ಕೆಗೊಂಡಿದ್ದ ಆಲ್​ರೌಂಡರ್ ವಿಜಯ್​ ಶಂಕರ್​ ಗಾಯಗೊಂಡು ತಂಡದಿಂದ ಹೊರಬಿದ್ದಾಗ ರಾಯುಡುಗೆ ಅವಕಾಶ ನೀಡದೇ, ಕನ್ನಡಿಗ ಮಯಾಂಕ್ ಅಗರವಾಲ್​ಗೆ ಆಯ್ಕೆ ಸಮಿತಿ ಮಣೆ ಹಾಕಿತ್ತು. ಇದು ರಾಯುಡುಗೆ ನುಂಗಲಾರದ ತುತ್ತಾಗಿ ಪರಿಣಮಿಸಿದ್ದು, ಇದರ ಬೆನ್ನಲ್ಲೇ ಅಂತಾರಾಷ್ಟ್ರೀಯ ಕ್ರಿಕೆಟ್​ಗೆ ವಿದಾಯ ಘೋಷಣೆ ಮಾಡಿದ್ದಾರೆ.

ಅಂಬಾಡಿ ರಾಯುಡು

ಇದೇ ವಿಷಯವನ್ನಿಟ್ಟುಕೊಂಡು ಕ್ರಿಕೆಟರ್​ ಹಾಗೂ ರಾಜಕಾರಣಿ ಗಂಭೀರ್​ ಆಯ್ಕೆ ಸಮಿತಿ ವಿರುದ್ಧ ಹರಿಹಾಯ್ದಿದ್ದಾರೆ. ಆಯ್ಕೆ ಸಮಿತಿಯಲ್ಲಿರುವ ಐವರು ಆಯ್ಕೆದಾರರು ಸೇರಿ ಅಂಬಾಡಿ ರಾಯುಡು ಹೊಡೆದಷ್ಟು ರನ್​ ಗಳಿಕೆ ಮಾಡಿಲ್ಲ. ಅವರ ನಿವೃತ್ತಿ ನನಗೆ ತುಂಬಾ ನೋವುಂಟು ಮಾಡಿದೆ. ಭಾರತೀಯ ಕ್ರಿಕೆಟ್​ಗೆ ಇದು ದುಃಖದ ವಿಷಯ ಎಂದು ಹೇಳಿದ್ದಾರೆ. ಜತೆಗೆ ಐಪಿಎಲ್​​ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಹೊರತಾಗಿ ಸಹ ಅವರಿಗೆ ಅವಕಾಶ ನೀಡದೇ ಇರುವುದು ಅವರಿಗೆ ಮಾಡಿರುವ ಅನ್ಯಾಯ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ವಿಶ್ವಕಪ್​​ಗಾಗಿ ತಂಡ ಆಯ್ಕೆಯಾದಾಗ ವಿಜಯ್​ ಶಂಕರ್​ ಅವಕಾಶ ಪಡೆದ ವಿಚಾರಕ್ಕೆ ಸಂಬಂಧಿದಂತೆ ಪ್ರತಿಕ್ರಿಯೆ ನೀಡಿದ್ದ ರಾಯುಡು, ವಿಶ್ವಕಪ್​ ನೋಡಲು ತ್ರಿಡಿ ಗ್ಲಾಸ್​ ಖರೀದಿ ಮಾಡಿರುವೆ ಎಂದು ಟ್ವೀಟ್​ ಮಾಡಿದ್ದರು.