ಆರ್​ಸಿಬಿ ಸ್ಟಾರ್​ ಫಿನ್​ ಅಲೆನ್​ ಅಬ್ಬರ; ಬಾಂಗ್ಲಾ ವಿರುದ್ಧ ಕಿವೀಸ್​ಗೆ ವಿಜಯ

ಮಳೆಯ ಕಾರಣ ಪಂದ್ಯವನ್ನು 10 ಓವರ್​ಗಳಿಗೆ ಇಳಿಸಲಾಗಿತ್ತು. ಮೊದಲು ಬ್ಯಾಟಿಂಗ್ ಮಾಡಿದ ನ್ಯೂಜಿಲ್ಯಾಂಡ್ ತಂಡ 4 ವಿಕೆಟ್​ ಕಳೆದುಕೊಂಡು 141 ರನ್​ ಪೇರಿಸಿತು.

ಡ್ಯುನೇದಿನ್: ಬಾಂಗ್ಲಾದೇಶ ವಿರುದ್ಧ ಮಳೆಯ ಅಡಚಣೆಯ ನಡುವೆಯೂ ನಡೆದ ಕೊನೆಯ ಟಿ20 ಪಂದ್ಯದಲ್ಲಿ ಆತಿಥೇಯ ನ್ಯೂಜಿಲ್ಯಾಂಡ್ ತಂಡ ಫಿನ್​ ಅಲೆನ್​ ಅವರ ಅಬ್ಬರದ ಅರ್ಧಶತಕದ ನೆರವಿನಿಂದ 65 ರನ್​ಗಳಿಂದ ಗೆಲುವು ಸಾಧಿಸಿ 3-0ಯಲ್ಲಿ ಸರಣಿಯನ್ನು ಕ್ಲೀನ್ ಸ್ವೀಪ್ ಮಾಡಿದೆ.

ಆರಂಭಿಕರಾದ ಮಾರ್ಟಿನ್ ಗಪ್ಟಿಲ್ ಮತ್ತು ಫಿನ್ ಅಲೆನ್ ಮೊದಲ ವಿಕೆಟ್​ಗೆ 85 ರನ್​ಗಳ ಜೊತೆಯಾಟ ನೀಡಿದರು. ಗಪ್ಟಿಲ್ 19 ಎಸೆತಗಳಲ್ಲಿ 5 ಭರ್ಜರಿ ಸಿಕ್ಸರ್​ ಮತ್ತು 1 ಬೌಂಡರಿ ನೆರವಿನಿಂದ 44 ರನ್​ಗಳಿಸಿದರೆ, ಅಲೆನ್ ಕೇವಲ 29 ಎಸೆತಗಳಲ್ಲಿ 10 ಬೌಂಡರಿ 3 ಸಿಕ್ಸರ್​ಗಳ ನೆರವಿನಿಂದ 71 ರನ್​ಗಳಿಸಿ ಬೃಹತ್ ಮೊತ್ತಕ್ಕೆ ಕಾರಣರಾದರು. ಫಿಲಿಫ್ಸ್​ 14, ಡೇರಿಲ್ ಮಿಚೆಲ್ 11 ರನ್​ಗಳಿಸಿದರು.

142 ರನ್​ಗಳ ಗುರಿ ಪಡೆದ ಬಾಂಗ್ಲಾದೇಶ 9.3 ಓವರ್​ಗಳಲ್ಲಿ 76 ರನ್​ಗಳಿಗೆ ಆಲೌಟ್ ಆಗಿ ಹೀನಾಯ ಸೋಲುಂಡಿತು. ಮೊಹಮ್ಮದ್ ನಯೀಮ್ 19 ರನ್​ಗಳಿಸಿ ತಂಡದ ಗರಿಷ್ಠ ಸ್ಕೋರರ್ ಎನಿಸಿಕೊಂಡರು.

ಟಿಮ್ ಸೌಥಿ 15ಕ್ಕೆ 3, ಟಾಡ್ ಆಸ್ಟಲ್ 13ಕ್ಕೆ 4 ವಿಕೆಟ್ ಪಡೆದು ಗೆಲುವಿನ ರೂವಾರಿಯಾದರು. ಆ್ಯಡಂ ಮಿಲ್ನೆ, ಲೂಕಿ ಫರ್ಗ್ಯುಸನ್ ಮತ್ತು ಗ್ಲೇನ್ ಫಿಲಿಫ್ಸ್​ ತಲಾ ಒಂದು ವಿಕೆಟ್ ಪಡೆದರು.

ನ್ಯೂಜಿಲ್ಯಾಂಡ್ ಪರ 2ನೇ ವೇಗದ ಅರ್ಧಶತಕ

ದೇಶಿಯ ಟಿ20 ಲೀಗ್​ನಲ್ಲಿ ಅದ್ಭುತ ಪ್ರದರ್ಶನ ತೋರಿ ಅಂತಾರಾಷ್ಟ್ರೀಯ ಕ್ರಿಕೆಟ್​​ಗೆ ಪದಾರ್ಪಣೆ ಮಾಡಿರುವ ಫಿನ್​ ಅಲೆನ್​ ಕೇವಲ 18 ಎಸೆತಗಲ್ಲಿ ಅರ್ಧಶತಕ ಬಾರಿಸಿದರು. ಇದು ನ್ಯೂಜಿಲ್ಯಾಂಡ್​ ಪರ 2ನೇ ವೇಗದ ಅರ್ಧಶತಕವಾಗಿದೆ. ಫಿನ್ ಅಲೆನ್ ಜೋಶ್ ಫಿಲಿಪ್ಪೆ ಬದಲು ಆರ್​ಸಿಬಿ ತಂಡ ಸೇರಿಕೊಂಡಿದ್ದು, ಇಂದು ಭಾರತಕ್ಕೆ ಪ್ರಯಾಣ ಬೆಳೆಸಲಿದ್ದಾರೆ.

ಇದನ್ನೂ ಓದಿ: ಚೆನ್ನೈನಲ್ಲಿ RCB ಕ್ಯಾಂಪ್​ ಸೇರಿಕೊಂಡ ಎಬಿಡಿ