ದುಬೈ: ಇಂಗ್ಲೆಂಡ್ ಯುವ ಕ್ರಿಕೆಟರ್ ವಿಲ್ ಜಾಕ್ಸ್ ಆರು ಎಸೆತಕ್ಕೆ ಆರು ಸಿಕ್ಸರ್ ಹಾಗೂ ಸಿಡಿಲಬ್ಬರದ ಶತಕ ಬಾರಿಸಿ ನೂತನ ದಾಖಲೆ ಬರೆದಿದ್ದಾರೆ.
ದುಬೈನಲ್ಲಿ ಗುರುವಾರ ನಡೆದ ಟಿ10 ಪಂದ್ಯಾಟದಲ್ಲಿ ಸರ್ರೆ ತಂಡದ ಪರವಾಗಿ ಬ್ಯಾಟ್ ಮಾಡಿದ ವಿಲ್ ಜಾಕ್ಸ್ ಆರು ಎಸೆತದಲ್ಲಿ ಆರು ಸಿಕ್ಸರ್ ಸೇರಿದಂತೆ ಮೂವತ್ತು ಎಸೆತದಲ್ಲಿ 105 ಸಿಡಿಸಿ ಅಬ್ಬರಿಸಿದರು. ಈ ಮಿಂಚಿನ ಶತಕದಲ್ಲಿ ಹನ್ನೊಂದು ಸಿಕ್ಸರ್ ಹಾಗೂ ಎಂಟು ಬೌಂಡರಿಗಳು ಸೇರಿದ್ದವು.
ವಿಲ್ ಜಾಕ್ಸ್ರ ಈ ದಾಖಲೆ ಬ್ಯಾಟಿಂಗ್ ಪ್ರದರ್ಶನ ದಾಖಲೆ ಪುಟ ಸೇರಿಲ್ಲ.ಕಾರಣ ಈ ಪಂದ್ಯ ಐಸಿಸಿಯಿಂದ ಅಧಿಕೃತ ಮಾನ್ಯತೆ ಪಡೆದಿರಲಿಲ್ಲ. ಈ ಪಂದ್ಯ ಮಾನ್ಯತೆ ಹೊಂದಿದ್ದಲ್ಲಿ ಜಾಕ್ಸ್ ಅಬ್ಬರದ ಸೆಂಚುರಿ ಬ್ಯಾಟಿಂಗ್ ದೈತ್ಯ ಕ್ರಿಸ್ ಗೇಲ್ರ ದಾಖಲೆ ಸರಿಗಟ್ಟುತ್ತಿದ್ದರು. ಗೇಲ್ 2013ರ ಐಪಿಎಲ್ನಲ್ಲಿ 30 ಎಸೆತದಲ್ಲಿ ಶತಕ ಬಾರಿಸಿದ್ದರು.
ವಿಲ್ ಜಾಕ್ಸ್ ಎಂಟು ಮೊದಲ ದರ್ಜೆಯ ಪಂದ್ಯಗಳನ್ನು ಆಡಿದ್ದು 30.10 ಸರಾಸರಿಯಲ್ಲಿ 301 ರನ್ ಬಾರಿಸಿದ್ದಾರೆ.
