ಮ್ಯಾಂಚೆಸ್ಟರ್:ಓಲ್ಡ್ ಟ್ರ್ಯಾಫೋರ್ಡ್ನಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್ - ಪಾಕಿಸ್ತಾನ ಮೊದಲ ಟೆಸ್ಟ್ ಪಂದ್ಯದಲ್ಲಿ ಪಾಕ್ ತಂಡ ಮೊದಲ ಇನ್ನಿಂಗ್ಸ್ನಲ್ಲಿ ಆರಂಭಿಕ ಆಟಗಾರ ಶಾನ್ ಮಸೂದ್ ಶತಕದ ನೆರವಿನಿಂದ ಸವಾಲಿನ ಮೊತ್ತ ಗಳಿಸಿದೆ.
ಶಾನ್ ಮಸೂದ್ 156 ರನ್ ಗಳಿಸಿ ತಂಡದ ಮೊತ್ತವನ್ನು ಏರಿಸುವಲ್ಲಿ ಸಹಕಾರಿಯಾದರು. ಶಾನ್ ಈ ಶತಕ ಗಳಿಸುವ ಮೂಲಕ ಹ್ಯಾಟ್ರಿಕ್ ಶತಕ ಸಿಡಿಸಿದ ಸಾಧನೆ ಮಾಡಿದರು. ಈ ಹಿಂದೆ ಶ್ರೀಲಂಕಾ ಮತ್ತು ಬಾಂಗ್ಲಾ ವಿರುದ್ಧ ಇವರು ಶತಕ ಸಿಡಿಸಿದ್ದರು. ಅವರ ಅದ್ಭುತ ಆಟದಿಂದ ಪಾಕ್ ತಂಡ 109.3 ಓವರ್ಗಳಲ್ಲಿ 326 ರನ್ ಕಲೆಹಾಕಿತು.
ಬುಧವಾರ ಟಾಸ್ ಗೆದ್ದು ಬ್ಯಾಟಿಂಗ್ಗೆ ಇಳಿದಿದ್ದ ಪಾಕ್ ತಂಡ ಆರಂಭಿಕ ಆಘಾತ ಅನುಭವಿಸಿತ್ತು. ಬಾಬರ್ ಅಜಮ್ ಮತ್ತು ಶಾನ್ ಮಸೂದ್ ತಂಡಕ್ಕೆ ಸ್ವಲ್ಪ ಮಟ್ಟಿನ ಚೇತರಿಕೆ ತಂದು ಕೊಟ್ಟು ಮೊದಲ ದಿನ 139 ರನ್ಗಳಿಸಿತ್ತು. ಆದರೆ, ಎರಡನೇ ದಿನದಾಟದಲ್ಲಿ ಬಾಬರ್ ಹೆಚ್ಚು ಹೊತ್ತು ಕ್ರಿಸ್ ಕಾಯ್ದುಕೊಳ್ಳುವಲ್ಲಿ ವಿಫಲರಾದರು. ನಂತರ ಬಂದ ಶಫೀಕ್ ಮತ್ತು ರಿಜ್ವಾನ್ ಬಂದ ಹಾಗೆ ಮರಳಿ ಪೆವಿಲಿಯನ್ ಸೇರಿದರು. ಬ್ರಾಡ್ ಮತ್ತು ಆರ್ಚರ್ ದಾಳಿಗೆ ಪಾಕ್ ಬ್ಯಾಟ್ಸ್ಮನ್ಗಳು ನಲುಗಿದರು.
ನಂತರ ಕ್ರಿಸ್ಗೆ ಬಂದ ಶಾದಬ್ ಖಾನ್ (45) ಕ್ರಿಸ್ ಅಂಟಿಕೊಂಡು ಶಾನ್ ಮಸೂದ್ ಗೆ ಉತ್ತಮ ಸಾಥ್ ನೀಡಿ, ತಂಡದ ಮೊತ್ತವನ್ನು 300ರ ಗಡಿ ದಾಟಿಸುವಲ್ಲಿ ನೆರವಾದರು. ಅಂತಿಮ ವಾಗಿ ಪಾಕ್ 109.3 ಓವರ್ಗಳಲ್ಲಿ 326 ರನ್ ಕಲೆಹಾಕಿತು.
ಆರಂಭದಲ್ಲೇ ಕುಸಿತ ಕಂಡ ಆಂಗ್ಲರು :
ಮೊದಲ ಇನ್ನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ತಂಡ ಆರಂಭದಲ್ಲಿ ಕುಸಿತ ಕಂಡಿತು. ಆಂಗ್ಲರನ್ನ ಶಾಹೀನ್ ಅಫ್ರಿದಿ ಮತ್ತು ಮೊಹಮ್ಮದ್ ಅಬ್ಬಾಸ್ ಕಾಡಿದರು. ಬಿಗುವಿನ ಬೌಲಿಂಗ್ ದಾಳಿ ನಡೆಸಿದ ಪಾಕ್ ಬೌಲರ್ಗಳು ಇಂಗ್ಲೆಂಡ್ ತಂಡಕ್ಕೆ ಶಾಕ್ ನೀಡಿದರು. ಕೇವಲ 12 ರನ್ಗಳಿಸುವಷ್ಟರಲ್ಲಿ ಇಂಗ್ಲೆಂಡ್ ತಂಡದ ರೋರಿ ಬರ್ನ್ಸ್, ಡಾಮ್ ಸಿಬ್ಲಿ ಹಾಗೂ ಬೆನ್ ಸ್ಟೋಕ್ಸ್ ಹೀಗೆ ಪ್ರಮುಖ ಮೂರು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ನಾಯಕ ರೂಟ್ ತಂಡಕ್ಕೆ ಸ್ವಲ್ಪ ಮಟ್ಟಿನ ಚೇತರಿಕೆ ತಂದುಕೊಡಲು ಯತ್ನಿಸಿದರು. ಆದರೆ ಅದೂ ಆಗಲಿಲ್ಲ. ಅಂತಿಮವಾಗಿ ಇಂಗ್ಲೆಂಡ್ ತಂಡ 4 ವಿಕೆಟ್ ಕಳೆದುಕೊಂಡು 92 ರನ್ಗಳಿಸಿದೆ. ಓಲಿ ಪೋಪ್ (46) ಹಾಗೂ ಜೋಸ್ ಬಟ್ಲರ್ (15) ಕ್ರೀಸ್ ಕಾಯ್ದುಕೊಂಡಿದ್ದಾರೆ.
ಸಂಕ್ಷಿಪ್ತ ಸ್ಕೋರ್: ಪಾಕಿಸ್ತಾನ 326 (ಶಾನ್ ಮಸೂದ್ 156, ಬಾಬರ್ ಅಜಮ್ 69, ಸ್ಟುವರ್ಟ್ ಬ್ರಾಡ್ 3/54) ಇಂಗ್ಲೆಂಡ್ 92/4 (ಓಲಿ ಪೋಪ್ 46 *, ಜೋಸ್ ಬಟ್ಲರ್ 15 * , ಮೊಹಮ್ಮದ್ ಅಬ್ಬಾಸ್ 2/24)
