ಅಂಡರ್​ 19 ತ್ರಿಕೋನ ಸರಣಿ: ಇಂಗ್ಲೆಂಡ್​ ವಿರುದ್ಧ ಸೋತರೂ ಫೈನಲ್​ ಪ್ರವೇಶಿಸಿದ ಭಾರತ

ತ್ರಿಕೋನ ಸರಣಿಯ ಕೊನೆಯ ಲೀಗ್​ ಪಂದ್ಯದಲ್ಲಿ ಅಂಡರ್​ 19  ಭಾರತ ತಂಡ, ಇಂಗ್ಲೆಂಡ್​ ವಿರುದ್ಧ 8 ವಿಕೆಟ್​ಗಳಿಂದ ಸೋಲನುಭವಿಸಿದೆ.

ಬೆಕೆನ್​ಹಾಮ್​:19 ವರ್ಷದೊಳಗಿನ ತ್ರಿಕೋನ ಕ್ರಿಕೆಟ್‌ ಸರಣಿಯಲ್ಲಿ ಭಾರತ ತಂಡ, ಇಂಗ್ಲೆಂಡ್​ ವಿರುದ್ಧ ಕೊನೆಯ ಲೀಗ್​ ಪಂದ್ಯದಲ್ಲಿ 8 ವಿಕೆಟ್​ಗಳಿಂದ ಸೋಲೊಪ್ಪಿಕೊಂಡಿದೆ.

ಟಾಸ್​ ಗೆದ್ದು ಬ್ಯಾಟಿಂಗ್​ ಮಾಡಿದ ಭಾರತ 50 ಓವರ್​ಗಳಲ್ಲಿ 8 ವಿಕೆಟ್​ ಕಳೆದುಕೊಂಡು 278 ರನ್​ಗಳಿಸಿತು. ಆರಂಭಿಕ ಬ್ಯಾಟ್ಸ್​ಮನ್​ 102, ನಾಯಕ ಪ್ರಿಯಂ ಗರ್ಗ್​ 51, ತಿಲಕ್​ ವರ್ಮಾ 52 ರನ್​ಗಳಿಸಿದ್ದರು.

279 ರನ್​ಗಳ ಟಾರ್ಗೆಟ್​ ಪಡೆದಿದ್ದ ಇಂಗ್ಲೆಂಡ್​ ಯುವ ತಂಡ ಚೇಸಿಂಗ್​ ಮಾಡುವ ವೇಳೆ ಮಳೆ ಬಂದಿದ್ದರಿಂದ ಡಕ್‌ವರ್ಥ್ ಲೂಯಿಸ್‌ ನಿಯಮದ ಪ್ರಕಾರ, ಓವರ್​ ಮಿತಿಯನ್ನು 42 ಓವರ್​ ಗಳಿಸಿ 214 ರನ್​ಗಳ ಗುರಿ​ ನೀಡಲಾಗಿತ್ತು.

ಈ ಮೊತ್ತವನ್ನು ಇಂಗ್ಲೆಂಡ್​ ತಂಡ 2 ವಿಕೆಟ್​ ಕಳೆದುಕೊಂಡು ಇನ್ನೂ 3 ಎಸೆತಗಳಿರುವಂತೆ ಗುರಿ ತಲುಪಿ ಟೂರ್ನಿಯಲ್ಲಿ ತನ್ನ ಅಭಿಯಾನ ಮುಗಿಸಿತು. ಆರಂಭಿಕರಾದ ಬೆನ್​ ಚಾರ್ಲೆಸ್​ವರ್ತ್​ 46, ಟಾಮ್​ ಕ್ಲಾರ್ಕ್​ 66 ಡಾನ್​ ಮೌಸ್ಲೆ 74 ರನ್​ಗಳಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.

ಭಾರತ ತಂಡ ಈ ಪಂದ್ಯವನ್ನು ಸೋತರೂ 9 ಅಂಕಗಳೊಂದಿಗೆ 2ನೇ ಸ್ಥಾನದಲ್ಲಿರುವುದರಿಂದ ಫೈನಲ್​ಗೇರಿತು. 11 ಅಂಕಗಳಿಸಿದ್ದ ಬಾಂಗ್ಲಾದೇಶ ತಂಡ ಮೊದಲ ತಂಡವಾಗಿ ಫೈನಲ್​ಗೇರಿತ್ತು.

ಭಾನುವಾರ ನಡೆಯುವ ಪಂದ್ಯದಲ್ಲಿ ಭಾರತ-ಬಾಂಗ್ಲಾ ತಂಡಗಳು ಪ್ರಶಸ್ತಿಗಾಗಿ ಸೆಣಸಾಡಲಿವೆ.