ಡಾಮ್​ ಬೆಸ್​, ಜೋ ರೂಟ್​ ಆಟಕ್ಕೆ ಲಂಕನ್ನರು ದಂಗು

3ನೇ ವಿಕೆಟ್​ಗೆ ಒಂದಾದ ನಾಯಕ ಜೋ ರೂಟ್​ ಮತ್ತು ಜಾನಿ ಬೈರ್ಸ್ಟೋವ್​ 110 ರನ್​ಗಳ ಜೊತೆಯಾಟ ನಡೆಸಿ ಆರಂಭಿಕ ಆಘಾತದಿಂದ ಪಾರು ಮಾಡಿದರು. ರೂಟ್‌​ 115 ಎಸೆತಗಳಲ್ಲಿ 5 ಬೌಂಡರಿ ಸಹಿತ ಅಜೇಯ 66 ರನ್​ ಹಾಗೂ ಬೈರ್​ಸ್ಟೋವ್​ 91 ಎಸೆತಗಳಲ್ಲಿ​ 2 ಬೌಂಡರಿ ಸಹಿತ ಅಜೇಯ 47 ರನ್​ಗಳಿಸಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದಿರಿಸಿಕೊಂಡಿದ್ದಾರೆ.

ಗಾಲೆ(ಶ್ರೀಲಂಕಾ): ಶ್ರೀಲಂಕಾ ವಿರುದ್ಧದ ಟೆಸ್ಟ್​ ಸರಣಿಯ ಮೊದಲ ಪಂದ್ಯದಲ್ಲಿ ಪ್ರವಾಸಿ ಇಂಗ್ಲೆಂಡ್ ತಂಡ ಮೊದಲ ದಿನವೇ ಪ್ರಾಬಲ್ಯ ಸಾಧಿಸಿದೆ.

2 ಪಂದ್ಯಗಳ ಟೆಸ್ಟ್​ ಸರಣಿಯ ಮೊದಲ ಪಂದ್ಯದಲ್ಲಿ ಟಾಸ್​ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿದ್ದ ಶ್ರೀಲಂಕಾ ತಂಡ ದಯನೀಯ ವೈಫಲ್ಯ ಅನುಭವಿಸಿದ್ದು, ಕೇವಲ 135 ರನ್​ಗಳಿಗೆ ಆಲೌಟ್ ಆಗಿದೆ. ದುರಂತವೆಂದರೆ ತವರಿನ ಮೈದಾನದಲ್ಲಿ ಶ್ರೀಲಂಕಾ ತಂಡದ ಯಾವೊಬ್ಬ ಬ್ಯಾಟ್ಸ್​ಮನ್​ ಕನಿಷ್ಠ ಅರ್ಧಶತಕ ಕೂಡ ದಾಖಲಿಸಲಿಲ್ಲ. 28 ರನ್​ಗಳಿಸಿದ ದಿನೇಶ್ ಚಾಂಡಿಮನ್​ ತಂಡದ ಗರಿಷ್ಠ ಸ್ಕೋರರ್​​ ಎನಿಸಿಕೊಂಡರು. ಉಳಿದಂತೆ ಮ್ಯೂಥ್ಯೂಸ್​ 27, ಶನಕ 23 ರನ್​ಗಳಿಸಿದರು.

ಇಂಗ್ಲೆಂಡ್ ಪರ ಅದ್ಭುತ ಬೌಲಿಂಗ್ ಪ್ರದರ್ಶನ ತೋರಿದ ಡಾಮ್ ಬೆಸ್​ 10.1 ಓವರ್​ಗಳಲ್ಲಿ 30 ರನ್​ ನೀಡಿ 5 ವಿಕೆಟ್​ ಪಡೆದರು. ವೇಗಿ ಸ್ಟುವರ್ಟ್​ ಬ್ರಾಡ್​ 9 ಓವರ್​ಗಳಲ್ಲಿ 20 ರನ್​ ನೀಡಿ 3 ವಿಕೆಟ್ ಪಡೆದರೆ, ಜಾಕ್ ಲೀಷ್​ ಒಂದು ವಿಕೆಟ್​ ಪಡೆದು ಆತಿಥೇಯ ತಂಡವನ್ನು ಗಂಟು ಮೂಟೆ ಕಟ್ಟುವಂತೆ ಮಾಡಿದರು.

ಆರಂಭಿಕ ಆಘಾತದಿಂದ ಪಾರು ಮಾಡಿದ ರೂಟ್​

ಲಂಕಾ ತಂಡವನ್ನು ಅಲ್ಪಮೊತ್ತಕ್ಕೆ ಕೆಡವಿ ಮೊದಲ ಇನ್ನಿಂಗ್ಸ್​ ಆರಂಭಿಸಿದ ಇಂಗ್ಲೆಂಡ್ ತಂಡ ಕೂಡ 17 ರನ್​ಗಳಾಗುವಷ್ಟರಲ್ಲಿ 2 ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತು. ಜ್ಯಾಕ್ ಕ್ರಾಲೆ(9) ಹಾಗೂ ಡೊಮೆನಿಕ್ ಸಿಬ್ಲಿ(4) ಎಡಗೈ ಸ್ಪಿನ್ನರ್ ಲಸಿತ್ ಎಂಬುಲ್ಡೆನಿಯಾಗೆ ವಿಕೆಟ್​ ಒಪ್ಪಿಸಿದರು.

ಆದರೆ 3ನೇ ವಿಕೆಟ್​ಗೆ ಒಂದಾದ ನಾಯಕ ಜೋ ರೂಟ್​ ಮತ್ತು ಜಾನಿ ಬೈರ್ಸ್ಟೋವ್​ 110 ರನ್​ಗಳ ಜೊತೆಯಾಟ ನಡೆಸಿ ಆರಂಭಿಕ ಆಘಾತದಿಂದ ಪಾರು ಮಾಡಿದರು. ರೂಡ್​ 115 ಎಸೆತಗಳಲ್ಲಿ 5 ಬೌಂಡರಿ ಸಹಿತ ಅಜೇಯ 66 ರನ್​ ಹಾಗೂ ಬೈರ್​ಸ್ಟೋವ್​ 91 ಎಸೆತಗಳಲ್ಲಿ​ 2 ಬೌಂಡರಿ ಸಹಿತ ಅಜೇಯ 47 ರನ್​ಗಳಿಸಿ 2ನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದಿರಿಸಿಕೊಂಡಿದ್ದಾರೆ. ಪ್ರಸ್ತುತ ಇಂಗ್ಲೆಂಡ್​ ತಂಡ 2 ವಿಕೆಟ್ ಕಳೆದುಕೊಂಡು 127 ರನ್​ಗಳಿಸಿದೆ.