'ನನ್ನನ್ನು ಐಪಿಎಲ್​ಗೆ ಕರೆತಂದವರು___ಭಾಯ್': ಹೆಸರು ಬಹಿರಂಗಪಡಿಸಿದ ಸಂಜು ಸಾಮ್ಸನ್‌

ರಾಜಸ್ಥಾನ ಪರ ನಾಯಕನಾಗಿ ಅವರು ಕೊನೆಯ ಐಪಿಎಲ್‌ ಆವೃತ್ತಿಯನ್ನು ಆಡುತ್ತಿದ್ದರು. ಆ ಸಂದರ್ಭದಲ್ಲಿ ಅವರು 'ನನ್ನ ತಂಡದ ಪರ ಆಡುತ್ತೀಯಾ' ಎಂದು ಕೇಳಿದ್ದರು. ಅಂದೇ ನಾ ಕಂಡ ಕನಸು ನನಸಾಗಿತ್ತು ಎಂದು ಸಾಮ್ಸನ್​ ತಿಳಿಸಿದ್ದಾರೆ.

ಮುಂಬೈ: ಯುವ ವಿಕೆಟ್​ ಕೀಪರ್​ ಬ್ಯಾಟ್ಸ್​ಮನ್ ಸಂಜು ಸಾಮ್ಸನ್ ಅವ​ರನ್ನು ಭಾರತ ತಂಡದ ಮಾಜಿ ನಾಯಕ ರಾಹುಲ್​ ದ್ರಾವಿಡ್​ ರಾಜಸ್ತಾನ ರಾಯಲ್ಸ್​ ತಂಡಕ್ಕೆ ಕರೆತಂದಿದ್ದ ವಿಚಾರವನ್ನು ಕೇರಳ ಕ್ರಿಕೆಟಿಗ ಬಹಿರಂಗಪಡಿಸಿದ್ದಾರೆ.

"ರಾಹುಲ್​ ಬಾಯ್​ ಮತ್ತು ಝುಬಿನ್​ ಭರೂಚ (ಆರ್​ಆರ್ ತಂಡದ​ ಮುಖ್ಯಸ್ಥ) ತಂಡಕ್ಕೆ ಯುವ ಆಟಗಾರರನ್ನು ಕರೆತರುವುದಕ್ಕಾಗಿ ಆಯ್ಕೆ ಟ್ರಯಲ್ಸ್​ ನಡೆಸುತ್ತಿದ್ದರು. ಅಲ್ಲಿ ನನ್ನನ್ನು ಗುರುತಿಸಿದ ದ್ರಾವಿಡ್​ ಭಾಯ್​, ನನ್ನ ತಂಡದಲ್ಲಿ ಆಡುತ್ತೀಯಾ? ಎಂದು ಕೇಳಿದ್ದರು. ಅದು ನನ್ನ ಜೀವನದ ಅವಿಸ್ಮರಣೀಯ ದಿನ. ನನ್ನ ಕನಸು ನನಸಾದ ದಿನ" ಎಂದು ಸಂಜು ಸಾಮ್ಸನ್​ ರಾಜಸ್ಥಾನ್​ ರಾಯಲ್ಸ್​ ನಡೆಸಿದ ಲೈವ್​ ಸಂವಾದದ ವೇಳೆ ತಿಳಿಸಿದ್ದಾರೆ.

ನಂತರದ ದಿನಗಳಲ್ಲಿ ಭಾರತ ಎ ತಂಡದಲ್ಲಿ ಆಡುವಾಗಲೂ ದ್ರಾವಿಡ್ ಕೋಚಿಂಗ್​ನಲ್ಲಿ ಸಂಜು ಪಳಗಿದ್ದರು. "ಈಗಲು ನನಗೇನಾದರೂ ಅನುಮಾನಗಳಿದ್ದಲ್ಲಿ ದ್ರಾವಿಡ್​ ಸರ್​ಗೆ ಫೋನ್​ ಮಾಡಿ ಕೇಳುತ್ತೇನೆ. ಅವರು ನನಗೆ ಯಾವುದೇ ಸಂದರ್ಭದಲ್ಲಾದರೂ ನೆರವಾಗುತ್ತಾರೆ" ಎಂದು ಇಶ್​ ಶೋಧಿ ಜೊತೆ ನಡೆದ ಆನ್​ಲೈನ್ ಸಂವಾದದಲ್ಲಿ ಯುವ ಕ್ರಿಕೆಟಿಗ ತಿಳಿಸಿದ್ದಾರೆ.

ಭಾರತ ತಂಡದ ಕದ ತಟ್ಟುತ್ತಿರುವ ಸಂಜು ಈಗಾಗಲೇ ಒಂದೆರೆಡು ಟಿ20 ಪಂದ್ಯಗಳನ್ನಾಡಿದ್ದಾರೆ. ಇವರು ಐಪಿಎಲ್​ನಲ್ಲಿ 93 ಪಂದ್ಯಗಳನ್ನಾಡಿದ್ದು 2,209 ರನ್​ ಸಾಧನೆ ಮಾಡಿದ್ದಾರೆ. ಇದರಲ್ಲಿ 2 ಶತಕ ಹಾಗೂ 10 ಅರ್ಧಶತಕಗಳು ಸೇರಿವೆ.