ನ್ಯೂಜಿಲ್ಯಾಂಡ್​ ವಿರುದ್ಧ 3ನೇ ವಿಕೆಟ್​ ಜೊತೆಯಾಟದಲ್ಲಿ ವಿಶ್ವದಾಖಲೆ: ಡೇವಿಡ್​ ಮಲನ್ ​ - ಮಾರ್ಗನ್ ರೆಕಾರ್ಡ್​​​

ನ್ಯೂಜಿಲ್ಯಾಂಡ್​ ವಿರುದ್ಧದ ಟಿ-20 ಪಂದ್ಯದಲ್ಲಿ 76 ರನ್​ಗಳ ಜಯ ಸಾಧಿಸಿದ ಇಂಗ್ಲೆಂಡ್​ ಪರ ಡೇವಿಡ್ ಮಲನ್​ ಇಂಗ್ಲೆಂಡ್​ ಪರ ವೇಗದ ಶತಕ ಸಿಡಿಸಿದರೆ, ಮಾರ್ಗನ್​ ವೇಗದ ಅರ್ಧಶತಕ ಸಿಡಿಸಿ ಮಿಂಚಿದರು. ಇವರಿಬ್ಬರು 3ನೇ ವಿಕೆಟ್​ಗೆ 182 ರನ್​ಗಳ ಜೊತೆಯಾಟ ನಡೆಸಿ ಟಿ-20 ಕ್ರಿಕೆಟ್​ನಲ್ಲಿ ವಿಶ್ವದಾಖಲೆ ಬರೆದರು.

ನೇಪಿಯರ್​:ನ್ಯೂಜಿಲ್ಯಾಂಡ್​ ವಿರುದ್ಧ ನಡೆದ 4ನೇ ಟಿ20 ಪಂದ್ಯದಲ್ಲಿ ಡೇವಿಡ್​ ಮಲನ್​ ಕೇವಲ 48 ಎಸೆತಗಳಲ್ಲಿ ಶತಕ ಸಿಡಿಸುವ ಮೂಲಕ ಇಂಗ್ಲೆಂಡ್​ ಪರ ಕಡಿಮೆ ಎಸೆತಗಳಲ್ಲಿ ಶತಕ ಸಿಡಿಸಿದ ಬ್ಯಾಟ್ಸ್​ಮನ್​​ ಎನಿಸಿಕೊಂಡಿದ್ದಾರೆ.

ಸರಣಿ ಉಳಿಸಿಕೊಳ್ಳಲು ನಿರ್ಣಾಯಕವೆನಿಸಿದ್ದ ಪಂದ್ಯದಲ್ಲಿ ಅಬ್ಬರಿಸಿದ ಡೇವಿಡ್​ ಮಲನ್​ ಹಾಗೂ ನಾಯಕ ಇಯೋನ್​ ಮಾರ್ಗನ್​ ಕಿವೀಸ್​​​ ಬೌಲರ್​ಗಳನ್ನು ಬೆಂಡೆತ್ತಿದರು. ಕೇವಲ 48 ಎಸೆತಗಳಲ್ಲಿ ಶತಕ ಸಿಡಿಸಿದ ಮಲನ್ ಒಟ್ಟಾರೆ 51 ಎಸೆತಗಳಲ್ಲಿ 6 ಸಿಕ್ಸರ್​ ಹಾಗೂ 9 ಬೌಂಡರಿ ನೆರವಿನಿಂದ 103 ರನ್​ಗಳಿಸಿ ಔಟಾಗದೆ ಉಳಿದರು. ಮಾರ್ಗನ್​ 41 ಎಸೆತಗಳಲ್ಲಿ ತಲಾ 7 ಬೌಂಡರಿ ಹಾಗೂ 7 ಸಿಕ್ಸರ್​ ಸಹಿತ 91 ರನ್​ಗಳಿಸಿ ದಾಖಲೆಯ 241 ರನ್​ಗಳ ಬೃಹತ್​ ಮೊತ್ತಕ್ಕೆ ಕಾರಣರಾದರು. ಆರಂಭಿಕ ಟಾಮ್​ ಬ್ಯಾಂಟನ್​ 31 ರನ್​ಗಳಿಸಿದರು.

ಮಲನ್​ ದಾಖಲೆ:
ಈ ಪಂದ್ಯದಲ್ಲಿ 48 ಎಸೆತಗಳಲ್ಲಿ ಶತಕ ದಾಖಲಿಸಿದ ಡೇವಿಡ್​ ಮಲನ್​ ಇಂಗ್ಲೆಂಡ್​ ಪರ ವೇಗದ ಶತಕವೀರ ಎನಿಸಿಕೊಂಡರು. ಈ ಮೊದಲು 2014ರಲ್ಲಿ ಅಲೆಕ್ಸ್​ ಹೇಲ್ಸ್​ ಶ್ರೀಲಂಕಾ ವಿರುದ್ಧ 60 ಎಸೆತಗಳಲ್ಲಿ ಶತಕ ಸಿಡಿಸಿದ ದಾಖಲೆ ಹೊಂದಿದ್ದರು.

3ನೇ ವಿಕೆಟ್​ ವಿಶ್ವದಾಖಲೆಯ ಜೊತೆಯಾಟ:
ಇದೇ ಪಂದ್ಯದಲ್ಲಿ ಇಯೋನ್​ ಮಾರ್ಗನ್​ ಹಾಗೂ ಡೇವಿಡ್​ ಮಲನ್​ ಮೂರನೇ ವಿಕೆಟ್​ಗೆ 182 ರನ್​ಗಳ ಜೊತೆಯಾಟ ನಡೆಸುವ ಮೂಲಕ ಟಿ-20 ಕ್ರಿಕೆಟ್​ನಲ್ಲಿ ಮೂರನೇ ವಿಕೆಟ್​​ಗೆ ಅತಿ ಹೆಚ್ಚು ರನ್​ ಜೊತೆಯಾಟ ನಡೆಸಿದ ದಾಖಲೆಗೆ ಪಾತ್ರರಾದರು. 2014ರಲ್ಲಿ ಅಲೆಕ್ಸ್​ ಹೇಲ್ಸ್​ ಹಾಗೂ ಮಾರ್ಗನ್​ 3ನೇ ವಿಕೆಟ್​ಗೆ 152 ರನ್​ಗಳಿಸಿದ್ದ ದಾಖಲೆ ಮುರಿದುಬಿದ್ದಿದೆ.

ವೇಗದ ಅರ್ಧಶತಕ:
ಇದೇ ಪಂದ್ಯದಲ್ಲಿ ಕೇವಲ 21 ಎಸೆತಗಳಲ್ಲಿ ಅರ್ಧಶತಕ ಬಾರಿಸುವ ಮೂಲಕ ಇಯಾನ್​ ಮಾರ್ಗನ್​ ಇಂಗ್ಲೆಂಡ್​ ಪರ ವೇಗದ ಅರ್ಧಶತಕ ಸಿಡಿಸಿದ ದಾಖಲೆಗೆ ಪಾತ್ರರಾದರು.

242 ರನ್​ಗಳ ಟಾರ್ಗೆಟ್​ ಪಡೆದ ನ್ಯೂಜಿಲ್ಯಾಂಡ್​ 16.5 ಓವರ್​ಗಳಲ್ಲಿ 165 ರನ್​ಗಳಿಗೆ ಆಲೌಟ್​ ಆಗುವ ಮೂಲಕ 76ರನ್​ಗಳ ಸೋಲನುಭವಿಸಿತು.