ಸಿಡ್ನಿ: ಐಪಿಎಲ್ ಸಮಯದಲ್ಲಿ ಭಾರತದಲ್ಲಿ ಕಾಲ ಕಳೆಯುವ ಡೇವಿಡ್ ವಾರ್ನರ್ ಮಗಳು 'ನಾನು ವಿರಾಟ್ ಕೊಹ್ಲಿ' ಎಂದು ಹೇಳುತ್ತಾ ಕ್ರಿಕೆಟ್ ಆಡುತ್ತಿರುವ ವಿಡಿಯೋವನ್ನು ವಾರ್ನರ್ ದಂಪತಿ ಶೇರ್ ಮಾಡಿಕೊಂಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ಇತ್ತೀಚೆಗೆ ಪಾಕಿಸ್ತಾನ ಹಾಗೂ ಶ್ರೀಲಂಕಾ ವಿರುದ್ಧ ಟಿ20 ಸರಣಿ ಗೆದ್ದಿರುವ ಖುಷಿಯಲ್ಲಿರುವ ಡೇವಿಡ್ ವಾರ್ನರ್ ಬಿಡುವಿನ ವೇಳೆಯನ್ನು ಕುಟುಂಬದ ಜೊತೆ ಕಳೆಯುತ್ತಿದ್ದಾರೆ. ಈ ಸಂದರ್ಭದಲ್ಲಿ ತಮ್ಮ ಮಕ್ಕಳ ಜೊತೆ ಕ್ರಿಕೆಟ್ ಆಡುತ್ತಿದ್ದ ವೇಳೆ ಅವರ ಎರಡನೇ ಮಗಳಾದ ಇಂಡಿ ರೇ 'ನಾನು ವಿರಾಟ್ ಕೊಹ್ಲಿ(I am virat kohli) ಎಂದು ಹೇಳುತ್ತಾ ಬ್ಯಾಟಿಂಗ್ ನಡೆಸಿದ್ದಾಳೆ.
ಈ ವಿಡಿಯೋವನ್ನು ತಮ್ಮ ಇನ್ಸ್ಸ್ಟಾಗ್ರಾಮ್ನಲ್ಲಿ ಶೇರ್ ಮಾಡಿಕೊಂಡಿರು ವಾರ್ನರ್" ಇದರ ಬಗ್ಗೆ ನನಗೆ ಖಚಿತವಾಗಿ ಗೊತ್ತಿಲ್ಲ, ಇಂಡಿ ಕೊಹ್ಲಿಯಂತಾಗಬೇಕೆಂದು ಬಯಸಿದ್ದಾಳೆ" ಎಂದು ಬರೆದುಕೊಂಡಿದ್ದಾರೆ.
ವಾರ್ನರ್ ಪತ್ನಿ ಕ್ಯಾಂಡೀಸ್ ವಾರ್ನರ್ ಕೂಡ ಟ್ವಿಟ್ಟರ್ನಲ್ಲಿ ವಿಡಿಯೋ ಶೇರ್ ಮಾಡಿಕೊಂಡಿದ್ದು "ಈ ಚಿಕ್ಕ ಹುಡುಗಿ ಹೆಚ್ಚಿನ ದಿನಗಳನ್ನು ಭಾರತದಲ್ಲಿ ಕಳೆದಿದ್ದಾಳೆ. ಅದಕ್ಕೆ ಕೊಹ್ಲಿಯಂತಾಗಬೇಕು ಎಂದು ಬಯಸಿದ್ದಾಳೆ" ಎಂದು ಬರೆದುಕೊಂಡಿದ್ದಾರೆ.
ಕೇವಲ 3 ವರ್ಷದ ಮುದ್ದು ಮಗು ಕ್ರಿಕೆಟ್ನಲ್ಲಿ ವಿಶ್ವಪ್ರಸಿದ್ದರಾಗಿರುವ ಕೊಹ್ಲಿ ಬಗ್ಗೆ ತಿಳಿದುಕೊಂಡಿರುವುದಕ್ಕೆ ಭಾರತೀಯ ಅಭಿಮಾನಿಗಳಲ್ಲದೆ ವಿಶ್ವ ಕ್ರಿಕೆಟ್ ಅಭಿಮಾನಿಗಳು ಕಾಮೆಂಟ್ ಮೂಲಕ ಸಂತಸ ವ್ಯಕ್ತಪಡಿಸಿದ್ದಾರೆ.
