ಹೈದರಾಬಾದ್:ಪ್ರಪಂಚದಾದ್ಯಂತ ಕೊರೊನಾ ಅಬ್ಬರ ಜೋರಾಗಿದೆ. ಹೀಗಾಗಿ ಕಳೆದ 117 ದಿನಗಳಿಂದ ಸಂಪೂರ್ಣವಾಗಿ ನಿಷೇಧಗೊಂಡಿದ್ದ ಅಂತಾರಾಷ್ಟ್ರೀಯ ಕ್ರಿಕೆಟ್ ಇದೀಗ ಜುಲೈ 8ರಿಂದ ಆರಂಭಗೊಳ್ಳುತ್ತಿದೆ. ವಿಶ್ವ ಯುದ್ಧದ ಬಳಿಕ ಇದೇ ಮೊದಲ ಬಾರಿಗೆ ಇಷ್ಟೊಂದು ಅಂತರದ ಬಳಿಕ ಕ್ರಿಕೆಟ್ ಪುನಾರಂಭಗೊಳ್ಳುತ್ತಿದೆ.
143 ವರ್ಷದ ಕ್ರಿಕೆಟ್ ಇತಿಹಾಸದಲ್ಲಿ ಕೇವಲ ಮೂರು ಸಲ ಬಹಳಷ್ಟು ದಿನಗಳ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್ ಬಂದ್ ಆಗಿದೆ. ಮೊದಲ ವಿಶ್ವ ಮಹಾಯುದ್ಧದ ಸಮಯದಲ್ಲಿ 2,481 ದಿನಗಳ ಕಾಲ ಕ್ರಿಕೆಟ್ ಬ್ಯಾನ್ ಆಗಿತ್ತು. ಇದಾದ ಬಳಿಕ 1941ರಲ್ಲಿ ದಕ್ಷಿಣ ಆಫ್ರಿಕಾ ಹಾಗೂ ಇಂಗ್ಲೆಂಡ್ ನಡುವೆ ಮೊದಲ ಕ್ರಿಕೆಟ್ ಪಂದ್ಯ ನಡೆದಿತ್ತು.
ಎರಡನೇ ವಿಶ್ವ ಮಹಾಯುದ್ಧದ ಸಮಯದಲ್ಲೂ ಕ್ರಿಕೆಟ್ ಅನೇಕ ದಿನಗಳ ಕಾಲ ಬ್ಯಾನ್ ಆಗಿತ್ತು. ಈ ವೇಳೆ ನ್ಯೂಜಿಲ್ಯಾಂಡ್ ಹಾಗೂ ಆಸ್ಟ್ರೇಲಿಯಾ ನಡುವೆ ಕ್ರಿಕೆಟ್ ಪಂದ್ಯ ನಡೆದಿತ್ತು. ಇದಾದ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್ ಸಂಪೂರ್ಣವಾಗಿ ಸ್ಥಗಿತಗೊಂಡಿರುವುದು ಇದೇ ಮೊದಲು. ಇದರ ಮಧ್ಯೆ ಏಷ್ಯನ್ ಫ್ಲೋ(1957-58), ಹಾಂಗ್ಕಾಂಗ್ ಫ್ಲೋ(1968-69), ಭಾರತ-ಪಾಕಿಸ್ತಾನ ಯುದ್ಧ(1965 ಹಾಗೂ 1991), ಗಲ್ಫ್ ಯುದ್ಧ(1990-1991) ಹಾಗೂ ಮುಂಬೈ ಟೆರರ್ ಅಟ್ಯಾಕ್(2008) ಸಮಯದಲ್ಲಿ ಕೆಲ ದೇಶಗಳ ನಡುವೆ ಕ್ರಿಕೆಟ್ ಬ್ಯಾನ್ ಆಗಿತ್ತು.
ಇದೀಗ ಕೊರೊನಾ ವೈರಸ್ ಕಾರಣ ಪ್ರಪಂಚದಾದ್ಯಂತ ಸಂಪೂರ್ಣವಾಗಿ ಕ್ರಿಕೆಟ್ ಬ್ಯಾನ್ ಆಗಿದೆ. 13 ಮಾರ್ಚ್ 2020ರಿಂದ ಕ್ರಿಕೆಟ್ ಪಂದ್ಯ ಬ್ಯಾನ್ ಆಗಿದ್ದು, ಒಟ್ಟು 52 ಅಂತಾರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳು ರದ್ದುಗೊಂಡಿವೆ. ಜುಲೈ 8ರಿಂದ ಇಂಗ್ಲೆಂಡ್-ವೆಸ್ಟ್ ಇಂಡೀಸ್ ನಡುವೆ ಮೊದಲ ಟೆಸ್ಟ್ ಪಂದ್ಯ ಆರಂಭಗೊಳ್ಳುವ ಮೂಲಕ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಮರು ಚಾಲನೆ ಸಿಗಲಿದೆ.
