2020ರ ಐಪಿಎಲ್​ನಿಂದ ಹೊರಬಂದಿದ್ದಕ್ಕೆ ಕಾರಣ ಬಹಿರಂಗಪಡಿಸಿದ ಕೇನ್​ ರಿಚರ್ಡ್ಸನ್

2013 ರಿಂದ 2016 ರವರೆಗೆ ಪುಣೆ ವಾರಿಯರ್ಸ್​, ರಾಜಸ್ಥಾನ್​ ರಾಯಲ್ಸ್​ ಹಾಗೂ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಪರ ಒಟ್ಟಾರೆ 14 ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದು, ಒಟ್ಟಾರೆ 18 ವಿಕೆಟ್​ ಪಡೆದಿದ್ದಾರೆ.

ನವದೆಹಲಿ: ಬರೋಬ್ಬರಿ 4 ಕೋಟಿರೂ ಮೊತ್ತಕ್ಕೆ ಆರ್​ಸಿಬಿ ಸೇರಿದ್ದ ಆಸ್ಟ್ರೇಲಿಯಾದ ವೇಗಿ ಕೇನ್​ ರಿಚರ್ಡ್ಸನ್​ ಈ ಬಾರಿ ಐಪಿಎಲ್​ನಿಂದ ಹೊರಗುಳಿಯಲು ನಿರ್ಧರಿಸಿರುವುದಕ್ಕೆ ಕಾರಣ ಬಹಿರಂಗ ಪಡಿಸಿದ್ದಾರೆ.

2019ರ ಹರಾಜಿನಲ್ಲಿ ಕೇನ್​ ರಿಚರ್ಡ್ಸರನ್​ರನ್ನು ಆರ್​ಸಿಬಿ 4 ಕೋಟಿ ರೂ ನೀಡಿ ಖರೀದಿಸಿತ್ತು. ಬೌಲರ್​ಗಳ ಕೊರೆತೆಯನ್ನು ಎದುರಿಸುತ್ತಿದ್ದ ಆರ್​ಸಿಬಿ ಆ ವಿಭಾಗವನ್ನು ಬಲಿಷ್ಟಗೊಳಿಸಲು ರಿಚರ್ಡ್ಸನ್​ರನ್ನು ಖರೀದಿಸಿತ್ತು. ಆದರೆ ಅವರು ಈ ಬಾರಿಯ ಐಪಿಎಲ್‌ನಿಂದ ಹೊರಗುಳಿಯುವ ನಿರ್ಧಾರ ಕೈಗೊಂಡಿದ್ದಾರೆ. ಅವರ ನಿರ್ಧಾರದ ಬಳಿಕ ಆರ್​ಸಿಬಿ ಆಸ್ಟ್ರೆಲಿಯಾದ ಸ್ಪಿನ್ನರ್​ ಆ್ಯಡಂ ಜಂಪಾರನ್ನು ತಂಡಕ್ಕೆ ಸೇರ್ಪಡೆ ಮಾಡಿಕೊಂಡಿದೆ. ಆದರೆ ಐಪಿಎಲ್​ನಿಂದ ಹಿಂದೆ ಸರಿಯುವುದು ಕಠಿಣ ನಿರ್ಧಾರ ಎಂದು ತಿಳಿದಿದ್ದರೂ, ಪ್ರಸ್ತುತ ನಿರ್ಧಾರದಲ್ಲಿ ಅದು ಉತ್ತಮವಾದ್ದು ಎಂದು ಭಾವಿಸುತ್ತೇನೆ ಎಂದಿದ್ದಾರೆ.

ಕೇನ್ ರಿಚರ್ಡ್ಸನ್ ಅವರ ಪತ್ನಿ ಗರ್ಭಿಣಿಯಾಗಿದ್ದು ಐಪಿಎಲ್​ ಸಂದರ್ಭದಲ್ಲೇ ಮೊದಲ ಮಗುವಿಗೆ ಜನ್ಮ ನೀಡಲಿದ್ದಾರೆ. ಇದೇ ಕಾರಣಕ್ಕೆ ತಾವು ಐಪಿಎಲ್​ನಿಂದ ಹಿಂದೆ ಸರಿದಿರುವುದಾಗಿ ಕೇನ್​ ತಿಳಿಸಿದ್ದಾರೆ. "ಮೊದಲ ಮಗುವಿನ ಜನನದ ಸಂದರ್ಭದಲ್ಲಿ ಪತ್ನಿ ಜೊತೆಯಾಗಿರುವುದನ್ನು ಕಳೆದುಕೊಳ್ಳಲು ಇಚ್ಚಿಸುವುದಿಲ್ಲ" ಎಂದು ಅವರು ತಮ್ಮ ದೃಢ ನಿರ್ಧಾರದ ಹಿಂದಿರುವ ಕಾರಣವನ್ನು ತಿಳಿಸಿದ್ದಾರೆ,

ಐಪಿಎಲ್‌ನ ಭಾಗವಾಗದಿರುವುದಕ್ಕೆ ನಾನು ಖಂಡಿತಾ ನಿರಾಸೆಗೊಂಡಿದ್ದೇನೆ. ಆದರೆ ಭವಿಷ್ಯದಲ್ಲಿ ಈ ಅವಕಾಶ ಮತ್ತೆ ದೊರೆಯಬಹುದೆಂಬ ಆಶಾವಾದದಲ್ಲಿದ್ದೇನೆ ಎಂದು ರಿಚರ್ಡ್ಸನ್ ಹೇಳಿದ್ದಾರೆ.

2013ರಿಂದ 2016ವರೆಗೆ ಪುಣೆ ವಾರಿಯರ್ಸ್​, ರಾಜಸ್ಥಾನ್​ ರಾಯಲ್ಸ್​ ಹಾಗೂ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ಪರ ಒಟ್ಟಾರೆ 14 ಪಂದ್ಯಗಳಲ್ಲಿ ಕಾಣಿಸಿಕೊಂಡಿದ್ದು, ಒಟ್ಟಾರೆ18 ವಿಕೆಟ್​ ಪಡೆದಿದ್ದಾರೆ.